دۇيسەنبى, 22 ءساۋىر 2019
بيلىك 2135 11 پىكىر 12 ءساۋىر, 2019 ساعات 09:25

نازارباەۆ: ەاەو - ەۋروپا مەن ازيا اراسىنداعى سەنىمدى كوپىر

ەاەو - وركەندەگەن ەۋروپا مەن ورلەگەن ازيانىڭ اراسىنداعى سەنىمدى كوپىر. ەلباسى نۇرسۇلتان نازارباەۆتىڭ وسى پىكىرى «يدەيادان شىنايىلىققا: قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ ەۋرازيالىق باستاماسىنا 25 جىل» اتتى ەلوردادا وتكەن حالىقارالىق عىلىمي-پراكتيكالىق كونفەرەنتسياسىندا ايتىلدى، دەپ حابارلايدى قازاقپارات ءتىلشىسى.

جيىن بارىسىندا تۇڭعىش-پرەزيدەنت ەلباسىنىڭ قاتىسۋشىلارعا ارناعان قۇتتىقتاۋ حاتىن قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى دارحان كالەتاەۆ وقىپ بەرگەن بولاتىن.

«1994 جىلى ماسكەۋ مەملەكەتتىك ۋنيۆەرسيتەتىندە ينتەگراتسيالىق جوبانى قۇرۋ يدەياسىن العاش رەت ايتقان ەدىم. سول كەزدە مۇنداي بىرلەستىك ماعان دامۋىنا جانە ازاماتتاردىڭ ءال-اۋقاتىنىڭ جاڭا مۇمكىندىكتەرى ءۇشىن تۇراقتى جاعداي جاساۋعا كومەكتەسەتىن قۋاتتى ەكونوميكالىق وداق رەتىندە ەلەستەدى. بۇگىن ول شىندىققا اينالدى. بيىل ەۋرازيالىق ەكونوميكالىق وداق تۋرالى شارتقا قول قويىلعانىنا جانە ەۋرازيالىق ينتەگراتسيا يدەياسىنىڭ ايتىلعانىنا 25 جىل تولىپ وتىر. قازىرگى ەاەو - سىرتقى ساۋدا اينالىمى 750 ميلليارد دوللاردان اساتىن ۇلكەن نارىق. ونىڭ جيىنتىق ءىجو مولشەرى - ەكى تريلليون دوللار، حالىق سانى 180 ميلليون ادامنان اسادى.

قاۋىمداستىققا مۇشە مەملەكەتتەر وڭ ءوسۋ قارقىنىن قامتاماسىز ەتتى. شەتەلدىك جانە ءوزارا ساۋدا-ساتتىق ايتارلىقتاي ءوسىپ، حالىقارالىق ىنتىماقتاستىق بەلسەندى تۇردە جۇرگىزىلۋدە. جاقىن ارادا ءبىز ەاەو-نى ەۋروپا مەن ءوسىپ كەلە جاتقان ازيا اراسىنداعى سەنىمدى كوپىر رەتىندە كورىپ وتىرمىز »، - دەلىنگەن ەلباسىنىڭ حاتىندا.

نۇرسۇلتان نازارباەۆ ەكونوميكالىق ينتەگراتسيانىڭ دامۋى - ەكونوميكانى ءارتاراپتاندىرۋدا، باسەكەگە قابىلەتتىلىكتى نىعايتۋدا، ىسكەرلىك احۋالدى جاقسارتىپ، قاتىسۋشى ەلدەردىڭ ينۆەستيتسيالىق تارتىمدىلىعىن ارتتىرۋدا نەگىزگى كۇش بولا الاتىنىن اتاپ ءوتتى.

«ءىرى سەرىكتەستەرمەن جانە جاڭا دامىپ كەلە جاتقان نارىقتارمەن ساۋدا-ەكونوميكالىق قاتىناستاردى كەڭەيتۋ - ەۋرازيالىق ەكونوميكالىق وداقتىڭ بۇكىل كونتينەنتتەگى ءرولىن كۇشەيتۋگە سەرپىن بەرۋ كەرەك»، - دەپ اتاپ وتەدى نۇرسۇلتان نازارباەۆ.

Abai.kz

11 پىكىر