دۇيسەنبى, 17 ماۋسىم 2019
46 - ءسوز 1259 3 پىكىر 22 مامىر, 2019 ساعات 10:07

جاستار سايلاۋعا ۇلەسىن قالاي قوسادى؟

2019 جىل – «جاستار جىلى»، «سايلاۋ جىلى»، «وزگەرىستەر جىلى» بولىپ بىرنەشە تىرناقشالى اتاۋعا يە بولدى. سونىمەن، جاستار دەگەن بۋىن وكىلىنەن وسى جىلى قانداي وزگەرىستەر مەن جاڭاشىلدىق كۇتۋگە بولادى؟ جالپى وسكەلەڭ ۇرپاق سايلاۋعا ۇلەسىن قالاي قوسادى؟

تاڭداۋ ءار ادامنىڭ ءوز ەركىندە. كىمدى پرەزيدەنت رەتىندە كورگىڭىز كەلەدى، سوعان داۋىس بەرىڭىز (ارينە اقىلمەن شەشۋ ماڭىزدى).

ءححى عاسىردىڭ عىلىم مەن تەحنولوگياسىن مەڭگەرىپ كەلە جاتقان جاستار، سىزدەرگە ايتارىم مىناۋ:

- قاي كانديداتتى قولدايسىز، كىمگە داۋىس بەرەسىز ول ءسىز ءۇشىن جانە ءبىز ءۇشىن ماڭىزدى;
- بەلگىلى ءبىر كانديداتتى قولداۋعا ۇلەس قوسامىن دەگەن ەكەنسىز، ەگەر SMM, PR مامانى بولساڭىز، جان-جاقتى ۇگىت-ناسيحات جۇمىسىن جاساڭىز;
- فوتو، ۆيدەو سەكىلدى تەحنولوگيانىڭ ەڭ وزىق باعدارلامالارىن يگەرگەن بولساڭىز، جارناماسى مەن سيۋجەتى قاتقان روليكتەر دايىنداڭىز;
- اقىن نە جازۋشى بولساڭىزدار، شاعىن وقيعالى اڭگىمە نە ولەڭ جازىڭىزدار. جۇرت قىزىعىپ وقىپ، اڭگىمە ارقىلى تۇسىنە بەرسىن;
- ءانشى نە كومپوزيتور بولساڭىزدار، اۋەنى كەلىسكەن كەرەمەت دۇنيە جاساڭىزدار;
- ۆاينەر، بلوگەر بولساڭىزدار، حالىقتىڭ جىرتىق جەرىن مازاقتاۋدان ىسكە كوشىڭىزدەر. تانىمدى ءارى ءازىلى ارالاس ۆاين دايىنداڭىزدار;
- تارگەتينگ جاساپ، قولدان تۇسپەيتىن تەلەفوندارىڭىزدى وسى جولى ءبىر ىسكە جاراتىڭىزدار;
- زاڭ سالاسىندا جۇرگەن جاستار، ايداعاننىڭ ايتاعىنا كەتپەي، ءوز قۇقىقتارىڭىزدى ەندى كورسەتىڭىزدەر. تالاپ ەتىڭىزدەر;
- جوو-دا ساياساتتانۋ ماماندىعىن ءبىتىرىپ جاتقان جاستار، ساياسي باعا بەرىپ، ساراپتاما جاساپ، جان-جاقتى ات سالىسىڭىزدار;

قورىتا كەلگەن كەزدە، ءادىل سايلاۋ ءوتۋ ءۇشىن، شەتەلدە تاجىريبە الماسىپ كەلگەن بىلىمدەرىڭىزدى پايداعا اسىرىپ، مىنا جۇرتقا بار ەكەندەرىڭىزدى كورسەتىڭىزدەر.

«جاستار جىلى» جاستاردان قايىر بولعان جوق، ولار دا سول بيلىكتىڭ قولشوقپارى دەگەن حالىق نازى، ءوزى ءبىر رەت بەرىلگەن ماڭگى كوكتەمگە اينالعان جىلدىڭ ماڭدايىنا قارا تاڭبا بوپ باسىلماسىن.

وسى سايلاۋدان كەيىن، سول بيىك ورىندارعا بارىپ اقىل ايتاتىن، كەڭەسشى بولاتىن، جۇمىس جاسايتىن سىزدەرسىزدەر. سوندىقتان «ديۆان باتىر» بولساق تا، اقپارات سوعىسى دەگەن قوعامدا، اقپاراتتىڭ اعىنىن دا، باعىتىن دا وزگەرتىپ جىبەرۋگە شامامىز جەتەدى. بۇل ارەكەت جەڭىسكە الىپ بارسا «ديۆان باتىر» دەگەندەردىڭ دە اۋزىن جابامىز.

ءبىز ءالى جاس ەمەسپىز، ءبىز باس بولاتىن قوعامعا كەلدىك. وتىز جىل تەربەتىلگەن بەسىكتەن نە ۇيرەندىك، نە بىلدىك، نە تانىدىق كورسەتەيىك.

مارعۇلان اقاننىڭ facebook پاراقشاسىنان

Abai.kz

3 پىكىر