الداعى سايلاۋ دۇرىس وتەتىن بولسا، ونى شىن مانىندە قازاقستاننىڭ قوعامى مويىنداسا وندا بۇل قوعامنىڭ، ەلدىڭ بىرلىگىن پاش ەتە الاتىن جاعداي. بۇل تۋرالى ساياساتتانۋشى ايدوس سارىم الماتىدا وتكەن ساراپتامالىق وتىرىستا ايتتى.

ونىڭ ايتۋىنشا، بيىلعى سايلاۋ وزگەشە، ويتكەنى 2005-2006 جىلدان بەرى ەشبىر دەموكراتيالىق كۇشتەردىڭ، ۇلتتىق كۇشتەردىڭ وكىلدەرى سايلاۋعا جىبەرىلگەن جوق.

«قازىر جاعداي وزگەشە، جەتى كانديدات ۇسىنىلىپ وتىر. مۇنىڭ ءوزى دە - ۇلكەن جاڭالىق. ءبىر ايەل ادام شىعىپ جاتىر، بۇل دا - قازاقستان تاريحىندا بولماعان جاڭالىق. ەلدىڭ بولاشاعى تۇرعىسىنان قارايتىن بولساق، قىز-كەلىنشەكتەر ءۇشىن جاقسى مۇمكىندىك»، - دەيدى ول. 

سونىمەن قاتار اينالامىزدا ءارتۇرلى دارەجەدەگى وقيعالار بولىپ جاتقانىن ايتا كەلە، بىرەۋلەر ۋكراينانى ايتىپ زەلەنسكيمەن سالىستىرىپ جاتقانىن، ەندى ءبىرى ارمەنياداعى پوشەنياندى مىسال ەتىپ جاتقانىن جەتكىزدى.

«جالپى ليبەريليزاتسيانىڭ ارتىقشىلىعىمەن قاتار قاۋىپ-قاتەرلەرى دە بولادى. ماسەلەن ەلەستەتىپ كورىڭىزشى، كىشكەنتاي قاپىرىق بولمەدە وتىرسىز دەيىك، وندا بىرەۋ تەمەكى شەگىپ وتىر، تاعى بىرەۋى تاماق ءپىسىرىپ وتىر، ەندى ءبىرى قورىلداپ ۇيىقتاپ جاتىر. ىشىندە تىنىس الۋ مۇمكىن بولماي قالعاندا بىرەۋ كەلدى دە كىشكەنتاي تەرەزەنى اشىپ قالدى، ءبارى توپىرلاپ تەرەزەگە قاراي جۇگىردى. سونداي ەففەكت بولماۋ كەرەك»، - دەيدى ايدوس سارىم.

ساياساتتانۋشىنىڭ پايىمداۋىنشا،  قازىر بيلىك بەلگىلى ءبىر دارەجەدە ليبەريليزاتسياعا بارىپ جاتىر. جۇرت تا، قوعام دا بيلىكتىڭ پارمەنى قاشانعا دەيىن جەتەدى ەكەن، ءبىزدىڭ ەركىندىگىمىز قاي جەرگە دەيىن بارادى ەكەن دەپ تەكسەرگىسى كەلەدى. ەكىنشى جاعىنان بۇل جەردە قاۋىپ-قاتەردە بار كورىنەدى.

«مىسالى، بىرەۋلەردىڭ ساندىراعىنا ىلەسىپ، باسقا دا جاعدايلارعا بارىپ جاتساق بۇل قياناتقا اپارا ما، اپارماي ما دەگەن سۇراق تۋىندايدى. بۇل - بيلىكتىڭ وزىنە دە ۇلكەن تىرەۋ. مىسالى جەلتوقسان وقيعاسى الايىق. كەزىندە سوۆەت وداعىنىڭ بيلىگى «بىزدە بەتبۇرىس باستالدى، جەڭىلدىكتەر بولادى» دەدى. سوعان قازاق جاستارى شىنىمەن يلاندى. ونىڭ ارتى قاندى وقيعاعا الىپ كەلدى.  ابدەن قورقىپ، بۇرىنعى داستۇردەن  شىعا الماعان  رەجيم اينالىپ كەلىپ ونى قانعا بوكتىردى. ءبىر جاعىنان وسىنداي ماسەلەلەردەن ساقتانۋىمىز كەرەك. سوندىقتان قانداي شارا بولسىن ءبارىن بايىبىمەن، ەسىمىزدى ساقتاي وتىرىپ، جان-جاعىمىزعا قاراپ وتكىزگەن دۇرىس»، - دەيدى ول. 

سونداي-اق، ول 19 ناۋرىز ۇلكەن وزگەرىستەردى الىپ كەلگەنىن، ۇمىتتەر پايدا بولعانىن ايتتى.

«ەشكىم ويلاماعان جەردەن بيلىكتىڭ ءترانزيتى باستالىپ كەتتى. بۇل - بيلىكتىڭ ءترانزيتى. سوسىن Nur Otan پارتياسىنىڭ سەزى ءوتتى، بيلىك ءوزىنىڭ كانديداتۋراسىن ءبىراۋىزدان ۇسىندى، ەشقانداي تالاس بولعان جوق. ياعني بيلىك ءوزىنىڭ ءبىر ەكەنىن دالەلدەي الدى. ەندى 9 ماۋسىمنان كۇتەتىن ماسەلە وتە كوپ. ول كەزدە سايلاۋ دۇرىس وتەتىن بولسا، ونى شىن مانىندە قازاقستاننىڭ قوعامى مويىنداسا. بۇل بۇرىنعى سايلاۋدان وزگەشە، راسىمەن دە وزگەرىستەر بولادى ەكەن دەگەن پايىم بولسا، سايلاۋعا تۇسكەن كانديداتتار «ءبىز بارىنشا جۇمىس ىستەدىك، العان داۋىس وزىمىزدىكى، ءبىزدىڭ داۋىس  ەش ۇرلانعان جوق» دەسە، بيلىك بۇرىنعىداي 90% ەمەس، ءوزىنىڭ كوپشىل داۋىسىنا يە بولىپ جاتسا، وندا بۇل قوعامنىڭ، ەلدىڭ بىرلىگىن پاش ەتە الادى»، - دەيدى ول.