جاسىراتىنى جوق، وزگە ۇلتتارعا ىقپال ەتەتىن قازاق ءتىلدى بۇقارالىق اقپارات قۇرالدارى جوقتىڭ قاسى. ءتول گازەت-جۋرنال مەن سايتتارىمىز تۇگىل، بوتەن جۇرت اراسىندا تەلەديدارىمىزدىڭ دا ءامىرى ونشا جۇرمەيدى. الايدا، كەشە رەسەيدىڭ ىشكى ىستەر مينيسترلىگى تاراپىنان ماعان كەلىپ تۇسكەن ءنومىرى 3/197706527075 حات جوعارىدا جاسالعان تۇجىرىمنىڭ شىندىعىن ءسال بولسا دا جوققا شىعاردى. قاباردا-بالكار پوليتسەيلەرىنىڭ حابارلاۋىنشا، 2019 جىلدىڭ 25 ناۋرىزىندا ولار 2019 جىلدىڭ 28 اقپانى قابىلدانعان زولسك اۋداندىق سوتى قاۋلىسى نەگىزىندە ماعان رەسەيگە كىرۋگە تىيىم سالىپتى.

ادەتتە، رەسەيدەگى اكىمشىلىك ىستەر بويىنشا ايىپپۇلدى تولەۋ، داۋلى جاعدايدى رەتتەۋ ءۇشىن ايىپكەرلەرگە 60 كۇن بەرىلەدى. مەنىڭ جاعدايىمدا قاباردا-بالكار رەسپۋبليكاسى بويىنشا ىشكى ىستەر مينيسترلىگى ءتىپتى 30 كۇندى كۇتپەي، زاڭدى مەرزىمنەن بۇرىن ماعان قارسى شەشىمدى قابىلدادى. نەگە؟ مۇنداي اسىعىستىقتىڭ سەبەبى باسقا: ءدال سول 25 ناۋرىزدا Abai.kz پورتالى رەسەيلىك زاڭسىزدىقتى اشكەرەلەيتىن «كارلى قاباردانىڭ «سالەمى» اتتى ماقالامدى جاريالادى. اشۋلانعان قاپقازدىقتار ءوز كەمشىلىكتەرىن تۇزەۋدىڭ ورنىنا، اتالعان جولسىزدىقتى ودان ءارى ءوربىتىپ جىبەردى. سايىپ كەلگەندە، ماقالام جارىق كورگەن كۇنى قاپقازدىقتار رەسەيلىك-قازاقستاندىق قاتىناستاردىڭ بەيبىت دامۋ جولىنا تاعى ءبىر بوگەت سالىپ جىبەردى.

كەيبىر ورىسشىل باۋىرلارىمىز مەنىڭ قيىنشىلىعىما ىشتەي قۋانىپ، رەسەيلىكتەردىڭ ءادىلسىز ارەكەتتەرىن قولدادى. رەسەيدەگى پوليتسەي مەملەكەتىن ءپىر تۇتاتىن اعايىندار، ورىس اۋماعىنان شەتەلگە كەتۋگە اسىققان بەيبىت ءجۋرناليستى قاماۋعا الىنعانىن ۇلگى ەتەرلىك ارەكەت دەپ سانايدى. وسىندايلارعا ايتاتىنىم: قولدارىڭىز تيسە، «نا ستراجە كسەنوفوبي ي ەكسترەميزما» ماقالامدى وقىپ شىعىڭىزدار. ونىڭ مازمۇنى، التى جىل بۇرىن «تەك قانا ورىستار ءۇشىن»، «تەك قانا سلاۆياندار ءۇشىن» سەكىلدى عالامتورداعى ۇلتشىل حابارلاندىرۋلار جونىندە ماسكەۋ قالاسى پروكۋراتۋراسىنا شاعىمداندىم. بۇنداي ەكسترەميستىك حابارلاندىرۋلاردى كىم بەرەدى، قايدا جاريالايدى انىق بولسا دا، پروكۋرورلار شاعىمىمدى پوليتسەيلەرگە جولداپ، تۇك تە بىتىرمەدى. ءالى كۇنگە دەيىن ورىس پروكۋرورى مەن پوليتسەيى تاراپىنان جاۋاپ تۇسكەن جوق.

ورىس جۋرناليستەرىنىڭ ءوزى، قاباردا-بالكار ايماعىن رەسەيدەگى پاراقورلىق پەن قىلمىستىڭ كوشباسشىسى دەپ ەسەپتەدى. ورىس زەرتتەۋشىلەرىنىڭ ءوزى، قاباردا-بالقار ايماعىن رەسەيدەگى ءومىر ءسۇرۋ دەڭگەيى ەڭ تومەنگى وڭىرلەردىڭ ساناتىنا جاتقىزادى.

بىراق، جەرگىلىكتى «ءتارتىپ» ساقشىلار مەن «ادىلەت» قىزمەتكەرلەردىڭ پىكىرى باسقاشا. زولسك اۋداندىق پوليتسياسىندا دا، زولسك اۋداندىق سوتىندا دا قۇجىناعان قىلمىسكەرلەردى كورمەدىم. كوبىنەسە، ايناعا قاراپ، ءوزىمدى عانا «تاماشالادىم». بالكىم، ماعان كەسىلگەن ۇكىم قاباردا-بالكار رەسپۋبليكاسىنىڭ شيەلەنىسكەن جاعدايىن ءبىرسىپىرا جەڭىلدەتەتىن شىعار...

دانيار ناۋرىز

Abai.kz