قىتايدا ءتۇرلى ساياسي قىسىمدا قالعان قازاقتار تۋراسىندا جوعارعى جاقتا سەڭ قوزعالىپ جاتقان سىڭايلى. كوپ بولىپ تالاپ ەتكەن نارسە ەسكەرۋسىز قالمايدى. ەل ەكەنىمىزدى كورسەتىپ، قىتايمەن اشىق ديالوگقا كەلىپ، ونداعى اعايىنداردى اراشالاپ، ەلگە جيناپ الساق قوي.

كەشە پرەزيدەنت قاسىم-جومارت توقاەۆ «ايقىن» جانە «ەگەمەن قازاقستان» گازەتتەرىنە بەرگەن سۇحباتىندا شەتەلدەگى قانداستار تۋرالى ءوز پىكىرىن ءبىلدىردى. «شەتەلدەگى قانداستارىمىزدى («ورالمان» دەگەن سوزگە مەن قارسىمىن) اتامەكەنگە قايتارۋ ءىسى ەشقاشان نازاردان تىس قالعان ەمەس، قالمايدى دا. الەمنىڭ تۇكپىر-تۇكپىرىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ پارىزىمىز»، – دەدى.

سونىمەن قاتار، پارلامەنت سەناتىنىڭ توراعاسى داريعا نازارباەۆا قىتاي ەلشىسىن قابىلدادى.

ول شينجيااڭ ۇيعىر اۆتونوميالىق اۋدانىنداعى قازاقتار تاقىرىبىن قوزعاي كەلىپ، قحر-داعى ەتنيكالىق قازاقتار قازاقستان مەن قىتاي اراسىنداعى قارىم-قاتىناستا «دوستىق كوپىرى» ەكەنىن اتاپ ءوتتى. تاراپتار وسى سالادا تۋىندايتىن ماسەلەلەردى ءوزارا اقىلداسىپ، سىندارلى تۇردە شەشۋگە ۋاعدالاستى.