دۇيسەنبى, 16 قىركۇيەك 2019
اراشا 4182 4 پىكىر 3 ماۋسىم, 2019 ساعات 17:15

توعىز بالالى انا "قىرىق ەكىنشى ارىزىن" ساپارباەۆقا جولدايدى

ەڭبەك جانە حالىقتى الەۋمەتتىك قورعاۋ ءمينيسترى
بەردىبەك ساپارباەۆتىڭ نازارىنا

جاقىندا رەداكتسياعا الماتىلىق كوپبالالى انا كەلىپ كومەك سۇرادى. توعىز پەرەزەنت تاربيەلەپ وتىرعان وتباسى تۇرىپ جاتقان باسپانامىزدان ايىرىلىپ قالامىز با دەپ الاڭداۋى ەكەن. ون بالانى دۇنيەگە اكەلگەن باتىر انانىڭ ايتۋىنشا ء(بىر بالاسى شەتىنەگەن), اكىمدىك التى جىل بۇرىن بەرگەن باسپاناسىن قايتارىپ الۋى مۇمكىن كورىنەدى.

مۇحامەدجانوۆا گۇلزيرا 2009 جىلعا دەيىن جەتى پەرەزەنتىن امان-ەسەن دۇنيەگە اكەلىپ، 34 جاسىندا "التىن القالى" انا اتاناعان. ال 2012 جىلى 29 جەلتوقسان بۇل ۇيدە ۇشەم دۇنيەگە كەلەدى. ءسويتىپ، ون بالالى وتباسى بولعاندىقتان، ءارى ۇشەم دۇنيەگە كەلگەندىكتەن الماتى قالاسىنا قاراستى الاتاۋ اۋداننىڭ سول كەزدەگى اكىمى باعدات ءمانىزوروۆ ولارعا كوكجيەك ىقشاماۋدانىنان ءۇش بولمەلى پاتەر سىيلايدى.

ءيا، سىيلايدى. اكىم ءوز قولىمەن ءۇيدىڭ كىلتىن تاپسىرىپ، گازەت-جۋرنالداردا جازىپ، تەلەارنادا كورسەتەدى. باسپانانى تابىستاۋ راسىمىندە ساكەن مايعازەۆ قاتارلى انشىلەردىڭ قاتىسۋىمەن شاعىن كونتسەرت تە وتكەن كورىنەدى. ءتىپتى الاتاۋ اۋدانىنىڭ قۇرىلعانىنا بەس جىل تولۋىنا وراي شىققان ۇلكەن جيناققا بۇل وتباسىنىڭ سۋرەتى دە باسىلىپ، اۋداننىڭ بەس جىلدىعىنا وراي بەرىلگەن ەسەپ-قيساپقا ەنەدى.

وكىنىشتىسى، وسىلاي جالپىعا جار سالىپ ءجۇرىپ بەرگەن ءۇي جەكەمەنشىككە ەمەس جالعا بەرىلگەن ەكەن. ءۇي يەلەرى مۇنى جاقىندا عانا بىلگەن. تۋرا التى جىلدان كەيىن. بۇل ءۇيدىڭ كىلتىن 2013 جىلى 8 ناۋرىزدا تابىستاعان. سودان ءدال ءبىر كۇن بۇرىن، 7 ناۋرىز كۇنى تۋعانىنا ءۇش اي عانا بولعان ۇشەمنىڭ بىرەۋى شەتىنەپ كەتكەن. سابيىنەن ايىرىلىپ سانسىراپ وتىرعان وتباسى اكىمدىك بەرگەن ءار قاعازعا ەش ويلانباستان قول قويىپ بەرىپتى. نەسىن ويلانادى، بۇلار ءۇيدى الىپساتارلاردان ەمەس، مەملەكەتتەن، بىلدەي اكىمنىڭ قولىنان الىپ وتىر عوي...

