دۇيسەنبى, 19 تامىز 2019
بيلىك 1171 0 پىكىر 13 مامىر, 2019 ساعات 15:20

نازارباەۆ اقش-تىڭ قازاقستانداعى توتەنشە جانە وكىلەتتى ەلشىسىن قابىلدادى

نۇرسۇلتان نازارباەۆ امەريكا قۇراما شتاتتارىنىڭ قازاقستانداعى توتەنشە جانە وكىلەتتى ەلشىسى ۋيليام موزەردى قابىلدادى.

ەلباسى نۇرسۇلتان نازارباەۆ ۋيليام موزەردى قازاقستانداعى ديپلوماتيالىق ميسسياسىنىڭ باستالۋىمەن قۇتتىقتاپ، جاۋاپتى قىزمەتىنىڭ تابىستى بولۋىنا نيەتتەستىك ءبىلدىردى.

– وسى جىلدار ىشىندە ءبىز اقش-پەن ءوزارا تۇسىنىستىككە جانە دوستىققا نەگىزدەلگەن قاتىناستار ورناتتىق. قازاقستانعا اقش-تان قوماقتى ينۆەستيتسيا كەلدى. 420 بىرلەسكەن كاسىپورىن جۇمىس ىستەپ كەلەدى. مەنىڭ ۆاشينگتونعا جاساعان بىلتىرعى ساپارىم، سونىڭ اياسىندا پرەزيدەنت دونالد ترامپپەن جانە بيزنەسمەندەرمەن بولعان كەزدەسۋىم ىنتىماقتاستىعىمىزدى ودان ءارى دامىتۋعا جاعداي جاسادى، – دەدى قازاقستاننىڭ تۇڭعىش پرەزيدەنتى.

ۋيليام موزەر قازاقستانعا العاش رەت كەلگەندەگى اسەرى تۋرالى ايتتى. اقش ەلشىسى ەلوردامىز – نۇر-سۇلتان قالاسىن سالۋ جانە تانىتۋ ىسىندەگى ايتارلىقتاي ناتيجەگە قىسقا ۋاقىت ىشىندە قول جەتكىزىلگەنىن اتاپ ءوتتى.

سونىمەن قاتار، اقش ەلشىسى ۋ.موزەر نۇرسۇلتان نازارباەۆقا دونالد ترامپتىڭ حاتىن بەردى. وندا اقش پرەزيدەنتى ەلباسىنىڭ ءوز وكىلەتتىگىن توقتاتۋ جانە مەملەكەت باسقارۋ ءىسىن ساياساتكەرلەردىڭ جاڭا بۋىنىنا بەرۋ تۋرالى شەشىمىنە قولداۋ بىلدىرەدى.

– مەن پرەزيدەنت ترامپتىڭ حاتىن الدىم. ول ءبىزدىڭ وڭىردەگى احۋال تۋرالى الداعى ۋاقىتتا دا مەنىمەن كەزدەسىپ، اقىلداسىپ وتىرۋعا نيەتتى ەكەنىن جەتكىزدى. دونالد ترامپپەن جاقسى قارىم-قاتىناس ورنادى. مەن وسىنداي بايلانىستا بولۋعا دايىنمىن. ءبىز ءۇشىن اقش ماڭىزدى سەرىكتەس سانالادى. وسى جىلدار ىشىندە ارامىزدا تەك دوستىق قاتىناستار بولدى. ىنتىماقتاستىعىمىز جالعاسا بەرەدى دەپ سەنەمىن، – دەدى نۇرسۇلتان نازارباەۆ.

قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ
ءباسپاسوز قىزمەتى 

Abai.kz

0 پىكىر