اقتوبەگە گاسترولدىك ساپارمەن قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى ماقپال ءجۇنىسوۆانىڭ كەلەتىنىن ەستىپ، الدىن الا سۇحبات الۋعا ۋاعدالاسقانىمىز بار-دى. الاشتىڭ ءانشى قىزىنىڭ ونەر جولىندا جۇرگەنىنە بيىل تۋرا 30 جىل تولىپتى. ونەر يەسىنىڭ باستان كەشكەن قۋانىشى دا، قايعىسى دا حالىقتىڭ كوز الدىندا ءوتىپ جاتىر دەسەك، ارتىق ايتپاسپىز. «نۇر استانا» جاستار اپتالىعى اتىنان انشىمەن اڭگىمە-دۇكەن قۇرىپ، ونىڭ ونەردەگى عانا ەمەس، ساحنا سىرتىنداعى ءومىرى تۋرالى اڭگىمەلەسكەن ەدىك.

«ومىردە قۋانىش پەن قايعى قاتار جۇرەدى»

اقتوبەگە گاسترولدىك ساپارمەن قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى ماقپال ءجۇنىسوۆانىڭ كەلەتىنىن ەستىپ، الدىن الا سۇحبات الۋعا ۋاعدالاسقانىمىز بار-دى. الاشتىڭ ءانشى قىزىنىڭ ونەر جولىندا جۇرگەنىنە بيىل تۋرا 30 جىل تولىپتى. ونەر يەسىنىڭ باستان كەشكەن قۋانىشى دا، قايعىسى دا حالىقتىڭ كوز الدىندا ءوتىپ جاتىر دەسەك، ارتىق ايتپاسپىز. «نۇر استانا» جاستار اپتالىعى اتىنان انشىمەن اڭگىمە-دۇكەن قۇرىپ، ونىڭ ونەردەگى عانا ەمەس، ساحنا سىرتىنداعى ءومىرى تۋرالى اڭگىمەلەسكەن ەدىك.

«ومىردە قۋانىش پەن قايعى قاتار جۇرەدى»

- ءوزىڭىز انگە قوسقان مەرەيىڭىز ءوسىپ جاتىر ما؟ مەكتەپتەگى ۇلگەرىمى قالاي؟
- شۇكىر، جامان ەمەس، ازىرگە ءبارى «5» قوي. ءتارتىبى دە، ۇلگەرىمى دە جاقسى. جاقىندا توعىزعا تولدى. انە-مىنە دەگەنشە، 2-سىنىپتى دا اياقتادى، قازىر جازعى دەمالىستا ءجۇر.
- قىزىڭىز وسكەندە كىم بولعىسى كەلەدى؟ «ماما، ءان ايتامىن، ساحناعا شىعارشى» دەمەي مە؟
- (كۇلىپ). جوق. باسىندا ءان ايتامىن دەپ، ازداپ ۇمتىلعانى بار. كەيىن ول ويىنان اينىپ قالدى. ەندى «ماما، مەن عالىم بولامىن» دەيدى. «جارايدى، كىم بولساڭ دا، امان بولشى» دەپ، كۇلىپ قويامىن. بولاشاقتا قانداي ماماندىقتى تاڭدايتىنى ازىرگە بەلگىسىز. دارىندى بولسا، نەگە ءانشى اتانباسقا؟! ايتسە دە، بارلىعىن ۋاقىتتىڭ ءوزى كورسەتەدى.
ءبىر انىعى، اناسى رەتىندە مۇمكىندىگىمشە بار جاعدايدى جاساپ جاتىرمىن. بىرنەشە ۇيىرمەگە بارىپ، قوسىمشا ساباقتارعا قاتىسادى. ايتىپ-ايتپاي نە كەرەك، ءتىل بىلگەن كىم-كىمگە دە جاقسى عوي... سوندىقتان قىزىمنىڭ اعىلشىن ءتىلىن مەڭگەرۋىن قالاپ، ءبىر-ەكى جىل بۇرىن رەپەتيتورعا بەرگەنمىن. قازىرگى تاڭدا مەرەيىمنىڭ اعىلشىنشاسى «ۇرىپ» تۇر، سويلەگەندە تۋرا سول ەلدىڭ قىزى سياقتى (كۇلىپ).
