ەندى قىزىقتى قاراڭىز. كەشەگى وتكەن سايلاۋدا ەردوعاننىڭ پارتياسىنا قارسى داۋىس بەرگەن وپپوزيتسيا پارتياسىنىڭ مۇشەلەرى مەن تۇرىك قوعامىنىڭ باسىم بولىگى بۇگىن "ەردوعاننىڭ س-400 اۋە قورعانىسىن اقش-تىڭ قىسىمىنا قاراماي رەسەيدەن ساتىپ العانى وتە دۇرىس بولدى" دەپ وتىر. ءتىپتى ءبىر اي بۇرىن وتكەن سايلاۋدا ەردوعان پارتياسىن سىناپ-مىنەگەن ساياساتتانۋشىلار دا ءدال س-400 تاقىرىبىندا پرەزيدەنتىمىز وڭ شەشىم جاسادى دەگەندى اشىق ايتۋدا. سەبەبى، سيريا مەن يراكتا سوعىس بولىپ جاتقاندا تۇركيانىڭ ءوز قورعانىس جۇيەسى بولۋى قاجەت دەگەندى جالپى تۇرىك قوعامى مويىندايدى. بيلىكتە كىم بولسا مەيلى ول بولسىن مەملەكەتتىك مۇددە مەن تۇركياعا قاتىستى وڭ ساياسات ۇستانعان پارتيانىڭ دۇرىسىن دۇرىس، بۇرىسىن بۇرىس دەپ تارازىنىڭ باسىن تەڭ ۇستاپ اناليز جاسايتىن ساياسي مادەنيەت بار. بۇل تەك قورعانىس ماسەلەسىندە عانا وسىنداي ەمەس. پوست ءدال قازىر تۇركيادا ورىن الىپ جاتقان ءبىر مىسالدى عانا كەلتىردى.

كەيدە بىزگە جەتپەي جاتقانى سول سەكىلدى. سىناساڭ سوڭىنا دەيىن سىناۋ كەرەك. ء"اي، وسى قادامى دۇرىس بولدى" دەسەڭ "ساتقىن", "جاۋىز" اتانىپ، قىسقاسى  سەنەن جامان ادام جوق. جاماندادىڭ با "دو كونتسا" كەتۋ كەرەكسىڭ. جاقسىلىعىن ايتپاۋ قاجەت. مەنىڭ ويىمشا مۇنىڭ ەكى سەبەبى بولۋى مۇمكىن. نە ءبىزدىڭ ساياسي مادەنيەت ءالى ءوسىپ جەتىلمەگەن، نە ءبىز شىنىندا جىك-جىككە ءبولىنىپ ايتىسا بەرەتىن قوعامبىز. ءدال قازىرگى قوعامدىق سانامىزدى سارالاپ وتىرىپ كەيدە "دەموكراتيا" دەپ ۇرانداتىپ ءجۇرىپ مەملەكەتتىڭ تۇبىنە جەتىپ تىنباساق بولدى دەپ تە ويلايسىڭ. سەبەبى، "ال، ساعان دەموكراتيا" دەپ لاق ەتكىزىپ بەرە سالسا ءدال قازىرگى ساياسي مادەنيەتىمىزبەن سول دەموكراتيانى اقىلمەن قولدانۋعا وي-ورەمىز جەتپەيتىن سەكىلدى. ءبىر-ءبىرىمىزدى ورتەپ جىبەرەمىز-اۋ.

باۋىرجان سەرىكبايدىڭ facebook پاراقشاسىنان

Abai.kz