بۇل تۋرالى 28 ناۋرىزدا قىتاي مەملەكەتتىك كەڭەسىنىڭ مۇشەسى، سىرتقى ىستەر ءمينيسترى ۆان ي پەكينگە رەسمي ساپارلاپ بارعان قازاقستان سىرتقى ىستەر ءمينيسترى بەيبىت اتامقۇلوۆپەن كەزدەسۋى كەزىندە ايتقان.

پەكين 28 ناۋرىزدا تاراتقان حابارلامادا ۆاننىڭ اتامقۇلوۆپەن كەزدەسۋى كەزىندە "شىڭجاڭداعى راديكالدارمەن كۇرەس باعدارلاماسى وتە ناتيجەلى بولدى" دەگەنى جازىلعان.

ۆان "بۇل قادامدار جەرگىلىكتى قاۋىپسىزدىك پەن تۇراقتىلىقتى قامتاماسىز ەتىپ، ايماقتاعى بەيبىتشىلىككە ىقپال ەتتى. ءبىز حالىقارالىق قاۋىمداستىققا تەرروريزم مەن ەكسترەميستىك ويلاردى قۋدالاۋدىڭ ءتيىمدى امالىن كورسەتتىك" دەدى.

حابارلامادا ۆاننىڭ "قازاقستان ۇكىمەتىنىڭ قىتاي پوزيتسياسىن ءتۇسىنىپ، قولداعانىن باعالايمىز، ەشكىمنىڭ، ەشبىر كۇشتىڭ قىتاي مەن قازاقستان اراسىنداعى دوستىق پەن سەنىمگە سەلكەۋ تۇسىرۋىنە جول بەرمەيمىز" دەگەنى ايتىلادى.

قازاقستان سىرتقى ىستەر مينيسترلىگىنىڭ سايتى دا كەزدەسۋدەن سوڭ مالىمدەمە تاراتتى. مينيسترلىك "كەلىسسوزدەردىڭ جەكە بولىگى رەتىندە قىتاي اۋماعىندا تۇراتىن ەتنيكالىق قازاقتار جاعدايى تۋرالى ماسەلە بولدى. ەكى ەل ماسەلەنى ديپلوماتتار جۇمىسىنداعى ماسەلەلەردى شەشۋگە مۇددەلى ەكەنىن ايتىپ، كونسۋلدىق قىزمەتتەردىڭ جۇمىسىن جانداندىرۋ تۋرالى ۋاعدالاستىققا قول جەتكىزىلدى" دەپ جازادى.

بىراق قازاقستان بيلىگى قىتاي ەلشىسىنىڭ "ەكسترەميزممەن كۇرەس باعدارلاماسىن قولداعانى ءۇشىن" نۇر-سۇلتانعا العىس ايتقانىن جازباعان.

قازاقستان ۇكىمەتى قىتايدا قاماۋدا وتىرعان مۇسىلماندارعا بايلانىستى پەكيندى اشىق سىناعان ەمەس، بىراق قاماۋداعى قوس ازاماتتىعى بار قازاقتاردى شىعارۋ جونىندە كەلىسسوز جۇرگىزىپ جاتقانىن بىرنەشە رەت ايتقان.

بيىل ناۋرىزدىڭ باسىندا الماتىدا پوليتسيا تىركەلمەگەن "اتاجۇرت ەرىكتىلەرى" ۇيىمىنىڭ جەتەكشىسى سەرىكجان ءبىلاشتى ۇستاپ، استاناعا الىپ كەتكەن. سوت شەشىمىمەن ول ەكى اي مەرزىمگە ۇيقاماققا الىندى. پروكۋراتۋرا ءبىلاشتىڭ ۇستالۋىنا الماتىدا 8 اقپاندا وتكەن جيىنداردىڭ بىرىندە بەلسەندىنىڭ "ازاماتتاردى "جيھادقا" - ەتنيكالىق قىتايلارعا قارسى سوعىسقا شاقىرۋى" سەبەپ بولعانىن حابارلاعان.

سوڭعى ەكى جىلدان بەرى شىڭجاڭدا از ۇلتتاردىڭ قۋعىنعا ۇشىراعانى تۋرالى اقپارات شىعىپ جاتىر. بىرىككەن ۇلتتار ۇيىمى شىڭجاڭداعى "ساياسي تاربيەلەۋ ورتالىقتارىندا" ميلليونعا جۋىق ادام "ەركىنەن تىس" قاماۋدا وتىرعانىن مالىمدەگەن. قىتاي ۇكىمەتى باسىندا بۇل ورتالىقتاردىڭ بارىن جوققا شىعارىپ كەلدى. كەيىن پەكين قىسىمدى "ەكسترەميزمگە قارسى شارا" دەپ مالىمدەدى جانە "قامالعاندار ءتىل ۇيرەنىپ، كاسىپ مەڭگەرىپ شىعادى" دەگەن اقپارات تاراتتى.

Abai.kz