- ءسىز گاسترولدە جۇرگەندە قىزىڭىزعا كىم قارايدى؟ الدە جولعا شىققاندا وزىڭىزبەن بىرگە الىپ جۇرەسىز بە؟
- جو-عا، وقۋى بار عوي، ۇنەمى ۇيدە قالدىرامىن. جاز مەزگىلىندە بولماسا، قىزىمدى الىس ساپارعا الىپ شىقپايمىن. الىپ جۇرگەن كۇننىڭ وزىندە، اناۋ ايتقانداي ازىرگە ونەرى دە جوق، ونى شارشاتىپ نە ىستەيمىن؟!
ۇيدە ۇلكەن اپكەم، ونىڭ قىزى، مەن جانە مەرەي - تورتەۋمىز تۇرامىز. مەن گاسترولگە شىققاندا، قىزىما سولار قارايدى. بالا كۇتۋشى، ءۇي قىزمەتشىسى دەگەن مەندە اتىمەن جوق. بارلىعىن دا ءوزىمىز ىستەيمىز.
- ۇيگە كۇندەلىكتى ازىق-تۇلىك اكەلۋ كىمنىڭ موينىندا؟ قولىڭىز قالت ەتكەندە ءوزىڭىز باراتىن شىعارسىز؟..
- البەتتە. قولىم بوس بولعان كەزدە عانا ەمەس، اپتاسىنا كەمىندە ءبىر رەت بازار جاقتى ارالاپ قايتاتىنىم بار. ەت، ۇن، كوكونىس ساتىپ الۋ كەرەك دەگەندەي...
- قاراپايىم جۇرتشىلىق باراتىن دۇكەندەرگە كىرەسىز بە، الدە الدىن الا تاپسىرىس بەرۋدى ءجون كورەسىز بە؟
- ءويبۇ-ءۇ-ءۇي، الماتىداعى كادىمگى «كوك بازارعا» بارامىن. ەرتەڭگى ساعات 8-دە سوندا بولىپ، قاجەتتى دەگەن زاتتاردى ەشكىم كەلمەي تۇرعاندا ساۋدالايتىنىم بار. وسىلايشا، بىرنەشە جىلدان بەرى «كوكبازارداعى» شاعىن دۇكەننەن ساۋدا جاسايمىن.
- قانشا ايتقانمەن، تاڭەرتەڭ دە بازاردا جۇرەتىن ادام قاراسى كوپ. سوزىڭىزگە قاراعاندا، وققاعارىڭىز دا جوق سياقتى...
- ونداي ادام (وققاعاردى ايتادى - ا.ت.) زاكەڭنىڭ ءتىرى كەزىندە دە بولماعان، اينالايىن. ول كەزدە بولماعان وققاعاردىڭ قازىر كەرەگى دە شامالى. اجال كەلسە، ەشنارسەگە قارامايدى ەكەن. شىنىمەن كۇزەتشىلەردىڭ كومەگى بولسا، زاكەڭدى ءوز ۇيىندە اتىپ ولتىرمەس ەدى عوي... ءبارى دە الدامشى، قانشا تىرىسساڭ دا، ولىمنەن قاشىپ قۇتىلا المايسىڭ...
وتاعاسىم كەزىندە «ساعان كولىك جۇرگىزىپ نە كەرەك؟!» دەپ رۇقساتىن بەرمەگەن ەدى. بىراق جاقىندا جۇرگىزۋشى كۋرسىن وقىپ، «پراۆا» الدىم. ايتپاقشى، زاكەڭە قىزمەت ەتكەن كولىك جۇرگىزۋشى ءالى قىزمەت كورسەتەدى. سول ەكەۋمىز ەرتەمەن شىعىپ، ۇيگە ازىق-تۇلىك الامىز.
- ەلگە تانىمال ادامسىز...
- ال تانيتىندار بارشىلىق قوي... كوپشىلىگى كورگەندە امانداسىپ تا جاتادى. ءتىپتى، «كوك بازاردىڭ» قايىرشىلارىنا دەيىن مەنى كۇتىپ جۇرەتىنى بار...
