قىزىلوردا وبلىسىندا قازاقستان رەسپۋبليكاسى تۇڭعىش پرەزيدەنتى - ەلباسى كىتاپحاناسىنىڭ «ن.نازارباەۆ: ءداۋىر، تۇلعا، قوعام» كوشپەلى كورمە جوباسىنىڭ كەزەكتى كەزەڭى باستالدى.

بۇگىن قىزىلوردا وبلىستىق تاريحي-ولكەتانۋ مۇراجايىندا «ن. نازارباەۆ: ءداۋىر، تۇلعا، قوعام» اتتى كورمە سالتاناتتى تۇردە اشىلدى. شاراعا قىزىلوردا وبلىسىنىڭ اكىمى قىرىمبەك كوشەرباەۆ، قازاقستان رەسپۋبليكاسىنىڭ تۇڭعىش پرەزيدەنتى  -  ەلباسى كىتاپحاناسىنىڭ ديرەكتورى ءامىرحان راحىمجانوۆ قاتىستى.

جۇرتشىلىق الدىندا قىزىلوردا وبلىسىنىڭ اكىمى قىرىمبەك كوشەرباەۆ كوشپەلى كورمە جوباسىنىڭ جەرگىلىكتى تۇرعىندار ءۇشىن ماڭىزى زور ەكەنىن اتاپ ءوتتى. الداعى ۋاقىتتا سىر ءوڭىرى حالقى تۇڭعىش پرەزيدەنت - ەلباسىنىڭ ءومىر جولى، ەلى ءۇشىن اتقارعان ەڭبەگىمەن جاقىن تانىسا الادى.

«ارعى-بەرگى تاريحىنا قىسقاشا كوز جۇگىرتسەك، سىر ءوڭىرى - كونە كەزەڭنەن بەرى ساقتاردىڭ ورداسى، بەرتىن كەلە وعىز-قىپشاق بىرلەستىكتەرىنىڭ ورتالىعى، التىن وردا مەن اق وردا حاندارىنىڭ تۋىن تىككەن قاسيەتتى توپىراق. 1925 جىلى قازاق رەسپۋبليكاسىنىڭ العاشقى استاناسى بولىپ، ۇلتىمىزدىڭ تاريحي قازاق اتاۋى قايتارىلدى. سوندىقتان تۇڭعىش پرەزيدەنت - ەلباسى نۇرسۇلتان ءابىشۇلى نازارباەۆ ءبىزدىڭ ءوڭىردى «سىر - الاشتىڭ اناسى» دەپ اتاعانى بارشامىزعا بەلگىلى. تۇڭعىش ءسوزىنىڭ ءمانى تەرەڭ. دجوردج ۆاشينگتون، كەمال اتاتۇرىك، ماحاتما گاندي سەكىلدى تۇعىرلى تۇلعالاردىڭ قاتارىندا تۇڭعىش پرەزيدەنتىمىز نۇرسۇلتان ءابىشۇلى نازارباەۆتىڭ ەسىمى جۇلدىزداي جارقىراپ تۇرۋى بىزگە ماقتانىش سەزىمىن ۇيالاتادى»، - دەدى وبلىس اكىمى.

وتكەن عاسىردىڭ توقسانىنشى جىلدارىنىڭ باسىندا تاۋەلسىزدىگىن ەندى عانا العان ەلىمىز جۇزدەن اسا ۇلتتىڭ باسىن قوسىپ، سونشالىقتى سالت-ءداستۇر، مادەنيەت پەن ءتىل شوعىرلانعان قوعامدا جاڭاشا ءومىر ءسۇرۋ سالتىن باستادى. ءۇش عاسىرعا جۋىق الىپ يمپەريانىڭ قۇرساۋىندا بولىپ، بارلىق بولمىس-ءبىتىمىن رۋحاني قۇندىلىعىن، ۇلتتىق سەزىمىن جوعالتا باستاعان ەلدىڭ الدىندا قيىن كەزەڭ تۇردى.

«سول ءبىر قيىن-قىستاۋ كەزەڭدە تىعىرىقتان شىعار جول تاۋىپ، اسىل مۇراتتارعا جەتەلەيتىن تۇلعاعا تاريحي سۇرانىس پايدا بولدى. قازاقستان حالقى العاشقى پرەزيدەنت سايلاۋىندا تاريحي تاڭداۋىن جاسادى. ەلى تاڭداعان ەلباسى قازاقستاندىق دامۋدىڭ داڭعىل جولىن جاسادى. حالقىمىزدىڭ تالاي عاسىر اڭساعان تاۋەلسىزدىك، ەگەمەندىك، ەركىندىك، ازاتتىق دەگەن قاسيەتتى سوزدەرى ەلباسىنىڭ كەمەڭگەر كوشباسشىلىعىمەن اقيقاتقا اينالدى. تۇڭعىش پرەزيدەنت - ەلباسى كىتاپحاناسىنىڭ كوشپەلى كورمەسىنىڭ سىر جۇرتشىلىعى ءۇشىن قىزمەت جاساۋى - ماڭىزى زور وقيعا»، - دەدى وبلىس اكىمى.

