بۇگىن مەملەكەت باسشىسى قاسىم-جومارت توقاەۆ قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋى وتەتىنىن مالىمدەدى. پرەزيدەنتتىڭ مالىمدەمەسىن اقوردانىڭ رەسمي سايتى جاريالادى.

قىمباتتى وتانداستار!

بۇگىن ەلىمىزگە جانە ارقايسىمىزعا قاتىستى اسا ماڭىزدى ۇندەۋ جاريالاپ وتىرمىن.

ەلىمىزدىڭ كونستيتۋتسياسىنا سايكەس قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن 2019 جىلدىڭ 9 ماۋسىمىندا وتكىزۋ تۋرالى شەشىم قابىلدادىم.

مەن بۇل جاۋاپتى شەشىم بويىنشا ەلباسىمىز نۇرسۇلتان ءابىشۇلى نازارباەۆپەن اقىلداستىم.

پارلامەنتتىڭ قوس پالاتا سپيكەرىمەن، پرەمەر-مينيسترمەن كەڭەستىم.

كونستيتۋتسيالىق كەڭەستىڭ كەلىسىمىنە جۇگىندىم.

پارلامەنتتەگى پارتيا جەتەكشىلەرىمەن كەزدەستىم.

كەزەكتەن تىس سايلاۋ تۋرالى شەشىم قابىلداۋ – وتە ماڭىزدى ءارى قاجەتتى قادام.

ءبىز ەلباسىمىزدىڭ ارقاسىندا تاۋەلسىز، قۋاتتى مەملەكەت قۇردىق. قازاقستان حالىقارالىق جۇيەدە وزىنە لايىقتى ورنىن الدى. ءبىزدى ىقپالدى جانە بەلدى مەملەكەت رەتىندە بۇكىل الەم مويىندايدى.

قازىرگى تاڭدا تاريحي كەزەڭدى باستان وتكەرىپ وتىرمىز.

جوعارى بيلىك زاڭدى جانە بەيبىت جولمەن اۋىستى. بۇكىل الەم قوعامداستىعى وسى وقيعانى تۇسىنىستىكپەن جانە قۇرمەتپەن قابىلدادى.

مەملەكەت باسشىسى رەتىندە مەن ءوزىمنىڭ مىندەتىمدى جانە جاۋاپكەرشىلىگىمدى تەرeڭ سەزىنەمىن.

پرەزيدەنت لاۋازىمىنا كىرىسكەننەن باستاپ وڭىرلەردى ارالاپ ءجۇرمىن. حالىقتىڭ كوڭىل-كۇيىن جاقسى بىلەمىن. زيالى قاۋىممەن، ەڭبەك ۇجىمدارىمەن، بيزنەس وكىلدەرىمەن، ينۆەستورلارمەن، حالىقارالىق تۇلعالارمەن كەزدەستىم.

ءبىز ەلباسىنىڭ سارا جولىمەن جۇرەمىز. حالقىمىز – ءبىرتۇتاس. تاۋەلسىزدىگىمىزدىڭ ەڭ جوعارى قۇندىلىعى رەتىندە مەملەكەتىمىزدىڭ ىرگەسى مىعىم. الداعى پرەزيدەنت سايلاۋى وسىعان دالەل بولۋى كەرەك.

سوندىقتان، ەلدەگى قوعامدىق-ساياسي كەلىسىمدى قامتاماسىز ەتىپ، العا باسۋ ءۇشىن، الەۋمەتتىك-ەكونوميكالىق ماقسات-مىندەتتەردى لايىقتى جۇزەگە اسىرۋ ءۇشىن بىزگە ايقىندىق قاجەت. ونىڭ ۇستىنە، الەمدەگى احۋال بۇلىڭعىر بولىپ تۇر. بۇل وتانىمىزدىڭ قاۋىپسىزدىگىنە سىن-قاتەر اكەلۋى مۇمكىن.

ىشكى جانە سىرتقى ساياساتتاعى ساباقتاستىق پەن تۇراقتىلىقتى ساقتاپ، ەلباسى ۇسىنعان الەۋمەتتىك باعدارلامالاردى ويداعىداي ءساتتى ءارى ءتيىمدى ىسكە اسىرۋىمىز كەرەك.

ول ءۇشىن اتالعان تاعدىرلى شەشىمدى قابىلدادىم.

مۇنداي شەشىم تەك حالىقتىڭ تىكەلەي ەركىمەن سايلاۋدا قابىلدانۋى قاجەت.

قازاقستان – دەموكراتيالىق مەملەكەت. پرەزيدەنت حالىقتىڭ تاڭداۋىمەن سايلانادى.

مەن، مەملەكەت باسشىسى رەتىندە، سايلاۋدىڭ تازا، اشىق ءارى ءادىل وتۋىنە كەپىلدىك بەرەمىن! بۇل – مەنىڭ بەرىك ۇستانىمىم!

الدىمىزدا زور مىندەتتەر تۇر. مەن حالقىمىزعا، ياعني سىزدەرگە  سەنەمىن.

قادىرلى وتانداستار!

«التاۋ الا بولسا، اۋىزداعى كەتەدى، تورتەۋ تۇگەل بولسا، توبەدەگى كەلەدى» دەيدى دانا حالقىمىز.

الداعى سايلاۋعا بارشاڭىزدى بارىنشا جاۋاپكەرشىلىكپەن قاراۋعا شاقىرامىن.

ەلىمىزدىڭ كەلەشەگى، ءار وتباسى مەن ءار ازاماتتىڭ تاعدىرى سىزدەردىڭ شەشىمدەرىڭىزگە تىكەلەي بايلانىستى!

Abai.kz