سىر جۇرتشىلىعى قىزىلوردا قالاسىنىڭ 201 جىلدىعىن اتاپ ءوتتى.  بىر ايعا سوزىلعان مادەني-كوپشىلىك شارا 12 قازاندا ع. مۇراتباەۆ اتىنداعى ورتالىق ستاديوندا گالا-كونتسەرتپەن قورىتىندىلاندى.

مەرەكەلىك شارادا  ەلگە ەڭبەگى سىڭگەن بىرقاتار ازاماتتار «قىزىلوردا قالاسىنىڭ قۇرمەتتى ازاماتى» اتاعىن الىپ، العىس حاتتارمەن ماراپاتتالدى.

قالا كۇنىنە ارنالعان مەرەكەلىك شارادا وبلىس اكىمى قۋانىشبەك ىسقاقوۆ رەسەيدىڭ ەكاتەرينبۋرگ قالاسىندا وتكەن الەم چەمپيوناتىندا ەل مەرەيىن ۇستەم ەتكەن بوكسشىلار قامشىبەك قوڭقاباەۆقا 2 ملن تەڭگە، تۇرسىنباي قۇلاحمەتكە 1 ملن تەڭگە، سونداي اق ەركىن كۇرەستەن الەم چەمپيوناتىنىڭ كۇمىس جۇلدەگەرى داۋلەت نيازبەكوۆكە 2 ملن تەڭگەنىڭ جانە سپورتشىلاردىڭ باپكەرلەرىنە 500 مىڭ تەڭگەنىڭ سەرتيفيكاتتارىن تابىستادى.

«ەكى عاسىرلىق تاريحى بار قىزىلوردا بۇگىنگى كۇنى قالا حالقىنىڭ اينىماس بىرلىگىنىڭ، تىنىمدى تىرلىگىنىڭ ارقاسىندا ەكونوميكاسى قارىشتاپ دامىعان، الەۋمەتتىك الەۋەتى ارتقان قالا رەتىندە زامانعا ساي كەلبەتكە يە بولىپ كەلەدى. قارقىندى قۇرىلىس الاڭىنا اينالىپ، قالا اۋماعىن سىرداريانىڭ سول جاعالاۋىنا قاراي دامىتىپ، اۋماعى كەڭەيە باستادى. قالا ورتالىعىندا عانا ەمەس، سول جاعالاۋداعى جاڭا قالادا تۇرعىنداردىڭ ساپالى دا جايلى تۇرمىس كەشۋى ءۇشىن بارلىق جاعداي جاسالىپ، ءتۇرلى الەۋمەتتىك نىساندارمەن بىرگە تۇرعىن ۇيلەر كوپتەپ سالىنۋدا. شىندىعىندا، تۇرعىن ۇيلەر، ءتۇرلى نىساندار سانىنىڭ ارتۋى، قۇرىلىستىڭ كەڭىنەن ءجۇرۋى قالامىزدىڭ الەۋمەتتىك-ەكونوميكالىق جاعدايىنىڭ العا قاراي ىلگەرىلەي تۇسكەنىن اڭعارتادى. سۇيىكتى قالامىز قىزىلوردانىڭ بۇگىنگىدەي قۇلپىرىپ، جاسارىپ، جايناي تۇسۋىندە سىزدەردىڭ ءاربىرىڭىزدىڭ قوسقان ۇلەستەرىڭىز زور دەپ بىلەمىن. وسىنداي مەرەيلى مەرەكەدە ءار وتباسىنا قۇت-بەرەكە، مەرەكەلىك جاقسى كوڭىل-كۇي، مىقتى دەنساۋلىق، ۇزاق عۇمىر، شاڭىراقتارىڭىزعا شاتتىق تىلەيمىن»،- دەدى وبلىس اكىمى قۋانىشبەك ىسقاقوۆ.

سوڭعى جىلدارى قالادا جاڭا شاعىن اۋداندار بوي كوتەرىپ، 7 مىڭنان استام قىزىلوردالىق باسپانالى بولدى. بيىل دا بۇل شارالار قارقىندى جۇرگىزىلىپ، قۇرىلىس كولەمى وتكەن جىلدىڭ ءتيىستى كەزەڭىمەن سالىستىرعاندا 2,3 ەسەگە ارتقان. ايماقتاعى قۇرىلىس جۇمىستارىنىڭ 40 پايىزى وبلىس ورتالىعىنىڭ ۇلەسىندە.

ايماق باسشىسى قۋانىشبەك ىسقاقوۆ قۇرىلىس سالاسىنداعى جۇمىستاردىڭ ەڭ اۋقىمدىسى، سىرداريا وزەنىنىڭ سول جاعالاۋىنداعى جاڭا قالادا جۇرگىزىلىپ جاتقاندىعىن جەتكىزدى. رەسپۋبليكالىق، وبلىستىق بيۋدجەتتەردەن 820 پاتەرلىك 16 كوپقاباتتى ارەندالىق تۇرعىن ءۇي مەن 830 پاتەرلىك 17 كوپقاباتتى كرەديتتىك تۇرعىن ءۇيدىڭ قۇرىلىستارى باستالىپ، جىل سوڭىنا دەيىن پايدالانۋعا بەرىلەتىندىگىن ايتتى.

«قالا كۇنىن» اتاپ ءوتۋ شارالارى اشىق اسپان استىنداعى كتا فەستيۆالىنەن باستاۋ الدى. ودان كەيىن «قىزىلوردا مەنىڭ كوزىممەن» اتتى فوتوسۋرەتتەر كورمەسى  مەن «كوڭىلدى سەنبىلىك» اكتسياسى ءار سەنبى سايىن جۇرگىزىلدى. ال، 18-19 قىركۇيەكتە قاجىمۇقان مۇڭايتپاسۇلى اتىنداعى سپورت كلۋبىندا جاسوسپىرىمدەر اراسىندا كاراتە-دودان قالالىق اشىق بىرىنشىلىك وتكىزىلدى. "مادەنيەت مايەگى - قىزىلوردا" دەپ ايدار تاققان مادەنيەت جانە رۋحانيات اپتالىعىندا جاس وتباسىلار اراسىندا «تولاعاي» سپورتتىق سايىس، «باۋىرساق Party» مەن جاستار كارناۆالى دا ۇيىمداستىرىلدى. سونىمەن قاتار، «كوڭىلدى اۆتوبۋس»  شاراسى اياسىندا قوعامدىق كولىكتەردە قالا تۇرعىندارىنا مەرەكەلىك كوڭىل-كۇي سىيلاۋ ماقساتىندا ايماق ونەرپازدارى شاعىن كونتسەرتتىك باعدارلامالارىن ۇسىندى. اۋىل شارۋاشىلىعى ونىمدەرىنىڭ جارمەنكەسى، رەسپۋبليكالىق «اعاش وتىرعىزۋ» اكتسياسى، «بايگە» ات جارىستارى، سىر ديقاندارىنىڭ «التىن ءدان» مەرەكەسى دە وسى قالا كۇنىمەن قاتار ۇيىمداستىرىلدى.

اتالعان شارالار قازاقستان ەسترادا جۇلدىزدارىنىڭ قاتىسۋىمەن وتكەن گالا-كونتسەرتپەن قورىتىندىلاندى.

Abai.kz