"سكورو ۆ كازاxستانە بۋدەت بارداك" دەپ ىرجالاڭداپ وتىردى...
2016 جىلى جەر داۋى ءورشىپ تۇرعاندا مەن اقش-تا وقۋدا ەدىم. ورتا ازيادان كەلگەن جىگىتتەر ارالاسىپ، اراسىندا كەزدەسىپ تۇراتىنبىز. بۇل ەندى شەتتە جۇرگەندە ءتىلى مەن دءىلى جاقىن ازاماتتار ءوزارا بىرىگە كەتەتىن قالىپتى پروتسەسس. جەردىڭ ساتىلۋىنا، 25 جىلعا جالعا بەرىلۋىنە مەن دە قارسى بولدىم. ول تۋرالى جازىپ تا ءجۇردىم.
بىراق، مەنىڭ ەسىمنەن كەتپەيتىن ءبىر وقيعا - ورتا ازيا جاستارى وتىرعان ءبىر وتىرىستا وزبەكستاننان كەلگەن ءبىر جىگىتتىڭ "سكورو ۆ كازاxستانە بۋدەت بارداك" دەپ ىرجالاڭداپ، ەلدە بولىپ وتىرعان پروتسەستەردى ۆيدەودان كورىپ راxاتتانىپ وتىرعان بەينەسى. تۋراسىن ايتقاندا ونىڭ ساناسىندا "قازاقتىڭ جەرىنە نە بولسا ول بولسىن" دەگەن تۇسىنىك بار. كوزىنەن كورىنىپ تۇر مەنىڭ ەلىمدە بارلىق نارسەنىڭ بىت-شىت بولىپ، مەملەكەتتىڭ تەنتىرەپ، تۇتاس xاۋوس پەن بارداكتىڭ بولعانىن قالايتىنى. جاقىننان تانيتىندىقتان كاريموۆ كەزىندە ارتتا قالعان ەلىنىڭ جاعدايىنا كۇينىپ جۇرەتىنىن جاقسى بىلەتىنمىن. ورتا ازيانى بيلەگەن بابام اقساق تەمىر دەگەندى ءجيى ايتاتىن جىگىتتىڭ كوكسەگەنىن ايتپاي-اق ءتۇسىندىم...
اعايىن، قوردالانعان پروبلەما كوپ. شەشۋ كەرەك. تەك وسى جولدا ۋرالاپ ءجۇرىپ مەملەكەتتىڭ تۇبىنە جەتپەيىك. اتالى سوزگە توقتايىق.
ەل باسقارعان اعالار! ءدال قازىر قازاق ەلىنىڭ تاعدىرى، شەشىم قابىلداۋ تەتىگى سىزدەردىڭ قولدا. الىسقا بارىپ كەرەگى جوق كورشى وزبەكستانعا شافكات ميرزيەەۆ كەلگەلى ورلەۋ مەن دامۋ باستالدى. قوعامدى بىرىكتىرىپ، وزبەك ەلىندە جاڭا رەفورمالار مەن دامۋ پروتسەسى ءجۇرىپ جاتىر. بىزدە بيلىك اۋىسقالى شەرۋ مەن دۇمپۋدەن كوز اشا الار ەمەسپىز. بۇنىڭ ارتى جاقسى ەمەس. ەلدى تىڭداپ، بار قازاقتى تىنىشتاندىرار ورتاق جول تابۋىمىز كەرەك. ءدال قازىرگىدەي جاعدايمەن ەندى 2-3 جىل ءومىر سۇرسەك ءبىز ورتا ازياداعى ليدەر، الەمدەگى تىنىشتىق ورناعان، بەرەكەسى كەلىسكەن ەل دەگەن پوزيتسيانى جوعالتامىز.
ەكونوميكا كەرى كەتكەنى كەتكەن بولادى. تەز ارادا كريزيس مەنەدجمەنتتى قولعا الۋ كەرەك. قازاق ەلىن، ونىڭ مەملەكەتتىلىگىن ساقتاپ، وركەندەۋ مەن دامۋعا باستايتىن جاڭا جول قاجەت! قازىرگى جاعدايدىڭ بەتالىسى جاقسى ەمەس. مەملەكەتتى ساقتاۋ مەن ونى ەكونوميكالىق دامىتۋ، xالىقتىڭ ەڭبەگىنە ساي ءومىر ءسۇرۋى، الەۋمەتتىك ادىلەتتىك بارىنەن جوعارى تۇرۋى ءتيىس!
باۋىرجان سەرىكبايدىڭ facebook پاراقشاسىنان
Abai.kz
