تيتۋشكالار - بيلىك اقشا بەرىپ، بەلگىلى ءبىر ماقساتقا پايدالاناتىن توپ. ەكىگە بولىنەدى. ءبىرىنشىسى سول كۇنى، ناقتى اقشانى الىپ تاپسىرما ورىندايدى دا جونىنە كەتەدى. ەكىنشىسى، ۇنەمى قولدانىلاتىندار.

العاش رەت ۋكراينادا 2013-14 جىلدارى حالىق بيلىككە تالاپ قويعان كەزدە پايدا بولعان. وپپوزيتسيا وتكىزگەن جيىندا جۇرتتىڭ كوڭىل كۇيىن وزگەرتەتىن ءسوز سويلەيدى، شۋ-شۇرقان شىعارادى، تاعىسىن تاعى، جيىننىڭ شىرقىن بۇزادى. قىرعىزستاندا باكيەۆتى بيلىكتەن كەتىرەردە تيتۋشكالاردىڭ جاڭا ءتۇرى "دولى قاتىندار" (قازاقشا اتاۋى شامامەن وسىلاي) پايدا بولدى. بيلىكتى سىناۋشىلاردىڭ ءاپ-اجەپتەۋىر ساليقالى جيىنىنا وننان استام ايەل جەتىپ كەپ، ايعاي-شۋ شىعارىپ، ليدەرلەرىنىڭ جاعاسىنان الىپ، بەتىن تىرناۋعا دەيىن بارادى. اياق استىنان ساپ ەتە قالعان ايەلدەرگە ولار تۇك ىستەي المايدى. بۇل ايەلدەردىڭ مىندەتى - تەك قانا شىرىق بۇزۋ.

بۇل ءادىس ءبىزدىڭ ەلىمىزگە دە جەتكەن. سوڭعى كەزدەرى جۋرناليستەرگە قارسى پايدالانىلا باستادى. بىلتىر جەر ميتينگىسى كەزىندە تىكەلەي ەفير جۇرگىزىپ تۇرعانىمدا الدەبىر جاس جىگىت ماعان قايتا-قايتا سوقتىعىستى. تىكە ەفيردە (!) اكە-كوكە دەپ ءۇش-ءتورت رەت كەشىرىم سۇراپ زورعا قۇتىلدىم. ونى ءبىراز ادام كوردى. البەتتە ولارمەن كونفليكتىگە بارساق ىزدەگەنگە سۇراعان بوپ شىعامىز. مۇنداي جايدى بيىل ناۋرىزداعى قارسىلىق اكتسياسىندا دا كوردىك. سىقيىپ كيىنگەن جىگىتتەر كوپ الدىندا سويلەپ، جۇرتتىڭ باعىتىن وزگەرتكىسى كەلدى. ءدال سونىڭ جانىندا تۇرعان بوزبالا مەن تاعى دا بىرنەشە جىگىت كامەرامىزدى جاۋىپ، كەدەرگى جاسادى. باق جۇمىسىنا كەدەرگى جاساۋ - قىلمىستىق ءىس. بىراق پوليتسيا تۇك كورمەگەندەي بولدى.

وسى جاعداي استانادا دا قايتالاندى. ارىپتەستەرىمىزدى جۇرگىزبەي، ءبىر توپ سارى اۋىز بالاپان ابدەن كەدەرگى جاسادى. وركەن جويامەرگەننىڭ توزىمىنە ءتانتى بولدىم. تاعى ءبىر ارىپتەسىم سۆەتلانا گلۋشكوۆانىڭ ۇستىنەن الدەبىر قىز "ۇرىپ جىبەردى" دەپ ارىزدانعان. سۆەتلانا كىمگە، قاشان قولى ءتيىپ كەتكەنىن بىلمەيدى دە. ءسويتىپ بىرنەشە كۇننەن بەرى جۇرتتى شۋلاتىپ، بۇگىن بولىمسىز ايىپپۇلىن سالدى.

ماسەلە ايىپپۇلدىڭ از، يا كوپتىگىندە ەمەس. ماسەلە - قازاقستاننىڭ بەيتاراپ جۋرناليستيكاعا دا (وپپوزيتسيا ەمەس) توزە المايتىن جاعدايعا جەتكەنىندە، مەيلىنشە لاس ءادىس - تيتۋشكالار ءادىسىن قولدانا باستاعانىندا.

بۇل وتە قاۋىپتى جاعداي.

اسىلحان ماماشۇلىنىڭ facebook پاراقشاسىنان

Abai.kz