سارسەنبى, 17 شىلدە 2019
دەپ جاتىر 907 4 پىكىر 21 ماۋسىم, 2019 ساعات 09:07

قانات بوزىمباەۆ: "حالىق "جوق" دەسە، ەشكىم ەشتەڭە سالمايدى"

حالىق پىكىرىن ەسكەرە وتىرىپ، اتوم ەلەكتر ستانتسياسىن سالۋعا بايلانىستى شەشىم قابىلدانادى" دەدى قازاقستاننىڭ ەنەرگەتيكا ءمينيسترى قانات بوزىمباەۆ 20 ماۋسىمدا تۇرعىندارعا ەسەپ بەرۋ جيىنىندا.

"حالىق پىكىرىن ەسكەرۋ دەگەنىمىز نە؟ بۇل حالىق اراسىندا ساۋالناما جۇرگىزۋ نەمەسە رەفەرەندۋم وتكىزۋ. سوندىقتان الاڭداماڭىزدار: ەگەر اەس سالىنسا، مىندەتتى تۇردە ول جايلى ەستيسىزدەر، بىلەسىزدەر. حالىق ءوز پىكىرىن ايتادى. ەگەر "جوق" دەسە، ەشكىم ەشتەڭە سالمايدى. ءسىز بەن ءبىز سەمەي سىناق پوليگونىن باستان وتكەردىك، مۇنى جاقسى تۇسىنەمىز. قانشاما ادام زارداپ شەكتى. بۇل جادى - ونى "گەندىك جادى" دەپ اتايمىز. بۇل قوعامدا اەس-ءتىڭ سالىنباۋىن قولدايتىن كوڭىل-كۇيدى قالىپتاستىرىپ وتىر. قالاي بولعاندا دا، اەس سالۋ بويىنشا جوسپار، شەشىم قابىلدانعان جوق" دەدى مينيستر.

بۇعان دەيىن جەرگىلىكتى اقپارات اگەنتتىكتەرى "قازاقستاندا اەس سالۋ بويىنشا تەندەر جاريالانعانىن", "بىرقاتار حالىقارالىق كومپانيالاردىڭ وعان قاتىسۋدى جوسپارلاپ وتىرعانىن" حابارلاعان. وسى اقپاراتتى مەڭزەگەن مينيستر ەگەر قانداي دا ءبىر شەتەل ۇيىمدارى نە كومپانيالار تۇسىنىكتەمە بەرسە، بۇل ولاردىڭ قازاقستانعا ءوز ءونىمىن ساتقىسى كەلگەنىنەن حابار بەرەدى دەگەن.

ءساۋىر ايىنىڭ باسىندا رەسەيگە ساپارلاپ بارعان قازاقستان پرەزيدەنتى قاسىم-جومارت توقاەۆپەن كەزدەسۋدە پرەزيدەنت ۆلاديمير پۋتين قازاقستاندا "رەسەيلىك تەحنولوگيا" بويىنشا اەس سالۋ تۋرالى ۇسىنىس ايتقان. بۇل الەۋمەتتىك جەلىدە قىزۋ تالقىلانىپ، قولدانۋشىلار ءارتۇرلى پىكىر بىلدىرگەن.

كەلەسى كۇنى ەنەرگەتيكا ۆيتسە-ءمينيسترى ماعزۇم مىرزاعاليەۆ ستانتسيا قۇرىلىسىنا قاتىستى ناقتى شەشىم قابىلدانباعانىن، الايدا اتوم ەلەكتر ستانتسياسى ورنالاسۋى مۇمكىن اۋماق رەتىندە كۋرچاتوۆ قالاسى مەن ۇلكەن اۋىلىن اتاعان.

ەلدە مامىر ايىندا بولعان نارازىلىق شارالارىندا وزگە ۇراندارمەن قاتار "اەس سالىنباسىن!" دەگەن تالاپ تا بولعان.

Abai.kz

4 پىكىر