جۇما, 22 قاراشا 2019
ءبىزدىڭ شەنەۋنىك 2036 11 پىكىر 14 قازان, 2019 ساعات 18:09

بوجكو دەپۋتاتتىققا لايىق پا؟

قوعام بەلسەندىلەرى ءماجىلىس دەپۋتاتى، وندا دا ءماجىلىستىڭ كىشى سپيكەرى، بۇرىنعى مينيستر ۆلاديمير بوجكونى "الەۋمەتتىك ازاردىقتى قوزدىردى" دەپ ايىپتاپ، دەپۋتاتتىق وكىلەتىن توقتاتۋدى تالاپ قىلىپتى. بۇل تۋرالى ەلىشىلىك اقپارات قۇرالدارى جازدى.

ەرتەڭ، ياعني 15 قازان كۇنى الماتىدا قوعام بەلسەندىلەرىنىڭ ءباسپاسوز جيىنى وتەدى ەكەن. جاڭاعى دەپۋتات بوجكونىڭ ماسەلەسى سول جيىندا ءسوز بولماق كورىنەدى. دالىرەك ايتساق، قوعام بەلسەندىلەرى دەپۋتات ۆلاديمير بوجكونى دەپۋتاتتىق مانداتتان ايىرۋدى تالاپ ەتىپ، قازاقستان پرەزيدەنتىنە، ەلباسىنا، ءماجىلىس توراعاسىنا، وسك توراعاسى مەن ۇقك باسشىسىنا ۇندەۋ جاساماق.

باق-تا تاراعان ءباسپاسوز بايانىندا وسىلاي دەپ حابارلانعان ەكەن.

"ماجىلىسكە "قر ورىس، سلاۆيان جانە كازاك ۇيىمدارى" زتب ۇسىنۋىمەن، قحا تىزىمىمەن وتكەن بوجكو ۆلاديمير كارپوۆيچتى قىزمەتتىك تەكسەرىس جۇرگىزۋ قاجەتتىلىگى جانە ونىڭ دەپۋتات كەزىندەگى سويلەگەن سوزدەرى مەن ءىس-ارەكەتتەرى قوعامدىق نارازىلىقتى، الەۋمەتتىك ارازدىقتى، تۋدىرعانى ت.ب. ءۇشىن قۇقىققورعاۋ ورگاندارىنا جۇگىنۋگە بايلانىستى قر ءماجىلىسى دەپۋتاتى وكىلەتتىگىنەن، سونداي-اق، "ۇقك گەنەرال-لەيتەنانتى" ارنايى اتاعىنا بەرىلەتىن جەڭىلدىكتەردەن ايىرۋ", ماسەلەسى ءسوز بولادى دەپ جازىلعان.

اقپاراتتا ءباسپاوز جيىنىنا كىمدەر قاتىساتىنى دا جازىلىپتى. ولار:

اسىلحان ارتىقپاەۆ, "قازاقستاننىڭ ورىس، كازاك جانە سلاۆيان ۇيىمدارىنىڭ كوورديناتسيالىق كەڭەسى" زتب توراعاسىنىڭ ورىنباسارى;

ۆاسيلي رەزۆان, زاڭگەر;

ميحايل كيندالەۆ, "قازاقستاننىڭ ورىس بىرلەستىگى" رقب توراعاسىنىڭ ورىنباسارى;

ۆيكتور تارانوۆ, "قازاقستاننىڭ كازاكتار بىرلەستىگى قب" زتب جەتەكشىسى، اتامان;

حاسەن قوجا-احمەت, قازاقستاننىڭ سلاۆيان-تۇرىك بەرلىگى قوزعالىسىنىڭ توراعاسى، "ازات" قازاقستاننىڭ ازاماتتىق قوزعالىسى.

ۆلاديمير بوجكوعا قاراتا بۇنداي ايىپتاۋدىڭ تۋىنداۋى تەگىننەن-تەگىن ەمەس. ميىنا كەلگەن وقىس ويلارىن ويلانباستان ايتا سالاتىن دەپۋتات مىرزا سوڭعى كەزدەرى ەركىنسىپ-اق كەتتى. سوندىقتان دا ءاربىر مالىمدەمەسى ءۇشىن داۋ-دامايدىڭ استىندا قالادى.

