قر پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەنىن انىقتايتىن لينگۆيستيكالىق كوميسسيا توراعاسى مىرزاتاي جولداسبەكوۆ «Nur Otan» پارتياسىنىڭ اتىنان كانديدات قاسىم-جومارت توقاەۆتىڭ ەمتيحان ناتيجەسىن جاريا ەتتى، دەپ حابارلايدى قازاقپارات تىلشىسى.

«وزدەرىڭىز بىلەسىزدەر، «Nur Otan» پارتياسى ۇسىنعان ۇمىتكەر قاسىم-جومارت كەمەلۇلى توقاەۆ بۇگىن كەلىپ ەمتيحان تاپسىردى. ەكى ساعاتتىڭ دەڭگەيىندە ءبىزدىڭ ورتامىزدا بولدى. ەرەجەگە سايكەس ەمتيحان تاپسىردى. ءبىرىنشى جازبا جۇمىسىنىڭ تاقىرىبى - «اباي قۇنانبايۇلىنىڭ پوەزياسى مەن قارا سوزدەرى». ەكىنشى ءماتىن وقۋعا شەرحان مۇرتازانىڭ «مىڭبۇلاق» اڭگىمەلەر مەن حيكاياتتار  جيناعىن تاڭداپ الدى. ءۇشىنشىسى ول كىسىنىڭ جانىنا جاقىن «قازىرگى قازاقستاننىڭ گەوساياساتى» تاقىرىبى بولدى»، - دەدى مىرزاتاي جولداسبەكوۆ.ونىڭ ايتۋىنشا، پرەزيدەنتتىككە ۇمىتكەردەن ەمتيحان الۋعا كوميسسيانىڭ مۇشەلەرى تولىق قاتىسىپ، وزدەرىنىڭ پىكىرلەرىن اشىق ايتقان.

«ءبىر دە ءبىر قاتە كورگەنىمىز جوق. وتكەن جولعى پرەزيدەنتىمىز دە وسىلاي جازعان ەدى. بىرىنشى شىعارما جازعاندا ابايدىڭ پوەزياسى، قارا سوزدەرى، ونىڭ جالپى حالىققا بەرەتىن ماڭىزى تۋرالى بۇگىنگى ۇمىتكەرىمىز تەرەڭ تولعاعان. وتە ادەمى جۇمىس. شەرحان مۇرتازانىڭ «مىڭبۇلاق» اڭگىمەلەر مەن حيكاياتتار  جيناعىنىڭ ءۇش بەتىن وقىدى. مانەرلەپ، ىرعاعىمەن وتە ادەمى وقىپ بەردى. ال «قازىرگى قازاقستاننىڭ گەوساياساتى» جايىندا كەڭ تولعادى، تەرەڭ سويلەدى. جالپى ءبىزدىڭ لينگۆيستيكالىق كوميسسيانىڭ بەرگەن قورىتىندىسى قاسىم-جومارت كەمەلۇلى توقاەۆ مەملەكەتتىك ءتىلدى تولىق، جان-جاقتى مەڭگەرگەن»، - دەدى كوميسسيا توراعاسى.

Abai.kz