ۋاقىت وتكەن سايىن استانا قارجى ورتالىعىنىڭ جۇمىسى قارقىن الىپ، و باستاعى ەلدىڭ ينۆەستيتسيالىق جۇيەسىن جاقسارتىپ، قارجى سالاسىن جان-جاقتى دامىتۋدى كوزدەيتىن ءوز باعىتىندا كۇش الىپ كەلە جاتىر. قارجى ورتالىعىنىڭ وسىعان دەيىن وتكىزگەن كوپتەگەن حالىقارالىق شارالارى ورتالىق حالىقارالىق بەدەلىن كوتەرىپ قانا قويعان جوق، سونىمەن قاتار قازاقستاندى الەمدىك قارجى نارىعىندا كەڭىنەن تانىتىپ كەلەدى. ازىرگە ورتا ازيادا بالاماسى جوق بىردەن ءبىر ورتالىق ءوز جۇمىسىندا ءتۇرلى تاراپتا، كەڭ اۋقىمدا جانە حالىقارالىق قارجى ينستيتۋتتارى مەن ماماندارىن تارتا وتىرىپ جۇرگىزىپ كەلەدى. قارجى ورتالىعى ورتالىق ازيا، كاۆكاز رەسپۋبليكالارى، ەۋرازيالىق ەكونوميكالىق وداق، تاياۋ شىعىس ەلدەرى، باتىس قىتاي اۋماعى، موڭعوليا مەن ەۋروپا سەكىلدى وراسان اۋماقتى قامتيتىن الەمدىك قارجى ورتالىعىنا اينالۋعا ۇمتىلىپ وتىرعانىن ايتا كەتۋ كەرەك. وسى ماقساتتا ونداعان حالىقارالىق جيىندار، ءتۇرلى ءىس-شارالار ۇيىمداستىرىپ كەلەدى. ماسەلەن، 1-4 شىلدە ارالىعىنداعى وتەتىن حالىقارالىق كەزەكتى ءىس-شارانىڭ اياسىندا حالىقارالىق اربيتراج ورتالىعى سوتىنىڭ رەسمي اشىلۋ بولادى. وسى جەردە سوتتىڭ ەرەكشەلىگىندە ايتا كەتكەن ءجون. ويتكەنى، بۇل سوت قارجى ورتالىعى ارقىلى كەلەتىن ينۆەستورلار ءۇشىن وتە ماڭىزدا نارسە. مىسالى، قازىرگى تاڭدا دۇنيەجۇزىندە ەكى نەگىزگى قۇقىقتىق جۇيە بار. ونىڭ ءبىرى – كونستيتۋتسيا مەن زاڭداردىڭ باپتارىنا سۇيەنەتىن رومان-گەرماندىق، ەكىنشىسى – اعىلشىن ساكسوندىق قۇقىقتىق جۇيە. ال «استانا» حالىقارالىق قارجى ورتالىعى اعىلشىن-ساكسوندىق جۇيەنى تاڭدادى. مۇنىڭ دا ءوز سىرى بار. تابيعاتى قازاقتىڭ بيلەر سوتىنا كەلەتىن اعىلشىن قۇقىق قاعيداتىنىڭ ارتىقشىلىعى كوپ. ينۆەستورلاردىڭ قارجىسىن نەگىزىنەن اتالعان جۇيەمەن جۇمىس ىستەيتىن قارجى ينستيتۋتتارىنا سەنىپ قۇياتىنى سوندىقتان بولسا كەرەك. اعىلشىن زاڭى بارلىق حالىقارالىق قارجى ورتالىقتارىندا، دۋباي، گونكونگ، لوندون، نيۋ-يورك­تە قولدانىلادى. ال استانا قارجى ورتالىعى تمد ەلدەرى اراسىندا اعىل­شىندىق قۇقىق قاعيداتىمەن جۇ­مىس ىستەيتىن تۇڭعىش قارجى ينستيتۋتى بولىپ وتىر.

ورتالىق قارجى-ينۆەستيتسيا جانە جەكەشەلەندىرۋ ارقىلى ينۆەستيتسيا تارتۋ، حالىقارالىق بانك، قارجى ۇيىمدارىمەن تىعىز بايلانىسىنان باسقا اتاپ ايتار ءوز ارتىقشىلىقتارى بار. ماسەلەن، احقو Seedstars جانە MOST بيزنەس-ينكۋباتورىمەن ءبىر­لە­سىپ، Fintech Stars حالىقارا­لىق اك­سە­لەرا­تسيالىق باعدارلاماسىن ىسكە قوستى. باعدارلاما اياسىندا 10 ستارتاپ-جوبانى قارجىلاندىرىلىپ، كاسىپكەرلەر ءوز سالاسىنداعى ەڭ ۇزدىك ساراپشىلارمەن بىرلەسىپ جۇمىس ىستەۋ مۇمكىندىگىنە يە بولدى. وسىنىڭ ارتقاسىندا ولار بيزنەس-ۇدەرىستى قالاي دۇرىس جۇزەگە اسىرۋ جانە باسەكەلىك نارىقتا قالاي جۇمىس ىستەۋ كەرەكتىگىن ۇيرەندى. باعدارلامانىڭ ءبىلىم بەرۋ بولىگى ءتيىمدى ءارى ءساتتى ستارتاپتاردى دامىتۋدىڭ تاپتىرماس ءتاسىلى بولدى.

استانا قارجى ورتالىعى قازىردىڭ وزىندە الەمدىك قارجىگەرلەردىڭ، بانكتەردىڭ قارجى سالاسىنداعى جاڭا تەحنولوگيالار مەن تىڭ باستامالار، يدەيالاردىڭ ورتاسىنا اينالىپ ۇلگەردى. سونداي-اق، حالىقارالىق ىنتىماقتاستىقتى نىعايتۋ جانە ورتالىق ارقىلى قازاقستان قارجى، بانك، ينۆەستيتسيا سالاسىنا تاڭ سەرپىن بەرۋ ءۇشىن ءداستۇرلى تۇردە جىل سايىن وتكىزىلىپ كەلە جاتقان حالىقارالىق ءىس-شارالاردىڭ بەرەرى مول ەكەنىن ۋاقىت ءوزى دالەلدەدى.

باستى مىندەتى – قارجىلىق قىزمەتتەر سالاسىندا ينۆەستيتسيالاۋ ءۇشىن تارتىمدى ورتا قۇرۋ ارقىلى ەل ەكونوميكاسىنا ينۆەستي­تسيالار تارتۋعا جاردەمدەسۋ، ەلىمىزدىڭ باعالى قاعازدار نارىعىن دامىتۋ، ونىڭ حالىقارالىق كاپيتال نارىقتارىمەن ىقپالداسۋىن قامتاماسىز ەتۋ، سونداي-اق ساقتاندىرۋ، بانك قىزمەتتەرى مەن يسلامدىق قارجىلاندىرۋ نارىعىن دامىتۋ بولىپ وتىرعان ورتالىق اتالعان مىندەتتەردى بىرتىندەپ ىسكە اسىرىپ قانا قويماي، حالىقارالىق سەنىمدى ءارى بەدەلدى قارجى ورتالىعىنا اينالىپ ۇلگەردى.