پارلامەنت سەناتى كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسىندا «اۆتورلىق جانە ساباقتاس قۇقىقتاردى ۇجىمدىق نەگىزدە باسقارۋ ءتارتىبى تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالدى.

2017 جىلعى 11 جەلتوقساندا ماسكەۋ قالاسىندا ەۋرازيالىق ەكونوميكالىق كوميسسياسى كەڭەسىنىڭ وتىرىسىندا وسى كەلىسىمگە قول قويىلعان بولاتىن. وندا اۆتورلاردىڭ، ورىنداۋشىلاردىڭ، فونوگرامما دايىنداۋشىلاردىڭ (جاساۋشىلاردىڭ), اۆتورلىق جانە ساباقتاس قۇقىقتاردى وزگە دە يەلەنۋشىلەردىڭ اۆتورلىق جانە ساباقتاس قۇقىقتاردى ءىس جۇزىندە جەكە تۇردە جۇزەگە اسىرۋ قيىن بولعاندا نەمەسە مۇشە مەملەكەتتەردىڭ زاڭنامالارىندا وسى قۇقىقتاردىڭ وبەكتىلەرىن قۇقىق يەلەنۋشىلەردىڭ كەلىسىمىنسىز، بىراق سىياقى تولەي وتىرىپ پايدالانۋعا جول بەرىلەتىن جاعدايلاردا، ەاەو-عا مۇشە مەملەكەتتەردىڭ اۋماقتارىندا اۆتورلىق جانە ساباقتاس قۇقىقتاردى ۇجىمدىق نەگىزدە باسقارۋ ءتارتىبىن بەلگىلەيدى.

مۇشە مەملەكەتتەردىڭ زاڭناماسىندا ايقىندالاتىن اۆتورلىق جانە ساباقتاس قۇقىقتاردى ۇجىمدىق باسقارۋ سالالارىندا قۇقىقتاردى ۇجىمدىق باسقارۋ جونىندەگى ۇيىمداردى قۇرۋ مۇمكىندىگى كوزدەلەدى.

كەلىسىمگە سايكەس، مۇشە مەملەكەتتەر وزدەرىنىڭ زاڭناماسىندا اۆتورلىق جانە ساباقتاس قۇقىقتار وبەكتىلەرىن قۇقىق يەلەنۋشىنىڭ نە ۇيىمنىڭ كەلىسىمىنسىز پايدالانعانى، ۇيىمنىڭ قۇقىق يەلەنۋشىگە جينالعان سىياقىنى تولەمەگەنى، اۋديت جانە تەكسەرۋ جۇرگىزۋ جونىندەگى مىندەتتەمەنى ورىنداماعانى ءۇشىن جاۋاپتىلىق بەلگىلەيدى. زاڭ جوباسى پالاتا قاراۋىنا جىبەرىلدى.

Abai.kz