- نەلىكتەن؟!
- «كوك بازاردا» قايىر سۇرايتىن 3-4 كەمپىر بار. بارعان سايىن سولارعا 5-6 مىڭ تەڭگەدەن ۇستاتىپ كەتەمىن. «و-و، ماقپال كەلە جاتىر» دەپ، ولار ءاردايىم ءماز بولعاندا، كادىمگىدەي جانىم اشيدى... كەيىن اراعا اپتا سالىپ، قايتا كەلگەندە، «وتكەندەگى اقشانى مىناعان جۇمسادىم» دەپ كادىمگىدەي ەسەپ بەرىپ جاتادى (كۇلىپ). جالپى، قاي بازارعا باس سۇقپاڭىز، قايىرشىلاردىڭ دەنى - قاراكوزدەر. وسىدان-اق قازاقتىڭ جاعدايى وڭىپ تۇرماعانىن بايقايسىڭ...
- وسى رەتتە، ءسىزدى قوعامداعى قانداي ماسەلەلەر تولعاندىرادى؟
- اۋەلى ەلدىڭ جاعدايى الاڭداتادى. بۇرىنعىداي ەمەس، باي مەن كەدەيدىڭ اراسى الشاقتاپ كەتتى. اۋقاتتى ادامدار بايىعان ۇستىنە بايىپ جاتىر، ال كەدەي-كەپشىك كۇنىن كورە الماي ءجۇر...
اۋىلدىڭ تۇرمىسى دا كوڭىل كونشىتەرلىك ەمەس. باسقاسىن ايتپاعاندا، ءالى كۇنگە اۋىز سۋى، جارىعى مەن كوگىلدىر وتىنى جوق ەلدى مەكەندەر بار، سەنەسىز بە؟! بيلىك باسىندا وتىرعانداردىڭ دەنى اۋىلدان شىققان ازاماتتار ەكەنى شىندىق. سولار نەگە ءوسىپ-وركەندەگەن جەرىن ۇمىتتى ەكەن؟! تۇسىنبەيمىن!..
- ءوزىڭىز جابىرقاعان ساتتە كىمنەن جۇبانىش ىزدەيسىز؟
- مەن جۇبانىشتى تەك قانا مۇقاڭنىڭ (مۇقاعالي ماقاتاەۆتى ايتادى - ا.ت.) پوەزياسىنان تاپقاندايمىن. قينالعان كەزدە اقيىق اقىننىڭ ولەڭدەرىن وقىپ، ءبىر تۇشىنىپ الاتىنىم بار. بۇدان بولەك قىزىمدى كورگەندە كوڭىل كۇيىم بىردەن وزگەرەدى. قانشا ايتقانمەن، بارىم دا، نارىم دا سول عوي...
- سوزىڭىزگە قاراسام، سىزدە دوس جوق سەكىلدى؟..
- اقتوتى رايىمقۇلوۆا ەسىمدى جالعىز قۇربىممەن عانا سىرلاسامىن. اندا-ساندا بولماسا، ونىمەن كەزدەسۋدىڭ دە كوپ ءساتى تۇسە بەرمەيدى. سوسىن بار مۇڭىمدى اناما ايتامىن. كوزىمنىڭ جەتكەنى، شەشەمنەن ارتىق مەنى تۇسىنەتىن جان كەمدە-كەم. نەسىن ايتايىن، ومىردە قۋانىش پەن قايعى قاتار جۇرەدى، سونى بىرەۋمەن بولىسكەنگە نە جەتسىن؟! الايدا، اتالعان ەكى ادامعا عانا جان سىرىمدى جەتكىزەمىن، قالعانىنا جۇمباق جانمىن...

«ءوزىمنىڭ ءتوزىمدى ەكەندىگىمە كوزىم جەتتى...»

