ول ارىستاعى وقيعادان زارداپ شەككەن وتباسىلارعا كوڭىل ايتىپ، بەيبىت ۋاقىتتا مۇنداي توتەنشە وقيعالار بولماۋى ءتيىس دەدى.

"ەلدىڭ قورعانىس كۇشتەرىندە قىزمەت ەتەتىن بارلىق اسكەريلەر زارداپ شەككەندەردىڭ قايعىسىنا ورتاقتاسادى. اسكەري بورىشىن وتەۋگە بارعان كەز كەلگەن اسكەري قىزمەتكەر سانالى تۇردە تاۋەكەلگە بارىپ، جاۋاپكەرشىلىكتى موينىنا الادى. سوندىقتان اسكەري قىزمەتكەر ءۇشىن تاۋەكەلگە بارۋ - تابيعي قۇبىلىس. بىراق بەيبىت زاماندا ارينە، مۇنداي اپات بولماۋى ءتيىس، بۇل قالىپتى نارسە ەمەس. سوندىقتان قازىر جان-جاقتى تەرگەۋ ءجۇرىپ جاتىر. كىنالىلەر قاتاڭ جاۋاپكەرشىلىككە تارتىلادى، ەشكىم ولاردى جاسىرىپ، اقتامايدى. كەشىرىم سۇراۋ ماسەلەسى - بۇل اسكەري قىزمەتكەرلەر، مەن جانە ارىس تۇرعىندارى اراسىنداعى ماسەلە" دەدى مينيستر.

3 شىلدەدە نۇرلان ەرمەكباەۆ ءۇش ادام قازا تاۋىپ، مىڭنان استام نىساننىڭ بۇلىنۋىنە سەبەپ بولعان ارىستاعى جارىلىستى "تابيعي قۇبىلىس" دەپ اتاپ, حالىقتان "كەشىرىم سۇراۋدىڭ رەتىن كورىپ تۇرعان جوقپىن" دەپ مالىمدەگەن ەدى. ءمينيستردىڭ مالىمدەمەسىنەن كەيىن الەۋمەتتىك جەلى قولدانۋشىلارى ونىڭ پىكىرىن سىناعان.

24 ماۋسىمدا تۇركىستان وبلىسى ارىس قالاسىنداعى اسكەري قويما جارىلدى. دەنساۋلىق ساقتاۋ مينيسترلىگىنىڭ دەرەگىنشە، جارىلىستان ءۇش ادام (ارىس تۇرعىنى مەن ەكى اسكەري) قازا تاۋىپ، 400-دەن استام ادام دارىگەر كومەگىنە جۇگىنگەن. توتەنشە جاعداي كوميتەتىنىڭ مالىمەتىنشە، ارىستاعى ۇيلەردىڭ 85 پايىزى بۇلىنگەن.

قازاقستان ۇكىمەتىنىڭ حابارلاۋىنشا، جارىلىس بولعان كۇنى 39 مىڭ ادام ءوز كۇشىمەن قالانى تاستاپ شىققان، ءۇش مىڭنان استام ادام تۇركىستان وبلىسى اكىمدىگى ۇسىنعان اۆتوبۋستارمەن شىمكەنتكە جەتكەن. 27 ماۋسىمدا شىمكەنتتە شەرۋگە شىققان جۇزدەگەن ارىستىق سوڭعى ون جىل ىشىندە ءتورتىنشى رەت جارىلىس بولعان ارىس قالاسىنا بارمايتىنىن ايتىپ، بيلىكتەن وزدەرىن باسقا جاققا كوشىرۋدى تالاپ ەتكەن. ال تۇركىستان وبلىسى اكىمدىگى مەن شىمكەنت اكىمدىگى "ارىس تۇرعىندارىنا بەرەتىن ءۇي جوق" دەگەن.

28 ماۋسىمدا شىمكەنت پەن كورشى ەلدى مەكەندەردى ۋاقىتشا پانالاعان ارىستىقتار ۇيلەرىنە ورالدى.

ارىس قالاسىندا بۇعان دەيىن بىرنەشە رەت جارىلىس بولعان. 2015 جىلى قاراشادا قالاداعى پوليگون اۋماعىنداعى جارىلىستان ءبىر ادام مەرت بولعان ەدى. رەسمي اقپارات بويىنشا، جارىلىس اسكەري وق-ءدارى مەن ءوندىرىس قالدىقتارىن جويۋ كەزىندە بولعان.

2014 جىلى ارىستاعى "قازاقجارىلىسونەركاسىبى" اكتسيونەرلىك قوعامى اۋماعىندا بولعان جارىلىس سالدارىنان ەكى ادام قازا تاپقان.

ون جىل بۇرىن، 2009 جىلى ناۋرىزدا ارىستاعى قويمادا جارىلعىش زاتتار جارىلىپ، ساقتاۋلى تۇرعان وق-ءدارى اتىلعان. ول وقيعادان ءتورت ادام قازا تاۋىپ، جيىرماعا تارتا ادام جاپا شەككەن ەدى. رەسمي بيلىك جارىلىسقا قويماداعى قارۋدىڭ دۇرىس ساقتالماۋى جانە جارىلعىش زاتپەن دۇرىس جۇمىس ىستەمەۋ سەبەپ بولدى دەپ مالىمدەگەن.

Abai.kz