ءساۋىردىڭ 21-جۇلدىزىنا جوسپارلانعان "الماتى مارافوننىڭ" سوڭى سوتپەن اياقتالدى. ازاماتتىق بەلسەندىلەر الماتى قالاسى ءال-فارابي جانە شاشكين كوشەلەرىنىڭ قيىلىسىندا "وت پراۆدى نە ۋبەجيش، #adilsailayushin, #ۋمەنياەستۆىبور" دەگەن جازۋى بار پلاكاتپەن ۇستالىپ، قاماۋعا الىندى. قۇقىعىن تالاپ ەتكەننىڭ ءبارى قىلمىسكەر مە، الدە سايلاۋ جايلى جاق اشپاۋ كەرەك پە؟ مۇمكىن، زاڭ بۇزۋشىلىق سايلاۋعا قاتىستى ەمەس بولار...

جەرگىلىكتى پوليتسيا قىزمەتكەرلەرى كوشە بويىندا پلاكات ۇستاعان 4 بەلسەندىنى قاماۋعا الدى. پلاكاتتاعى جازۋلار جاقىن ۋاقىتقا جوسپارلانعان پرەزيدەنتىك سايلاۋعا قاتىستى جازىلعان. ال پوليتسەيلەردىڭ ايتۋىنشا، بەلسەندىلەر ءتيىستى قۇجاتتارىن كورسەتۋدەن باس تارتقان. جەدەل ارادا بوستاندىق اۋدانىنىڭ سوت باسقارماسىنا جەتكىزىلگەن بەلسەندىلەر قاتارىندا Almaty Urban Air ەكولوگيالىق جوباسىنىڭ اۆتورى ءاسيا تولەسوۆا، سۋرەتشى سۇيىنبيكە سۇلەيمەنوۆا، كينووپەراتور ايگۇل نۇربولاتوۆا مەن بەيبارىس تولىمبەكوۆ بولعان.

ءاسيا تولەسوۆا مەن بەيبارىس تولىمباەۆقا قاتىستى سوت ءىسى  قر اكىمشىلىك قۇقىق بۇزۋشىلىق كودەكسىنىڭ 488-بابى، 3-تارماعى بويىنشا جۇرگىزىلىپ، شەشىم بويىنشا 15 كۇنگە قاماۋعا الىنعان. ىشكى ىستەر ءمينيسترى ەرلان تۇرعىمباەۆ باسشىلىقتىڭ وتىرىسىندا بەيبارىس تولىمباەۆ پەن ءاسيا تولەسوۆانى "ميتينگتەر، وقيعالار مەن دەمونستراتسيالار وتكىزۋ تۋرالى" زاڭنامانى بۇزدى دەپ حابارلاعان. ال پوليتسەيلەر بولعان وقيعانىڭ سەبەبىن بىلاي دەپ تۇسىندىرەدى:

- جول ايرىعىنا جۇگىرىپ شىعىپ، الگىلەردى سۋرەتكە تۇسىرمەك بولعان ادامدار قوزعالىسقا كەدەرگى كەلتىردى: سوڭى قايعىلى جاعدايمەن اياقتالاتىن ايقاي-شۋ تۋىنداۋى مۇمكىن ەدى. وعان قوسا، بۇل مارافون قاتىسۋشىلارىنا دەگەن قۇرمەتسىزدىك ەكەندىگى كوزگە كورىنىپ-اق تۇر.

"ساياسي ۇگىتتەۋلەر بولعان جوق. سايلاۋدىڭ نە قاتىسى بار؟! تاعى دا ايتامىن، قالادا سپورتتىق ءىس-شارا جۇرگىزىلدى، ول الدىن-الا جوسپارلانعان بولاتىن. قالا اۋماعىنا افيشالار ءىلىندى، 17 مىڭ سپورتشى قاتىسىپ جاتتى جانە سول ۋاقىتتا ەكى ادام پلاكات ۇستاپ، سپورتتىق شارانىڭ جۇرگىزىلۋىنە كەدەرگى كەلتىردى. بۇل زاڭ بۇزۋشىلىق بولماعاندا، نەمەنە؟", - دەپ نارازىلىق ءبىلدىردى ءىىم ەرلان تۇرعىمباەۆ. دەگەنمەن، 1000-عا جۋىق پلاكاتى بار ادامداردىڭ اراسىنان ءدال وسى جازۋمەن ۇستالعانداردىڭ ايتار ارىزى مۇنىمەن بىتكەن جوق.

تاعى ءبىر كۇماندى جايت، وسىعان دەيىنگى قىلمىستىق ءىستىڭ اكىمشىلىك حاتتاماسىندا پلاكاتتا "ۇلت باسشىسى - ۇلتتى ۇياتقا قالدىرۋشى" دەپ جازىلعانى كورسەتىلگەن. بەلسەندىلەردىڭ ادۆوكاتى اسەم جاپيشەۆا ءوزىنىڭ Facebook-تاعى پاراقشاسىندا ەرلان تۇرعىمباەۆتان حاتتاماداعى جازۋدىڭ سەبەبىن سۇراعاندا، ونىڭ "تەحنيكالىق قاتەلىك" دەپ جاۋاپ بەرگەنىن جاريالاعان.

بەلسەندىلەردىڭ تۇتقىندالۋى مەن قاماۋعا الىنۋى تۋرالى حابارلاما ءدۇيىم جۇرتتى دۇرلىكتىرىپ، جەلىلەردى شۋلاتۋدا. ءبىز كۇنى بار، ۇمىتكەرى جوق سايلاۋدىڭ ءادىل ءوتۋىن سۇراپ، قاماۋعا الىنعانداردىڭ جان ايقايىن تىڭداۋشىلار ءالى دە بار دەگەن سەنىمدەمىز.

شىنار تولەۋحان

Abai.kz