تاجىك ءدىن قىزمەتكەرلەرى اسكەردە قىزمەت ەتۋ الەۋمەتتىك جاعدايىنا قاراماستان، ءاربىر دەنى ساۋ مۇسىلماننىڭ پارىزى دەپ ەسەپتەيدى. وتانىنا دەگەن ماحاببات، ۇلتىنا، مادەنيەتىنە دەگەن ادالدىق - ناعىز سەنىم دەگەن وسى دەپ مالىمدەدى تاجىكستاننىڭ ۇلەمدەر كەڭەسى.

ولار ەلدە اسكەرگە شاقىرۋ ناۋقانى ءجۇرىپ جاتقان كەزدە ءدال وسىنداي ۇندەۋ جاريالادى. «جاس جىگىت اسكەرگە بارماۋدىڭ امالىن جاساپ، ءوزىن اۋرۋ ەتىپ كورسەتكىسى كەلسە، بۇل – ناعىز كۇنا»، – دەيدى يسلام ورتالىعى وكىلى جاموليددين حومۋشي. ونىڭ پىكىرىنشە، ءدىني تۇرعىدان ولار وتانىن ساتقاندار بولىپ ەسەپتەلمەك.

سوڭعى ءتورت جىلدان بەرى اسكەرگە شاقىرۋ جوسپارى كەزەكتەن تىس جۇرگىزىلىپ كەلەدى. بيلىك مۇنى «جاستاردى تاربيەلەۋدىڭ ءبىر ءتۇرى» دەپ ەسەپتەيدى. بىراق قۇقىق قورعاۋشىلار ونىڭ باسقا دا سەبەپتەرى بارىن ايتادى.

ءپاتۋا – ءمۇفتي نە يسلام كەڭەسىنىڭ مۇسىلماندار ءومىرىنىڭ كەيبىر اسپەكتىلەرىنە قاتىستى شەشىم شىعارۋى. بىراق مۇنىڭ زاڭدىق كۇشى جوق. ول ءۇشىن جاۋاپقا تارتىلمايدى. تاجىكستان حالقىنىڭ دەنى مۇسىلمان بولعانىمەن، زايىرلى قوعام بولىپ ەسەپتەلەدى.

Abai.kz