ەستەرىڭىزگە سالا كەتەيىك، 3 قىركۇيەك كۇنى ءماجىلىس دەپۋتاتى ۆلاديمير بوجكو قازاقستان حالقى اسسامبلەياسىنىڭ كەڭەيتىلگەن وتىرىسىنان سوڭ ەلدەگى الەۋمەتتىك كومەك الۋشىلار تۋرالى ەكى اۋىز پىكىر ايتىپ، ەل-حالىقتىڭ اشۋىن تۋدىرعان ەدى. ول كەزدە بوجكو: "تىزەرلەپ تۇرىپ مەملەكەتكە راحمەت ايتۋلارى كەرەك" دەگەن ەدى. كەيىن  ول ءتىپتى ءوز ءسوزى ءۇشىن حالىقتان كەشىرىم سۇرامايتىنىن اشىق جەتكىزگەن.

بوجكونىڭ بۇدان وزگە دە "بەيپىل سوزدەرى" جەتىپ ارتىلادى. ول ۋكراينالىق ساياساتكەردى «جەزوكشەگە» تەڭەدى. ول قازاق ءتىلىن ۇيرەنبەيتىنىن، مەملەكەتتىك تەلدە سويلەمەيتىنىن اشىق ايتتى. ول مينيستر بولعان تۇستا تابيعات اپاتتارىنان، ءولىم-جىتىمنەن قورقۋدىڭ قاجەتى جوق ەكەنىن ايتقان. ونىڭ ايتۋىنشا، ەلدە قۇرىلىس جۇمىستارى قارقىندى ءجۇرىپ جاتادى. دەمەك، قۇرىلىستىڭ اتى قۇرىلىس: ءبىرلى-جارىم ادام قۇلاماي، سۇرىنبەي تۇرمايتىن كورىنەدى. الماتىدا بازار كوپ. سوعان ساي، كوپ بازار ارەدىك ورتەنىپ تۇرۋى قاجەت ەكەن.

ال 2017 جىلى بوجكو "اۋىل جاستارىن قالاعا كىرگىزبەۋ كەرەك" دەگەن سىڭايدا پىكىر بىلدىرگەن. ونىڭ بۇل ءسوزى دە قالىڭ حالىق تاراپىنان قارسىلىققا ۇشىراپ، قىزۋ تالقىلانعان.

ودان دا ءسال ەرتەرەك، 2016 جىلى ول ۋكراينالىق ساياساتكەر يرينا فاريونعا ءتىل تيگىزگەن ەدى. رەسەي مەن ۋكراينا اراسىنداعى جاعدايدى مىسال ەتكەن ول فاريوننىڭ مالىمدەمەسىن سىنعا الدى. "تاريح الگى جەزوكشەنى، فاريوندى ورنىنا قويىپ بەرەدى دەپ ۇمىتتەنەمىن. ارينە، كەشىرىم وتىنەمىن، ول "ۋكراينادا ورىسشا سويلەيتىندەر ادام ەمەس، ولاردىڭ قۇقىعى جوق، ورىسشا اندەردى تىڭدايتىن تاكسيستەرگە ايىپپۇل سالۋ كەرەك" - دەگەن ەدى.

جاسى جەتپىسكە جەتسە دە سوزدەن ءسۇرىنىپ، تىلىنەن تاياق جەپ جۇرگەن بوجكونىڭ ءبۇلىنۋى بۇل عانا ەمەس. دەمەك، مەملەكەتتىك قىزمەتكەردىڭ ەتيكاسىنا جات پىكىرلەرىمەن تانىلعان دەپۋتاتقا قىزمەتتىك تەكسەرىس جۇرگىزىلۋى كەرەك دەگەن قوعام بەلسەندىلەرىنىڭ ۇسىنىسى ءجون-اق...

Abai.kz

11 پىكىر