قىزىلوردا وبلىسى جالاعاش اۋدانىنا اۋداندىق اۋرۋحانانىڭ عيماراتى سالىنادى، - دەپ حابارلايدى اباي-اقپارات.

بۇل تۋرالى وبلىس اكىمى قىرىمبەك كوشەرباەۆتىڭ اتالعان اۋدانعا بارعان ساپارى بارىسىندا ءمالىم بولدى.

قىرىمبەك كوشەرباەۆ، قىزىلوردا وبلىسىنىڭ اكىمى:

- كەشە وبلىسىمىزعا مەملەكەتىمىزدىڭ پرەزيدەنتى قاسىم-جومارت كەمەلۇلى توقاەۆ ارنايى جۇمىس ساپارى كەلگەنىن ءبارىڭىز بىلەسىزدەر. قاسىمجومارت كەمەلۇلى سىر بويى قازاقستاننىڭ ءال-اۋقاتى ەسەلەپ، حالقىمىزدىڭ باق-بەرەكەسىن ارتتىرىپ وتىرعان ءوڭىر ەكەنىن اتاپ ايتتى. سونداي-اق، مەملەكەت باسشىسى قىزىلوردا وبلىسىنداعى يندۋستريالاندىرۋ، قۇرىلىس جۇمىستارىنا جانە كاسىپكەرلىك سالاعا ءوزىنىڭ وڭ باعاسىن بەردى. بۇل باعالاۋ بارشا جۇرتقا ورتاق. مۇندا سىزدەردىڭ وسى ولكەنى دامىتۋعا قوسقان ولشەۋسىز ۇلەستەرىڭىز بار.  ءبىز مىنە، بۇگىن جالاعاش اۋدانىندا حالىققا ساپالى مەديتسينالىق قىزمەت كورسەتەتىن 100 ورىندىق جاڭا اۋرۋحانا قۇرىلىسىن سالۋدى باستادىق. اۋداندارىڭىزدا جاڭا تيپتەگى، زاماناۋي قۇرالدارمەن جابدىقتالعان اۋرۋحانا سالۋ ەڭ وزەكتى ماسەلەلەردىڭ ءبىرى ەدى. ءبىز سول ماسەلەنى شەشۋگە مۇمكىندىك الىپ وتىرمىز.

وبلىس باسشىسى ءوز قولىمەن اۋرۋحانا ىرگەتاسىن قالاسىپ، جالاعاشتىقتاردى وسى ۇلكەن قۋانىشپەن قۇتتىقتادى. جالاعاش اۋدانى حالقىنىڭ باستى ماسەلەلەرىنىڭ ءبىرى وڭ شەشىلگەنىنە ريزا بولعان دەنساۋلىق ساقتاۋ سالاسىنىڭ ارداگەرى ساحي قالىباەۆ وبلىس اكىمىنە العىسىن ايتتى.

ەستەرىڭىزگە سالا كەتەيىك، بۇل اۋرۋحانا قۇرىلىسىن پايدالانۋعا بەرۋ مەرزىمى 2020 جىلعا جوسپارلانعان. سونداي-اق، سوڭعى ەكى جىلدا قىزىلوردا وبلىسىندا اۋىلدىق ەمحانا مەن دارىگەرلىك امبۋلاتوريا سەكىلدى 24 دەنساۋلىق ساقتاۋ نىسانى اشىلعان. ول نىسانداردىڭ ءبارى دە سوڭعى تەحنيكالارمەن جابدىقتالعان.

داۋرەن سەيىتجانۇلى

Abai.kz