ءال-باعدادي سەنبى كۇنى سيريا مەن تۇركيانىڭ شەكاراسىندا بولعان ارنايى وپەراتسيا كەزىندە قازا تاپقان. جەكسەنبى كۇنى اقش-تىڭ ۇلتتىق قاۋىپسىزدىك جونىندەگى كەڭەسشىسى روبەرت و’برايەن NBC كانالى ارقىلى يم ليدەرىنىڭ دەنەسى 2011 جىلى ولتىرىلگەن ۋساما بەن لادەننىڭ دەنەسى سەكىلدى تەڭىزگە تاستالادى دەپ مالىمدەدى. بۇل تەرروريستىك جاتقان جەرىن جاقتاستارى ءتاۋ ەتۋگە اينالدىرماس ءۇشىن، ادەيى وسىلاي تاڭداۋ جاسالعان.

دۇيسەنبى كۇنى اقش پرەزيدەنتى دونالد ترامپ ءال-باعداديدى ءولتىرۋ وپەراتسياسى كەزىندەگى ۆيدەونى جاريالاۋعا ۋادە بەرگەن. ترامپ تۋيتتەرگە وپەراتسياعا قاتىسقان يتتەردىڭ سۋرەتىن جاريالادى.

اقش شتاب باسشىلارىنىڭ بىرلەسكەن كوميتەتىنىڭ توراعاسى مارك ميللي بريفينگ كەزىندە وپەراتسيا كەزىندە تۇسىرىلگەن سۋرەتتەر مەن ۆيدەولار قۇپياسىزداندىرۋ پروتسەسىنەن ءوتىپ جاتقانىن، بۇل بىرنەشە كۇننەن كەيىن اياقتالاتىنىن جاريالادى.

دۇيسەنبى كۇنى ءال-باعداديدىڭ ولىمىنە قاتىستى بىرنەشە مالىمەتتەر بەلگىلى بولدى.

ءميلليدىڭ سوزىنشە، وپەراتسيا كەزىندە ەكى ادام تىرىدەي ۇستالعان. بىراق ولاردىڭ كىم ەكەنى ازىرگە جاريالانبايدى.

ءابۋ باكر ءال-باعدادي 1971 جىلى يراكتىڭ ساماررا قالاسىندا تۋعان. ءدىن ءىلىمىن وقىعان. 2004 جىلى امەريكالىق اسكەري تاراپىنان ۇستالعان. بوستاندىققا شىققاننان كەيىن، جيھادشىلارعا قوسىلدى. 2014 جىلى ءوزىن بارلىق مۇسىلمانداردىڭ ليدەرى — ءحاليفپىن دەپ جاريالادى. ول قۇرعان "يسلام مەملەكەتى" تەرروريستىك ۇيىمى يراك پەن سيريانىڭ ءبىراز جەرلەرىن باسىپ العان بولاتىن.

Abai.kz