بۇگىن اقمولا وبلىسىنا جاساعان ساپارى بارىسىندا «Nur Otan» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ كوكشەتاۋ قالاسىنداعى سۋ باسقان «پريۆوكزالنىي» شاعىن اۋدانىنىڭ تۇرعىندارىمەن كەزدەستى.

اتالعان ماسەلەگە بايلانىستى ول پارتيانىڭ جەرگىلىكتى فيليالىنا توتەنشە جاعدايمەن كۇرەس جۇمىستارىن باقىلاۋدا ۇستاپ، زارداپ شەككەن ءار ازاماتتىڭ مەملەكەت تاراپىنان بەرىلەتىن مىندەتتى كومەكتى الۋىن قامتاماسىز ەتۋدى تاپسىردى.

– ەلباسى، پارتيا توراعاسىنىڭ الدىمىزعا قويىپ وتىرعان ەڭ باستى مىندەتتەرىنىڭ ءبىرى حالىقتى الاڭداتقان كەز كەلگەن ماسەلەنى وڭ شەشۋگە ىقپال ەتۋ. سوندىقتان سۋ تاسقىنى سياقتى ايتىپ كەلمەيتىن اپاتتاردان زارداپ شەككەن ازاماتتارعا قولداۋ كورسەتۋ پارتيا جۇمىسىنداعى باسىمدىقتاردىڭ ءبىرى بولىپ سانالادى. مۇنداي ماسەلەنى قايتا بولدىرماۋ ءۇشىن الدىن الۋ جۇمىستارىن كۇشەيتىپ، باستى سەبەبىمەن كۇرەسۋىمىز كەرەك. سوندىقتان پارتيا وبلىس باسشىلىعىنىڭ وسى باعىتتاعى جۇمىستارىن تىكەلەي ءوز باقىلاۋىندا ۇستايدى، – دەدى ماۋلەن اشىمباەۆ.

سونىمەن قاتار ساپار بارىسىندا «Nur Otan» پارتياسى توراعاسىنىڭ ءبىرىنشى ورىنباسارى ەلباسى تاپسىرماسىنا سايكەس قولعا الىنعان «حالىققا كومەك» جوباسىنىڭ جۇزەگە اسىرىلۋ بارىسىمەن تانىستى. قازىردىڭ وزىندە جوبا اياسىندا پارتيانىڭ قوعامدىق قابىلداۋ بولمەلەرىندە اشىلعان بىرىڭعاي الەۋمەتتىك تەرەزە ارقىلى ەلىمىز بويىنشا 2400-دەن استام ءوتىنىش ءتۇسىپ، ونىڭ 40 پايىزى وڭ شەشىمىن تاپقان. ال اقمولا وبلىسىندا ءبىر ايدىڭ ىشىندە كوپ بالالى وتباسىلاردان 431 ءوتىنىش كەلىپ ءتۇسىپ، ونىڭ جارتىسىنا جۋىعى (43%) دەرەۋ شەشىمىن تاپتى. قالعان ارىز-تىلەكتەر بويىنشا ءتيىستى جۇمىستار جۇرگىزىلۋدە.

پارتيا توراعاسى انىقتاپ بەرگەن ماڭىزدى باسىمدىقتاردىڭ ءبىرى «باقىتتى وتباسى» جوباسى. بۇل باستاما تىكەلەي كوپ بالالى جانە الەۋمەتتىك از قامتىلعان وتباسىلارعا جۇيەلى قولداۋ كورسەتۋگە باعىتتالعان. وسى جوبا اياسىندا ماۋلەن اشىمباەۆ كوكشەتاۋ قالاسىنداعى قاقجانوۆتار وتباسىنا ارنايى ات باسىن بۇردى.

– «حالىققا كومەك» جانە «باقىتتى وتباسى» جوبالارى ەلباسىنىڭ تىكەلەي تاپسىرماسىمەن قولعا الىنعان يگى باستامالار. ويتكەنى كوپ بالالى جانە الەۋمەتتىك از قامتىلعان وتباسىلارعا جۇيەلى قولداۋ كورسەتۋ مەملەكەتىمىزدىڭ نەگىزگى باسىمدىعى بولىپ تابىلادى، – دەدى ماۋلەن اشىمباەۆ.

Abai.kz