قىزىلوردا وبلىسى، قازالى اۋدانى ايتەكە بي كەنتىندەگى «جەڭىس» ساياباعىندا «قامقور Park» اللەياسى اشىلدى، - دەپ حابارلايدى اباي-اقپارات.

قازرىگى تاڭدا قازالى ءوڭىرىن جاسىل جەلەككە اينالۋى ءۇشىن اۋدان كولەمىندە كوپتەگەن جۇمىستار اتقارىلۋدا. جىل سايىن كوكتەمگى كوركەيتۋ-كوگالداندىرۋ، سانيتارلىق تازالىق ايلىعى كەزىندە اۋدان ورتالىعىنىڭ وزىندە التى مىڭنان استام كوشەتتەر وتىرعىزىلىپ، بۇرىننان بار تالدار رەتكە كەلتىرىلگەن. اللەيانىڭ اشىلۋ سالتاناتىندا اۋدان اكىمى مۇرات ەرگەشباەۆ:

– تۋعان جەردىڭ گۇلدەنۋىنە تۇرعىندارمەن قاتار، مەكەمە-كاسىپورىن ۇجىمدارى دا ەرەكشە ۇلەس قوسۋدا. بۇل رەتتە اۋدانىمىزداعى عاسىردان استام تاريحى بار تەمىرجول مەكەمەلەرىنىڭ دە ناتيجەلى جۇمىستارىن ايتا كەتكەن ورىندى. جاقىندا دياس تولەيتايۇلى سۇلەيمەنوۆ باسقاراتىن «قامقور مەنەدجمەنت» جاۋاپكەرشىلىگى شەكتەۋلى سەرىكتەستىگى ارنايى «قامقور GREEN» باعدارلاماسىن قابىلداپ، رەسپۋبليكا كولەمىندە اۋقىمدى شارالاردى قولعا الدى. سونىڭ ءبىرى «قامقور Park» جوباسى. بۇل شاعىن قالالاردىڭ تۇرعىندارى ءۇشىن سالاۋاتتى جانە ەستەتيكالىق تولىققاندى تابيعي ورتانى قۇرۋ ءۇشىن اعاش وتىرعىزۋ اكتسياسى.بۇگىن وسى اكتسيانىڭ اياسىندا «جەڭىس» ساياباعىنىڭ ىشىنەن ارنايى اللەيا اشىلىپ، تۇرعىندارعا تارتۋ ەتكەلى وتىر.سىزدەردى «قامقور Park» اللەياسىنىڭ اشىلۋىمەن شىن جۇرەكتەن قۇتتىقتايمىن. جاڭا اللەيا ەلدىڭ يگىلىگىنە قىزمەت ەتىپ، حالىقتىڭ، جاستاردىڭ دەمالاتىن ورنىنا اينالسىن، – دەپ ىزگى تىلەگىن ءبىلدىردى.

ودان ءارى «قامقور مەنەدجمەنت» جشس باس ديرەكتورىنىڭ ورىنباسارى رۋسلان شاكەنوۆ،قازاقستان تەمىر جولىنىڭ ەڭبەك ارداگەرى، كەڭەس وداعىنىڭ قۇرمەتتى تەمىرجولشىسى، باتىس قازاقستان تەمىر جولىنىڭ ۆاگون شارۋاشىلىعىندا باسشى قىزمەتىن اتقارعان بيسەمباي مايسۋتوۆ، اۋداندىق «ارداگەرلەر ۇيىمى» قوعامدىق بىرلەستىگى كەڭەسىنىڭ توراعاسى ورازعالي بەكبانوۆ بۇگىنگى شارانىڭ ماڭىزدىلىعىنا توقتالىپ، جاڭا اللەيانىڭ اشىلۋىمەن قۇتتىقتادى.

ايتا كەتەيىك، اتالعان اللەيانىڭ اشىلۋىنا تالعات الىپباەۆ باسقاراتىن قازالى ۆاگون جوندەۋ دەپوسى – «قامقور ۆاگون» فيليالى مۇرىندىق بولدى. ىرگەلى ۇجىم تۇرعىندار ءۇشىن ارنايى جۇرگىنشى جول سالىپ، ورىندىقتار ورناتتى. تەمىرجولشىلاردىڭ كومەگىمەن اللەيانىڭ ىشىندە 500 ءتۇپ كوشەت وتىرعىزىلدى.

Abai.kz