- زامانبەك اعامىزدىڭ قايتىس بولعانىنا بەس جىلدان اسىپتى. قىلمىستىق ءىس اقىرى «جابۋلى قازان» كۇيىندە قالدى ما؟
- (كۇرسىنىپ). ءيا، اياقسىز قالدى. العاشىندا قىلمىستىق ىسكە جابىرلەنۋشى رەتىندە اپاسى پەن ۇلىن العاسىن-اق، زاڭ بويىنشا سولار قوزعاۋ سالۋى ءتيىس ەدى. الايدا، بىرنەشە جىل بۇرىن اپاسى دۇنيە سالدى، ال ارتىندا قالعان تۇياعى قازىر جوعارى لاۋازىمدى قىزمەتتە... سودان بولار، ماسەلەنىڭ اق-قاراسىن بىلۋگە نيەتتى جان جوق. مەنى بولسا، ماڭايلاتقان جوق... نەسىن ايتايىن، بۇنى ۋاقىتتىڭ ءوزى ەكشەپ الار دەگەن ۇمىتتەمىن. ايتپەسە، مەنەن باسقاسىنىڭ ءبارى اقىرى ءۇنسىز قالدى عوي. ءبىر اللاعا عانا تاپسىردىم...
- ازاماتىڭىز ەلگە تانىمال تۇلعا بولدى ەمەس پە؟! جوعارىدا اتالعان جاقىندارىن ايتپاعاندا، قىلمىسكەرلەردى ىزدەستىرۋگە بۇرىنعى قىزمەتتەستەرى، دوس-جاراندارى كىرىسپەدى مە؟
- جوق. بيلىكتە جۇرگەندە دوستارى جەتىپ ارتىلاتىن. كەيىن ءبىراز ۋاقىت ۇيدە جۇمىسسىز وتىرىپ قالعاندا، جاعدايىن سۇراپ كەلگەندەر ساۋساقپەن سانارلىقتاي بولدى. قىلمىستىق ءىستى اشۋعا جاردەمدەسپەك تۇگىل، ولار بەس جىلدىڭ ىشىندە «ماقپال، جاقسىسىڭ با؟ مەرەي ءوسىپ جاتىر ما؟» دەپ اماندىعىمدى دا سۇراۋعا جارامادى. سوعان قاراعاندا، زاكەڭنىڭ مۇلدەم ادال دوسى بولماعان سەكىلدى. ءبىر سوزبەن ايتقاندا، قاراپايىم حالىقتان باسقا ەشكىم باس سۇققان جوق.
- كەزىندە بۇقارالىق اقپارات قۇرالدارى ۇيىڭىزدە 16 بەينەكامەرانىڭ ورناتىلعانى جونىندە ايتىلعان-دى. تىم قۇرىعاندا قىلمىستىق ءىستى اشۋدا سولاردىڭ سەپتىگى تيمەدى مە؟
- جو-عا، ولاردىڭ قازىر كولەڭكەسى دە كورىنبەيدى. وعان جاۋاپتى ماماندار دا وسىدان بەس جىل بۇرىن قاشىپ كەتتى... اتالعان ادامداردىڭ دا ءومىر سۇرگىسى كەلەتىن بولار، تۇسىنىستىكپەن قارادىم. «ۋاقىت - سىنشى» عوي، ءارى قان دا جىبەرمەيدى دەپ جاتامىز... سول سەبەپتى، مەن ەشتەڭە دە ايتا المايمىن، جالعىز ادامدى كىم تىڭداسىن؟!
- ول كىسىنىڭ قۇرمەتىنە اشىلعان مۇراجاي كەلۋشىلەردى بۇرىنعىداي قابىلداپ جاتقان بولار؟..
- ءيا، جۇمىسىن توقتاتقان جوق، ەسىگى قاشان دا اشىق. بىراق، بۇرىنعىداي ەمەس، كەلۋشىلەردىڭ قاتارى سيرەدى. تەك زاكەڭنىڭ تۋعان جانە ومىردەن وتكەن كۇندەرىندە كەلىپ، دۇعا باعىشتايتىندار كەزدەسەدى. سوسىن دەمالىس كۇندەرى دە كەلىپ جاتادى. قولدان كەلگەنشە بىردە-ءبىر ادامنىڭ كوڭىلىن قالدىرماي، مۋزەيدەگى جادىگەرلەرمەن تانىستىرۋعا تىرىساتىن اپامنىڭ بارىن ايتسام دەيمىن.
