بۇگىن قر مەملەكەت جانە ساياسات قايراتكەرى، سەناتتىڭ حالىقارالىق قاتىناستار، قورعانىس كوميتەتىنىڭ باسشىسى مۇحتار قۇل-مۇحاممەدتىڭ اكەسى ابرار اكەتايۇلى قۇل-مۇحامەد توقساننان اسقان شاعىندا ومىردەن ءوتتى. ون پەرزەنت تاربيەلەپ تۇتاس ءبىر اۋلەتتىڭ اكەسى اتانعان ابرار اكەتايۇلى ۇرپاعىنا «الىپپەدەن» بۇرىن قاسيەتتى «قۇراننىڭ» اياتتارىن ۇيرەتكەن قازىنالى قاريا ەدى.

اتا-بابا ەسىمدەرىن جاتتاتقىزىپ، حالىق ادەبيەتىنىڭ مول مۇراسىمەن سۋسىنداتقان اكەنىڭ تاربيەسىن كورگەن ۇل مەن قىز بۇگىندە قوعامنىڭ ءار سالاسىندا ەل ءۇشىن قىزمەت ەتىپ كەلەدى. اكەسى تۋرالى مۇحتار ابرارۇلى:

"اكەمنىڭ ابايشىلدىعىنا ارنايى توقتالماسام بولماس. اتامەكەنگە ورالعان 1961  جىلى مۇحتار اۋەزوۆتىڭ باسشىلىعىمەن، ءا.جيرەنشيننىڭ قۇراستىرۋىمەن ابايدىڭ قالىڭ ءبىر تومدىعى شىعىپتى. اكەي وسىنى قولىنان، جاستىعىنىڭ استىنان تاستاعان ەمەس. سان مارتەبە قايىرا، تامسانا وقىپ: «جارىقتىق ابايدان بار سۇراعىنا جاۋاپ تاباسىڭ. وسىنشاما دانىشپاندىق ءبىر ادامعا قالاي عانا ءبىتتى ەكەن!»، – دەپ تامسانىپ وتىراتىن.  م.اۋەزوۆتىڭ «اباي جولى» جونىندە: «اباي تۋرالى جازعاندا مۇحاڭنىڭ قالامىن دانىشپاننىڭ ارۋاعى جەتەلەپ وتىرعان عوي. ايتپەسە مۇنداي عاجايىپ كىتاپ دۇنيەگە كەلەر مە ەدى»، – دەگەن ءسوزىن دە تالاي ەستىدىم.

ورتا مەكتەپتى ءبىتىرىپ، الماتىعا وقۋعا اتتانعاندا، ماعان ءوزىنىڭ تەرى ءسىڭىپ، قولىنىڭ تابى قالعان سول ابايدىڭ ءبىر تومدىعىن ۇستاتىپ: «قىسىلساڭ دا، قينالساڭ دا، وسسەڭ دە، وركەندەسەڭ دە بار سۇراقتى وسى كىتاپتان تاباسىڭ»، – دەگەنى ءالى كۇنگە دەيىن ەسىمدە. سولاي بولدى دا،- دەپ جازادى.

ءبىز مۇحتار قۇل-مۇحامەد مىرزانىڭ قايعىسىنا ورتاقتاسىپ، كوڭىل ايتامىز!

Abai.kz