بيزنەسكە كەدەرگى كەلتىرەتىن بارلىق توسقاۋىلداردى جويۋ قاجەت. بۇل تۋرالى نۇر-سۇلتان قالاسىنىڭ اكىمدىگىندە وتكەن ەلوردانى ودان ارى دامىتۋ ماسەلەلەرى جونىندەگى ماجىلىستە مەملەكەت باسشىسى قاسىم-جومارت توقاەۆ ايتتى.

«بيزنەسكە كەدەرگى كەلتىرەتىن بارلىق توسقاۋىلداردى جويۋ قاجەت. كاسىپكەرلەر ءۇشىن ينجەنەرلىك جەلىلەرگە قوسىلۋ ايتارلىقتاي پروبلەما بولىپ وتىر. جەر ۋچاسكەلەرىن جالعا بەرۋ اۋكتسيوندارىندا كوممۋنيكاتسيالارعا قوسىلۋعا تەحنيكالىق مۇمكىنشىلىكسىز ءجيى ۇسىنىلىپ جاتادى. نەمەسە قۇرىلىس بارىسىندا بۇرىن بەرىلگەن شارتتار وزگە شارتقا وزگەرتىلەدى. مىسال كەلتىرە كەتەيىن، «Premium Development Life Park» جشس-دا ەلەكتر كوزىنە قوسىلۋدا پروبلەما بولدى. اتاۋى وتە قىزىقتى ەكەن. جالپى، بۇل كومپانيانىڭ اتاۋى نەلىكتەن قازاق تىلىندە بولمايدى؟ ءبىز جاڭا كومپانيالارىمىزدى ەڭ الدىمەن، قازاق تىلىندە اتاۋىمىز كەرەك. بۇل ماسەلەنى نازارعا الۋ كەرەك»،- دەدى قاسىم-جومارت توقاەۆ.

مەملەكەت باسشىسىنىڭ دەرەگىنشە، اتالعان كومپانيا قوسىلۋى ءتيىس ەلەكتر جەلىسى «سارىارقا» ۆەلوترەگىنىڭ اۋماعىندا بولعان. ال ۆەلوترەك باسشىلىعى كومپانيانى ءوز اۋماعىنا جىبەرمەگەن.

«ۆەلوترەك باسشىلىعى جوعارى ۆولتتى جابدىقتار مەن كابەلدەردى «استانا رەك» اق-نىڭ بالانسىنا بەرۋ قاجەتتىگىن ايتقان. وسىنداي اۋرە-سارساڭنىڭ سالدارىنان جەكە قاراجاتقا سالىنعان جالپى اۋدانى 30 مىڭ شارشى مەتردى قۇرايتىن 340 پاتەرلىك تۇرعىن ءۇي 8 اي بويى پايدالانۋعا بەرىلمەگەن. بۇل – جول بەرۋگە بولمايتىن جاعداي دەپ ەسەپتەيمىن. بولىنگەن ۋچاسكە بارلىق جەلىلەرگە قوسىلىپ، دايىن بولۋى ءتيىس. التاي سەيدىرۇلى، ينجەنەرلىك جەلىلەرگە قوسىلۋ ماسەلەسىن تارتىپكە كەلتىرۋ قاجەت»، – دەدى قر پرەزيدەنتى ەلوردا اكىمى كولگىنوۆكە قاراتا.

دەرەككوز: قازاقپارات

Abai.kz