- جارىڭىزدىڭ ءبىرىنشى نەكەسىنەن تۋىلعان باۋىرلارىمەن قىزىڭىز ارالاسىپ تۇرا ما؟
- جوق. ەگەر وزدەرى قالاماسا، مەرەيىم نەگە ارالاسۋى كەرەك؟! كوپشىلىككە بەلگىلى بولار، قۇرالايدىڭ ءوزى ءبىر باسىلىمعا «ەكەۋىمەن دە مۇلدەم ارالاسقىم كەلمەيدى» دەپ سۇحبات بەرىپتى. سول سەبەپتى ولارمەن كەزدەسۋگە مەنىڭ دە قۇلقىم جوق.
- الايدا، بارلىعىنىڭ قانى ءبىر عوي. مەرەيدىڭ ولاردان باسقا باۋىرلارى جوق دەگەندەي...
- قانى ءبىر بولسا دا، ولارمەن قىزىمدى ارالاستىرمايمىن. سەبەبى، قۇرالايدىڭ كەزىندە ماعان كورسەتپەگەنى جوق. ول ازداي، زاكەڭ قايتقاندا «اكەمىزدى ولتىرگەن - سەن!» دەپ، جالا جاپقانى دا ەشقاشان ەسىمنەن كەتپەيدى. شىنىمدى ايتسام، قىزىممەن ارالاستىرماق تۇگىل، ولاردى كورگىم دە كەلمەيدى.
- جالپى، بەس جىل بۇرىنعى مەن بۇگىنگى ماقپالدىڭ ايىرماشىلىعى بار ما؟
- ونى حالىقتىڭ ءوزى بىلەدى دەپ ويلايمىن. دەگەنمەن، سول قاسىرەتتى وقيعادان سوڭ، ءوزىمنىڭ ءتوزىمدى ەكەندىگىمە كوزىم جەتتى. العاشقى جىلدارى ءومىر سۇرگىم كەلمەي، قاتتى ءتۇڭىلدىم. ايتكەنمەن، ارتىمدا حالقىمنىڭ، اعايىن-باۋىردىڭ، باستىسى - انامنىڭ بار ەكەنىن ايرىقشا سەزىنىپ، سول ارقىلى عۇمىر كەشۋگە قۇلشىنىسىم ارتتى دەسەم بولادى. زاكەڭدەي ەشقايسىسى بولا الماعانمەن، ايتەۋىر ولاردىڭ رۋحاني تۇردە دەمەۋ كورسەتكەنىنە ريزامىن. «ءتىرى ادام تىرشىلىگىن جاسايدى» دەگەن راس ەكەن، ءومىر ءوز كەزەگىمەن جالعاسىپ جاتىر...

«ومىردە ەمەس، ونەردە جولى بولعان اداممىن...»

- ءسىزدى تويعا ءجيى بارمايتىن انشىلەردىڭ ءبىرى دەپ ەستيمىز...
- ءجيى شىقپاعانمەن، شامام جەتكەنشە شاقىرعان جەردەن قالماۋعا تىرىسامىن. قولقا سالاتىندار از ەمەس، بىراق كوبىنە-كوپ مۇمكىندىگىمە قارايمىن. الىس جەر بولسا، ويلانىپ قالامىن دەگەندەي... قانشا تولەيتىنىن دە الدىن الا انىقتاپ سۇراپ الامىن. امال جوق، ادەمى بولىپ جۇرگىڭ كەلسە، تويدا ءان ايتۋعا تۋرا كەلەدى. نەگىزگى تابىس كوزىمىز سول عوي. اسىرەسە، جاڭادان كويلەك كيگىم كەلگەن كەزدە، تويشى قاۋىممەن كەزدەسەتىنىم بار (كۇلىپ). دەسەك تە، اقشانىڭ تۇبىنە ەشكىمنىڭ دە جەتپەگەنى بەلگىلى، شەكتەن شىعىپ، توي قۋىپ كەتۋگە تاعى بولمايدى.
- شىنىڭىزدى ايتىڭىزشى، تويداعى «ستاۆكاڭىز» قانشا؟..