ەلباسى كىتاپحاناسىنىڭ «ن.نازارباەۆ: ءداۋىر، تۇلعا، قوعام» اتتى كوشپەلى كورمە جوباسى 2017 جىلى قاراشا ايىندا الماتى قالاسىنان باستاۋ العان ەدى. بۇگىنگى كۇنگە دەيىن كورمە تۇركىستان، اتىراۋ، اقتوبە وبلىستارىندا، الماتى، شىمكەنت قالالارىندا ءوتتى. اتالمىش وڭىرلەردە كورمەنى تاماشالاۋعا 730 مىڭنان استام ادام قاتىستى.

«سىر ءوڭىرى - قازاق حالقى ءۇشىن ماڭىزى زور ايماقتىڭ ءبىرى. قاسيەتتى قورقىت بابامىزدىڭ ءىزى بار، ءبىر عاسىرداي بۇرىن ەلىمىزدىڭ استاناسى بولعان قىزىلوردادا ەلباسى كىتاپحاناسىنىڭ «ن. نازارباەۆ: ءداۋىر، تۇلعا، قوعام» كوشپەلى كورمە جوباسىنىڭ اشىلۋ سالتاناتىنا جينالىپ وتىرعانىمىزعا قۋانىشتىمىز. اتالمىش كورمە تاۋەلسىزدىگىمىزدىڭ تالبەسىگى اتانعان الماتىدا باستالىپ، بىلتىر جىل بويى ەلىمىزدىڭ بىرقاتار وڭىرلەرىندە تابىستى وتكەن بولاتىن. كوشپەلى كورمەنىڭ قىزىلوردا وبلىسىنا كەلۋىن قازاق حاندىعىنىڭ باس شاھارى - سىعاناق پەن وتكەن عاسىردىڭ ەكىنشى ونجىلدىعىندا ەلىمىزدىڭ استاناسى بولعان قىزىلورداعا تاۋەلسىز قازاقستاننىڭ ەلورداسى - نۇر-سۇلتان قالاسىنىڭ تارتۋى دەپ باعالاۋعا تولىق نەگىز بار. سىر جۇرتشىلىعىنىڭ ەلباسىنىڭ ءومىر جولى مەن ساياسي قىزمەتىن باياندايتىن جادىگەرلەردەن ۇمىتىلماس اسەر الاتىنىنا كامىل سەنەمىز»، - دەدى قازاقستان رەسپۋبليكاسىنىڭ تۇڭعىش پرەزيدەنتى  -  ەلباسى كىتاپحاناسىنىڭ ديرەكتورى ءامىرحان راحىمجانوۆ.

كوشپەلى كورمە جوباسى اياسىندا سىر وڭىرىندە اۋقىمدى عىلىمي-ءبىلىم بەرۋ جانە مادەني-اعارتۋشىلىق ءىس-شارالار وتكىزىلەدى. سونداي-اق، كوشپەلى ەكسكۋرسيا، حالىقارالىق عىلىمي كونفەرەنتسيا، ايماقتىق كاسىبي سەسسيا، سەمينار-ترەنينگتەر، تاقىرىپتىق ەكسكۋرسيالار، قىزىلوردا وبلىسى بويىنشا كوشپەلى كورمەلەر مەن ەكسكۋرسيا بولادى دەپ جوسپارلانىپ وتىر.

وبلىستىڭ شيەلى جانە قارماقشى  اۋداندارىندا 5-6 ءساۋىر كۇندەرى «تۇڭعىش» ەكسكۋرسيالىق تۇجىرىمداماسى اياسىندا كوشپەلى ەكسكۋرسيالار مەن كورمەلەر وتكىزىلدى. قازاقستان رەسپۋبليكاسى تۇڭعىش پرەزيدەنتى - ەلباسى كىتاپحاناسىنداعى ءامىرحان راحىمجانوۆ قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ پروفەسسورلىق-وقىتۋشىلىق قۇرامىمەن جانە جاستار بەلسەندىلەرىمەن كەزدەستى. ءا.تاجىباەۆ اتىنداعى وبلىستىق امبەباپ كىتاپحاناسىندا كوشپەلى كورمەگە وراي ماڭىزدى شارالار وتكىزىلدى.

Abai.kz