ءسويتىپ سەنگەن اكىمى الگى الىپساتارلاردىڭ ارەكەتىن جاساعان ەكەن! ءبىر قولىمەن «ءۇي يەسى» دەگەن قۇجاتتى، ءبىر قولىمەن «جالداپ تۇرۋ» تۋرالى كەلىسىمشارتتى بەرىپ كەتكەن. ال، بۇعان نە دەۋگە بولادى؟

گۇلزيرا حانىم كوتەرىپ جۇرگەن قالىڭ قۇجاتتاردىڭ ىشىندە ۇيگە جەكە مەنشىك يەلىك ەتۋ تۋرالى اكتى دە بار، سونىمەن قاتار، ءۇيدى جالداۋشى رەتىندەگى كەلىسىمشارت تا بار. سوعان قاراعاندا بۇل ءۇي ۇزاق ۋاقىت جالداپ تۇرۋعا بەرىلگەن سەكىلدى. ال جەكەشىلدەندىرۋگە ءوتىنىش بەرۋ-بەرمەۋ تۇرىپ جاتقان وتباسىنىڭ ءوز ەركىندە ەكەن. ەگەر جەكەشەلەندىرگىسى كەلە سول تۇرعىن ءۇي قۇنىنىڭ (4 880 100 تگ) كەم دەگەندە 30%-ى مولشەرىندە باستاپقى جارنا تولەۋى كەرەك. مۇنى «نۇر وتان» پارتياسى الماتى قالالىق فيليالى باسشىسىنىڭ ورىنباسارى ا. سايدەلداەۆ ايتىپ وتىر.

گۇلزيرا حانىم قازىرگى تۇرىپ جاتقان ءۇيدىڭ ءوزىنىڭ جەكە مەنشىگى ەمەس ەكەنىن بيىل جىل باسىندا كەزدەيسوق بىلگەن. 2013 جىلى پاتەر كىلتى تابىستالدى. ول كەزدە ەشقانداي تولەم جاساماعان. ال 2016 جىلى قالالىق تۇرعىن ءۇي باسقارماسىنا (باستىعى قايرات نۇرقادىلوۆ) شاقىرىپ الىپ، قاجەتتى قۇجاتتارعا قول قويعىزىپ العان. اراعا تاعى ءۇش جىل سالىپ، بيىل قايتا شاقىرعان. سويتسە، بۇل ءۇيدى جالداپ تۇرۋ تۋرالى كەلىسىمشارتتى ءار ءۇش جىل سايىن ۇزارتىپ وتىرۋ كەرەك ەكەن.

وسىدان كەيىن عانا توعىز بالاسىمەن (جەتەۋى كامەلەت جاسىنا تولماعان) قوسقاندا ون ءبىر ادام تۇرىپ جاتقان باسپاناسىنان ايىرىلىپ قالۋى مۇمكىن ەكەنىن بىلگەن. ءسويتىپ، جاۋاپتى ورىنداردىڭ ەسىگىن توزدىرىپ، ىزدەنە باستاعان. العاشقى قاققان ەسىگى «نۇر وتان» پارتياسى الماتى قالالىق فيليالى. ال ولاردىڭ قانداي جاۋاپ بەرگەنىن جوعارىدا ايتتىق. تۇرعىن ءۇيدى جەكەشەلەندىرگىڭىز كەلسە كەم دەگەندە وتىز پايىز جارناسىن تولەپ، جەكەشەلەندىرۋ تۋرالى ءوتىنىش بەرىڭىز دەپتى.

