مەملەكەت باسشىسى مەن باق وكىلدەرىنىڭ كەزدەسۋى كيەۆتەگى فۋد ماركەت زالىندا ءوتتى. جۋرناليستەردىڭ دەنىنىڭ سۇراعى اقش پرەزيدەنتىمەن تەلەفون ارقىلى سويلەسۋى مەن دونباسستاعى جاعدايعا قاتىستى بولدى.

اقش-تا جانجال بولىپ جاتقان دونالد ترامپپەن تەلەفون ارقىلى سويلەسۋىنە قاتىستى، زەلەنسكي ۋكراينانىڭ قۇراما شتاتتاردىڭ ىشكى ساياساتىنا ارالاسۋىن قالامايمىن دەدى. ول ترامپتىڭ وزىنە قىسىم جاساماعانىن تاعى قايتالادى. ال اقش ۆيتسە-پرەزيدەنتى بولعان دجو بايدەننىڭ ۇلىنا قاتىستى تەرگەۋ جۇمىستارى تەك امەريكالىق پروكۋراتۋرا سۇراسا عانا، زاڭ اياسىندا جۇرەدى دەدى.

زەلەنسكيگە كوپ قويىلعان سۇراقتاردىڭ ءبىرى مينسكىدە قول قويىلعان "شتاينمايەر فورمۋلاسىنا" قاتىستى بولدى. وزدەرىن وزدەرى جاريالاعان دحر مەن لحر-عا ەرەكشە مارتەبە بەرەتىن قۇجات ۋكراينا حالقىنىڭ نارازىلىعىن تۋعىزعان. زەلەنسكي بۇل ماسەلەگە قاتىستى "جاڭا مايداننان" قورىقپايتىنىن ءارى ءتيىستى زاڭ قابىلدانبايىنشا اتالعان ايماقتارعا ەرەكشە مارتەبە بەرىلمەيتىنىن اتاپ ءوتتى.

ول "نورماند تورتتىگى" فورۋمىندا قىرىم ماسەلەسىن كوتەرەتىنىن جەتكىزدى. ۋكراينا ليدەرى بارلىعى 2014 جىلى وسى تۇبەكتى باسىپ الۋدان باستالدى دەدى.

بۇگىن رەسەي پرەزيدەنتىنىڭ كومەكشىسى يۋري ۋشاكوۆ كيەۆتى "شتاينمايەر فورمۋلاسىن" ورىنداۋدان باس تارتىپ جاتىر دەپ ايىپتاپ، مينسك كەلىسىمىن جۇزەگە اسىرماي جاتىپ، "نورماند تورتتىگى" ءسامميتىن وتكىزۋ كەرەك ەمەس دەپ مالىمدەدى.

Abai.kz