قازاقستان رەسپۋبليكاسى
«وتانداستار قورى» كەاق
پرەزيدەنتى ابىقاەۆ نۇرتاي ابىقايۇلىنا
وزبەكستان رەسپۋبليكاسى
تاشكەنت وبلىسى شىرشىق قالاسى
قازاق مادەني ورتالىعى توراعاسى
جورىقباەۆ جاقسىلىق وكىمتايۇلىنان

قۇرمەتتى نۇرتاي ابىقايۇلى

وزبەكستان قازاق مادەني ورتالىعى قازاقستان مەن وزبەكستان حالىقتارى اراسىنداعى دوستىقتى، مادەني جانە ادەبي بايلانىستاردى نىعايتۋ، مەملەكەتتەر اراسىنداعى ەكونوميكالىق ىنتىماقتاستىقتى جانە دە تەرەڭدەتۋ باستاماسىن قولداپ-قۋاتتاپ ەكى ەل پرەزيدەنتتەرى جارلىقتارى جانە ۇكىمەتتەر قاۋلىلارىندا بەلگىلەنگەن مىندەت جانە تاپسىرمالاردى ورىنداۋ ماسەلەلەرىندە جان-جاقتى جۇمىس اتقارىپ كەلەدى.

وزبەكستان قازاق ۇلتتىق مادەني ورتالىعى 1992 جىلدان باستاپ رەسمي تۇردە جۇمىس اتقارىپ كەلەدى. وسى جىلدار ارالىعىندا ورتالىق ۇلتتىق قۇندىلىقتارىمىزدى ناسيحاتتاۋعا جانە حالىقتار دوستىعىن نىعايتۋعا ارنالعان كوپتەگەن مادەني ءىس شارالاردى وتكىزدى.

وتكەن 2018 جىلى وزبەكستان پرەزيدەنتى شاۆكات ميرومانوۆيچ ميرزيەەۆ وزبەكستاندا قازاقتىڭ ۇلى ويشىل، عۇلاما اقىنى اباي قۇنانباەۆتىڭ شىعارماشىلىعىن ۇيرەتۋ جانە حالىق اراسىندا ناسيحاتتاۋ تۋراسىندا قاۋلى قابىلدادى. سول قاۋلى اياسىندا مەن شىرشىق قالاسىندا رەسپۋبليكادا ءبىرىنشى بولىپ اباي اتامىزعا ارنالعان كونفەرەنتسيا وتكىزدىم، جانە كونفەرەنتسيا سوڭىندا اباي ولەڭدەرىن وقىپ، اندەرىن ايتتىق. «كونفەرەنتسيا وتە جوعارى دەنگەيدە ءوتتى»- دەدى كەلگەندەر. كونفەرەنتسياعا وزبەكستانعا تانىمال ابايتانۋشى جازۋشىلار مەن اقىندار قاتىستى.

ءبىز سول كونتسەرتكە دايىندالۋ بارىسىندا كوپ قىيىندىققا تاپ بولدىق، دايىندالۋعا ورىن تابىلماي. سودان مەن شىرشىق قالاسىندا قازاق مادەني ورتالىعى قۇرىلىسىن باستاۋعا نيەت قىلدىم. جانە دە بۇل قۇرىلىستى باستاۋعا ۇلكەن سەبەپ بولعان، وزبەكستان رەسپۋبليكاسى پرەزيدەنتى شاۆكات ميرومانوۆيچ ميرزيەەۆ پەن قازاقستان رەسپۋبليكاسى پرەزيدەنتى نۇرسۇلتان ءابىشۇلى نازارباەۆتىڭ 2018 جىل ناۋرىز ايىندا قازاقستاننىڭ ەلورداسى استانادا كەزدەسىپ، 2018 جىل قازاقستاندا «وزبەكستان جىلى»، ال 2019 جىل وزبەكستاندا «قازاقستان جىلى» بولادى دەگەن كەلىسىمى سەبەپ بولدى. وسىنداي يگى ىسكە مەندە ءوز ۇلەسىمدى قوسايىن دەدىم.