- ەڭ ازى - 1 مىڭ اقش دوللارى. وندا دا قاتتى قىسىلىپ، جاعدايى بولماي تۇرعاندا عانا كەلىسەمىن. كەيدە سونىڭ جارتىسىنا دا قازاقى كوڭىلمەن 5-6 ءانىمدى شىرقاپ كەتەتىنىم بار. ءبارى دە ادامنىڭ قالتاسىنا قاراي شەشىلەدى دەسەم بولادى.
- ال ەڭ كوپ اقشا تاپقان تويىڭىزدى ايتا الاسىز با؟
- بىزدە اتىمتاي جومارتتار ىلۋدە بىرەۋ. كوپشىلىگى ەلىمىزدەگى انشىلەردەن گورى، اقشاسىن شەتەلدەن كەلگەن «جۇلدىزدارعا» ۇستاتۋعا قۇمار.
تويدا ونەر كورسەتىپ، ەڭ كوپ قاراجاتتى وسىدان ءبىر-ەكى جىل بۇرىن العانمىن. الماتىدا بولعان ءبىر تويدا 10 مىڭ اقش دوللارىن ۇستاتتى.
- قۇپيا بولماسا، بۇل كىمنىڭ قۋانىشى ەدى؟
- بولات نازارباەۆتىڭ كەلىنشەگى مەنىڭ اندەرىمدى ءسۇيىپ تىڭدايدى ەكەن، سول كىسىنىڭ اتىنان ماعان قوڭىراۋ شالعان كىسى، «مىنا كۇنى كەلە الاسىز با؟» دەپ ۇسىنىسىن ءبىلدىردى. سودان تويعا كەلگەن قاۋىمدى بيلەتىپ، 5-6 ءاندى شىرقادىم. توي اياقتالدى-اۋ دەگەن تۇستا جينالىپ جاتقانىمدا، زامانداسىم «كەلگەنىڭىزگە راحمەت» دەپ، قولىما كونۆەرت ۇستاتتى. ۇيگە كەلگەن سوڭ، اشىپ قاراسام، 10 مىڭ اقش دوللارىن سالىپتى. «وي، امان بول!» دەدىم (راحاتتانىپ كۇلدى). اقشانى كىم جاقسى كورمەيدى دەيسىز؟! ەڭبەكتىڭ ءتيىستى دەڭگەيدە ەلەنگەنىن ءبىز دە قالايمىز.
- قارسى بولماساڭىز، ەڭ قىمبات ساحنالىق كيىمىڭىزدىڭ قۇنىن بىلسەك دەپ ەدىك...
- كويلەكتەرىمدى كوبىنەسە بەلگىلى ديزاينەرلەرگە تىكتىرەمىن. ارقايسىسىنىڭ باعاسى ءبىر مىڭ اقش دوللارىنان باس-تالادى. بۇرىنعىداي جىلتىرعا ءۇيىر ەمەسپىن، جاسىما سايكەس كويلەك كيگەندى ءجون كورەمىن. قانشا ايتقانمەن، جاسىمىز كەلىپ قالدى... مەنىڭ ەڭ قىمبات ساحنالىق كوستيۋمىم - 5 مىڭ اقش دوللارىنا تەڭ.
جالپى، مەن وزىمنەن اقشانى ايامايتىن اداممىن. بارلىعى دا حالىقتىڭ ارقاسىندا كەلىپ جاتقاسىن، سولاردىڭ الدىندا ارقاشان جارقىراپ جۇرگىم كەلەدى. سەنبەۋىڭىز دە مۇمكىن، بانكتەگى جەكە ەسەپشوتىمدا كوك تيىن دا جوق. بۇگىنگە دەيىن اقشا جيناپ كورمەپپىن...
- قويىڭىزشى...
- راس ايتام. قالاي كەلەدى، سولاي كەتەدى. اقشانى بانكىدە ساقتاۋعا مۇلدەم ەبىم جوق. وعان قوسا، وتباسىمىزدا توعىز اعايىندىمىز، باۋىرلارىم، ولاردىڭ بالالارى بار... «ماقپال تاتە» دەپ كەلىپ تۇرعاندا، كوڭىلىن قيمايمىن... ءبىزدىڭ كورگەن قيىندىعىمىزدى سولار كورمەسىن دەگەن وي عوي.
