بەيسەنبى, 27 اقپان 2020
1680 3 پىكىر 26 ماۋسىم, 2019 ساعات 18:37

پرەزيدەنت اقپارات سالاسىنداعى سىيلىقتار مەن گرانتتاردى تاپسىردى

قاسىم-جومارت توقاەۆ ءراسىم كەزىندە سىيلىق لاۋرەاتتارى مەن گرانت يەلەرىن، العىس جاريالانعان شىعارماشىلىق ۇجىمداردى جانە بارلىق جۋرناليستەر قاۋىمىن كەلە جاتقان كاسىبي مەرەكەلەرىمەن قۇتتىقتادى.

– بۇقارالىق اقپارات قۇرالدارى – جاڭالىقتىڭ جارشىسى.  ەل ىشىندەگى جانە الەمدەگى وقيعالاردان حالىققا شۇعىل ءارى شىنايى اقپارات تاراتۋ – سىزدەردىڭ كاسىبي ەڭبەكتەرىڭىز.  سوندىقتان، سىزدەردىڭ قوعامدىق ماڭىزى زور قىزمەتتەرىڭىزگە ءبىز ارقاشان قۇرمەتپەن قارايمىز، باعالايمىز. مەنىڭ تاپسىرمام بويىنشا ۇكىمەت ارنايى قاۋلىمەن قازاقستان جۋرناليستەرىنىڭ كاسىبي مەرەكەسىن بەكىتتى، – دەدى پرەزيدەنت.

قاسىم-جومارت توقاەۆ وزىق تەحنولوگيا زامانىندا مەديا سالاسىنىڭ مۇمكىندىكتەرى وتە اۋقىمدى ەكەنىن اتاپ ءوتتى. مەملەكەت باسشىسى جۋرناليستيكانىڭ جاڭا داۋىرىندە عالامتور جەلىسى مەن الەۋمەتتىك جەلىلەردىڭ ايرىقشا رولىنە توقتالىپ، اقپاراتتىڭ اشىق، جەدەل جانە قولجەتىمدى بولۋى جەتىستىكتىڭ باستى ولشەمدەرىنە اينالعانىن ايتتى.

– مەملەكەتتىڭ الەۋەتىن نىعايتۋ، ەكونوميكانى دامىتۋ، ازاماتتاردىڭ تۇرمىس ساپاسىن ارتتىرۋ – بۇگىندە ەلىمىزدىڭ الدىندا تۇرعان ماڭىزدى مىندەتتەر. وتاندىق مەديا-قاۋىمداستىقتىڭ سىندارلى نەگىزدە ۇيىسۋى، جۋرناليستەردىڭ بەلسەندى ازاماتتىق ۇستانىمى، ولاردىڭ كاسىبي دەڭگەيى جانە ادىلدىگى – اقپاراتتىق كەڭىستىكتەگى تابىستى جۇمىستىڭ نەگىزگى شارتتارى. مەملەكەت ءوز تاراپىنان باق-قا قولداۋ كورسەتە بەرەدى، – دەپ اتاپ ءوتتى پرەزيدەنت.

«جاس وركەن» جشس باس ديرەكتورى جۇسىپبەك قورعاسبەككە، «كومسومولسكايا پراۆدا – قازاقستان» گازەتىنىڭ باس رەداكتورى – ۆيكتور كيانيتساعا، «انا ءتىلى» گازەتىنىڭ باس رەداكتورى – جاناربەك اشىمجانعا، «استانا» تەلەارناسىنىڭ رەداكتورى – جاينا جاقسىلىقوۆاعا مەملەكەت باسشىسىنىڭ وكىمىمەن سىيلىق تاعايىندالدى.

گرانتتار «حابار 24» تەلەارناسىنىڭ ءتىلشىسى – راۋان مىڭباەۆقا، «Qazaqstan» تەلەاناسىنداعى «ماسەلە» تالدامالىق باعدارلاماسىنىڭ جۇرگىزۋشىسى نارتاي سارسەنعاليەۆكە،
«قازاقستان» تەلەراديوكورپوراتسياسى ماڭعىستاۋ وبلىستىق فيليالىنىڭ شەف-رەداكتورى اسەم سارتباەۆاعا تاپسىرىلدى.

«ەگەمەن قازاقستان»، «ەكسپرەسس ك»، «زناميا ترۋدا» جانە «شالقار» راديوسى شىعارماشىلىق ۇجىمدارىنا قازاقستان رەسپۋبليكاسى پرەزيدەنتىنىڭ العىسى جاريالاندى.

قاسىم-جومارت توقاەۆتىڭ العىس حاتتارىن «ايقىن» گازەتىنىڭ باس رەداكتورى نۇرتورە ءجۇسىپ، «حابار» تەلەارناسى تالدامالىق باعدارلامالار ءبولىمىنىڭ شەف-رەداكتورى الەكساندر ترۋحاچەۆ، «Qazaqstan» تەلەارناسىنىڭ جۇرگىزۋشىلەرى قىمبات دوسجان جانە دانا نۇرجىگىت، «حابار 24» تەلەارناسىنىڭ شەف-رەداكتورى شالقار قوجاەۆ، «Qazaqstan» تەلەارناسىنىڭ اقپاراتتىق-ساراپتامالىق باعدارلامالار ديرەكتسياسىنىڭ ديرەكتورى ەرلان اتامباي، «ليتەر» گازەتى باس رەداكتورىنىڭ ورىنباسارى جاننا ويشىباەۆا، «كتك» تەلەارناسىنىڭ باس ديرەكتورى ەلميرا دجاميلوۆا، سونداي-اق «قازاقپارات» حاا جانە «جەتىسۋ» تەلەارناسى الدى.

قازاقستان-رەسەي جانە قازاقستان-قىتاي ىنتىماقتاستىعىن نىعايتۋعا بەلسەندى اتسالىسقانى ءۇشىن بۇكىلرەسەيلىك مەملەكەتتىك تەلەۆيزيا جانە راديو حابارلارىن تاراتۋ كومپانياسى مەن «CCTV» حالىقارالىق تەلەارناسى قازاقستان پرەزيدەنتىنىڭ العىس حاتتارىمەن ماراپاتتالدى.

مەملەكەت باسشىسىنىڭ اتىنان ەلىمىزدىڭ بارلىق وڭىرلەرىنە جىبەرىلگەن العىس حاتتار ۇزدىك جۋرناليستەرگە سالتاناتتى تۇردە تابىس ەتىلەتىن بولادى.

Abai.kz

3 پىكىر