ودان كەيىن دە بىرنەشە جاۋاپتى مەكەمەنى جاعالاپ كورگەنىمەن، ءجونى ءتۇزۋ جاۋاپ الا الماعان كورىنەدى. ءسوز اراسىندا ايتىپ قالدى، الماتى قالاسى جەتىسۋ اۋدانى اكىمىنىڭ ورىنباسارىنا جازعان ءوتىنىش-ارىزىن 42(!) مارتە كوبەيتىپ شىعارعان ەكەن. سونىڭ 41-ءىنشىسىن بىزگە قالدىردى. دەمەك، بۇل ءوتىنىش-ارىزدى بىزدەن بۇرىن دا 40 جەرگە بەردى دەگەن ءسوز. ال ودان شەشىلىپ جاتقان ماسەلە جوق. توعىز بالاسىن جەتەلەپ تابانىنان توزىپ جۇرگەن انانىڭ جالعىز تالابى - ۇكىمەت ءوزى بەرگەن ءۇيدى ءوزى قايتىپ الماسا ەكەن! سوندىقتان دا، 42-ارىزدى تىكەلەي الەۋمەتتى قورعاۋ ءمينيسترى بەردىبەك ساپارباەۆقا باعىتتاۋدى ءجون ساناپ وتىر. راس، كوپ بالالى انانىڭ جانايقايىن ەتەكتەگى ۇساق شەندىلەر جوعارىعا جەتكىزبەي جاتقانى تاعى بار. سول ءۇشىن دە گۇلزيرا مۇحامەدجانوۆانىڭ ءباسپاسوز ارقىلى ارەكەت ەتۋدەن باسقا جولى قالماعان.

كوپبالالى باتىر انا وسى جاعدايدىڭ جوعارداعى جاۋاپتى ادامداردىڭ قۇلاعىنا جەتكەنىن قالايدى. ءبىزدىڭ ماقسات تا وسى. ۇشەم دۇنيەگە كەلگەن وتباسىعا باسپانا بەرۋدىڭ باس-اياعى بۇل ەمەس. ونىڭ ۇستىنە بۇل كىسىلەر توعىز پەرەزەنت تاربيەلەپ وتىر. سوندىقتان، بۇل وتباسىدان بۇرىنعى اكىم-قارالاردىڭ «الداركوسە ارەكەتى» ءۇشىن ءدال بۇگىن 5 ملن سۇراۋدىڭ ەش ءجونى جوق دەپ بىلەمىز.

سونىمەن قاتار، گۇلزيرا حانىم الماتى قالاسى جەتىسۋ اۋدانى اكىمىنىڭ الەۋمەتتىك ماسەلەلەر بويىنشا ورىنباسارى ۆ.ۆاۆيلينگە دەگەن ۇلكەن ريزاشىلىعىن جەتكىزدى. ءدال وسى قىزمەتكەر بۇل كىسىنىڭ جۇمىسىن وڭ باعىتتا شەشىپ بەرۋ ءۇشىن قولىنان كەلگەن كومەگىن اياماپتى. نەگىزى 29 ساۋىرگە دەيىن پاتەردى جالداپ تۇرۋ مەرزىمىن تاعى ءۇش جىلعا دەيىن سوزۋى نەمەسە 30% العاشقى جارنانى تولەپ جەكەشەلەندىرۋگە ءوتىنىش بەرۋى كەرەك ەكەن. ۆاۆيلين مىرزا ءوزى ارالاسىپ، وسى مەرزىمدى 20 ماۋسىمعا دەيىن ۇزارتىپ بەرىپتى.

قۇرمەتتى بەردىبەك ماشبەكۇلى، قازىرگى تاڭدا ەلىمىزدە كەزەك كۇتتىرمەيتىن، كۇردەلى ماسەلەلەردىڭ ءبىرى - كوپبالالى انالاردىڭ مۇڭى بولىپ وتىر. ءبىز ءسوز ەتىپ وتىرعان گۇلزيرا مۇحامەدجانوۆا دا مەملەكەتتىڭ كومەگىنە مۇقتاج. باتىر انانىڭ توعىز پەرەزەنتىنە تۇراق بولعان باسپاناسىن رەسمي تۇردە وزىنە جەكەشەلەندىرىپ بەرۋگە ىقپال ەتسەڭىز!

كوپ بالالى انانىڭ سىزدەن ءوتىنىپ سۇرارى وسى عانا!

قۋانىش قاپپاس

Abai.kz

4 پىكىر