سونىمەن 2018 جىل مامىر ايىندا شىرشىق قالاسىندا قازاق مادەني ورتالىعى قۇرىلىسىن باستادىم. بۇگىنگى كۇنگە قۇرىلىس جۇمىستارىنىڭ 75% پايىزى ورىندالدى. وسى قۇرىلىس جۇمىستارىنىڭ بارلىعىن مەن ءوز قاراجاتىما اتقاردىم. قاراجاتىم بىتكەننەن كەيىن قازىر قۇرىلىس جۇمىستارى توقتاپ تۇر.

شىرشىق قالاسىندا 17 000, جوعارى شىرشىق اۋدانىندا 75 000, بوستاندىق اۋدانىندا 45 000, قىبىراي اۋدانىندا 30 000 قازاق حالقى تۇرىپ جاتىر. بۇل اۋدانداردىڭ بارلىعى شىرشىق قالاسىنا ىرگەلەس جاتقان اۋداندار.

مەنىڭ وسى قۇرىلىسىم بىتكەننەن كەيىن بۇل مادەني ورتالىق تەك قانا شىرشىق قالاسىنا ەمەس جوعارىدا اتالعان اۋداندارداعى مولشەرمەن 160 000-نان استام قازاق حالقىنا قىزمەت كورسەتەدى. بۇل شىرشىق قالاسىندا قۇرىلىپ جاتقان قازاق مادەني ورتالىعى كۇردەلى ساياسي قۇرىلىس بولايىن دەپ تۇر. بۇنداي قۇرىلىس وزبەكستان رەسپۋبليكاسى قازاق مادەني ورتالىعى تاريحىندا ءالى بولماگان.

ءبىزدىڭ  مادەني ورتالىقتا 20 ءىس ورنى اشىلادى دەپ جوسپارلانىپ وتىر. ءوزىمىزدىڭ فولكلورلىق، ەسترادالىق انسامبلدەرىمىز بولادى. سونىمەن قاتار، بي توبىن ۇيىمداستىرامىز، قازاق ورنەكتەرىمەن تىگىلەتىن تىگىن تسەحىمىز بولادى. وندا قازاق ۇلتتىق كيىمدەرىن تىگەمىز، كىشىگىرىم مۋزەيىمىز دە بولادى. قازاق ۇلتتىق تاعامدارىن دايىندايتىن اسحانامىز بولادى جانە كونتسەرت، كونفەرەنتسيا وتكىزەتىن كىشىرەك زال بولادى دەگەن جاقسى نيەتتەمىز.

پروەكت بويىنشا 1 567 000 000 ء(بىر ميلليارد بەسجۇز الپىس جەتى ميلليون) سومعا بۇل قۇرىلىس ەسەپتەلگەن. ال قازىرگە دەيىن 75% پايىز قۇرىلىس جۇمىستارىنىڭ ورىندالعانىن الىپ تاستاعاندا تاعى 391 000 000 سوم كەرەك بولىپ تۇر. بۇنى دوللور باعامىنا شاققاندا 46 000 (قىرىق التى مىڭ) دوللور بولادى ەكەن.

اسا قادىرلى نۇرتاي ابىقايۇلى، ءسىزدىڭ بىزگە قارجىلاي كومەگىڭىز كەرەك بولىپ تۇر. بۇل ءسىزدىڭ ەكى ەل دوستىعىن نىعايتۋعا جانە وزبەكستان رەسپۋبليكاسىندا تۇرىپ جاتقان قازاق حالقىنا بەرگەن ۇلكەن جاردەمىڭىز بولار ەدى. سونىمەن قاتار، كۇنى كەشە ەكى ەل پرەزيدەنتتەرى وزبەكستان رەسپۋبليكاسىنىڭ ەلورداسى تاشكەنت قالاسىندا كەزدەسىپ وزبەكستاندا «قازاقستان جىلىن» جاريالانعان ەدى، سول دوستىق-ساياسي كەلىسىمگە دە قوسقان ۇلكەن ۇلەسىڭىز بولار ەدى.

سىزگە جوعارىدا ايتىلعان وزبەكستاندا ءومىر ءسۇرىپ جاتقان 160 000 باۋىرىڭىزدىڭ اتىنان ۇلكەن العىسىمىزدى بىلدىرەمىز.

قۇرمەتپەن: جورىقباەۆ جاقسىلىق وكىمتايۇلى

Abai.kz