- ءانشى رەتىندە قاي مەكەمەدەن جالاقى الاسىز؟
- وتىز جىلدان بەرى «قازاقكونتسەرتتىڭ» جەكە ءانشىسىمىن. ارا-تۇرا «مەن بارمىن» دەپ، باستىقتارعا بارىپ سالەم بەرەمىن (جىميىپ). جۇمىس ورنىمدا جەكە بولمەم جوق، ول جەرگە تەك اقىن-سازگەرلەرمەن، ءوزىڭىز سياقتى جۋرناليستەرمەن كەزدەسۋ ءۇشىن عانا بارامىن. سول-اق.
- الداعى ۋاقىتتا ءوزىڭىزدىڭ جەكە مۋزىكالىق مەكتەبىڭىزدى اشۋ ويىڭىزدا جوق پا؟ سىزگە ەلىكتەيتىن ماقپالداردىڭ سانى ءبىرشاما كورىنەدى...
- قازاق ەستراداسىنداعى ماقپال يسابەكوۆانىڭ ەسىمىن اجەسى مەن سياقتى ءانشى بولسىن دەپ ىرىمداپ قويعانىن وزىنەن ەستىدىم. ونەردەگى تاعى ءبىر ءسىڭلىم، ديحانباەۆانىڭ دا اتىن سونداي ماقساتپەن قويسا كەرەك. شۇكىر، جەر-جەردە كىشكەنتاي ماقپال ءجۇنىسوۆالار ءوسىپ كەلەدى. ولاردىڭ ءبىرازى ءانشى بولسا، قالعاندارى اقىن، جۋرناليست، مۇعالىم... وتكەن جىلعى كونتسەرتىمدە 32 اتتاسىمنىڭ باسىن قوسىپ، حالىققا تانىستىرعانىم بار. نەگىزى، ولاردىڭ سانى بۇدان الدەقايدا كوپ.
مۋزىكالىق مەكتەپ اشىپ، ۇستازدىق ەتۋ ازىرگە جوسپاردا جوق. حالىققا كەرەك كەزىمدە ءانىمدى ايتسام دەيمىن. كەيىن جاس كەلگەندە ۇستازدىق جاعىن ويلانا جاتارمىن...
- سوڭعى سۇراق، ونەردە جۇرگەنىڭىزگە بيىل اتتاي 30 جىل بولدى. وسى ۋاقىتتىڭ ىشىندە ءانشى رەتىندە قانداي وي ءتۇيدىڭىز؟
- كەيدە كەيبىر كىسىلەر: «ماقپال، ءسىز «يدەالنىي» ادامسىز» دەپ جاتادى. ارينە، ىقىلاستارىنا راحمەت، بىراق مەن ءوزىمدى ول ساناتتاعى ادامداردىڭ قاتارىنا قوسپايمىن. مەنىڭ دە وزىمە ءتان كەمشىلىكتەرىم بار. بىلگەنىمنەن بىلمەگەنىم، كورگەنىمنەن كورمەگەنىم كوپ... ايتكەنمەن، بويىمداعى سول كەم-كەتىكتى جويۋ ءۇشىن كۇش سالىپ جاتقانىم راس...
ەڭ باستىسى، ونەر ادامىنا توزىمدىلىك كەرەك دەر ەدىم. قاي جاعىنان بولسىن، شىدامدى ادام تۇبىندە بيىك بەلەستەن كورىنەدى. ءوزىم ومىردەن بۇرىن ونەردە جولى بولعان ادام سياقتىمىن. سوندىقتان بارلىق ادامنىڭ الدىمەن ءتوزىمدى بولۋىنا تىلەكتەسپىن.
- ونەر ساحناسىنداعى مەرەيتويىڭىز قۇتتى بولسىن! «نۇر استانا» اپتالىعىنىڭ اتىنان قىزىڭىز بەن وزىڭىزگە اماندىق تىلەيمىز!
- راحمەت، اينالايىن، سىزدەرگە دە سونى تىلەيمىن!

اڭگىمەلەسكەن ايبەك تاسقالي

http://nurastana.kz/?p=1799