بەيسەنبى, 20 اقپان 2020
511 5 پىكىر 13 قاڭتار, 2020 ساعات 10:49

جەنەۆاداعى گۇلنارا كاريموۆانىڭ ۆيللاسىنان 70-تەن اسا ونەر تۋىندىسى وزبەكستانعا قايتارىلماق

وزبەكستاننىڭ بۇرىنعى پرەزيدەنتى يسلام كاريموۆتىڭ قىزى گۇلنارا كاريموۆانىڭ شەتەلدەگى بايلىعىن قايتارۋ بويىنشا شۆەيتساريا، فرانتسيا، رەسەي، ليتۆا جانە باسقا ەلدەردىڭ ءتيىستى مەكەمەلەرىمەن كەلىسسوز جۇرگىزىلىپ جاتىر. وسىلاي دەپ وزبەكستاننىڭ باس پروكۋراتۋراسى مالىمدەدى.

"شۆەيتساريانىڭ فەدەرالدىق پروكۋراتۋراسى مەن وزبەكستاندىق مامانداردىڭ قاتىسۋىمەن گۇلنارا كاريموۆانىڭ جەنەۆاداعى ۆيللاسىندا تابىلعان 70-تەن استام ونەر بۇيىمىنىڭ (كارتينالار، ساۋلەت ونەرى) وزبەكستاننىڭ ۇلتتىق ونەرىنە تيەسىلى بار-جوعىن انىقتاۋ جانە قايتارۋ بويىنشا جۇمىس ءجۇرىپ جاتىر", - دەپ جازىلعان مەكەمە مالىمدەمەسىندە.

وسىعان دەيىن گۇلنارا كاريموۆانىڭ وزبەكستانداعى ۇيلەرىنەن جالپى قۇنى 12,7 ملرد سۋمعا باعالانعان ونەر بۇيىمدارى تابىلىپ، ەلدىڭ مەملەكەتتىك مۋزەيلەرىنە قايتارىلعان.

وتكەن اپتادا وزبەكستان جوعارعى سوتى 8 قاڭتاردا گۇلنارا كاريموۆانىڭ ۇستىنەن جاڭا سوت پروتسەسى باستالعانىن حابارلاعان. قازىر زانگياتا اۋدانىنداعى ايەلدەر اباقتىسىندا وتىرعان كاريموۆا 255 ىسكە قاتىسى بار قىلمىستىق توپتى باسقارعان دەپ ايىپتالىپ جاتىر. سوت وتىرىسى جابىق ءوتىپ جاتىر.

2019 جىلى جەلتوقساندا وزبەك بيلىگى كاريموۆانىڭ شۆەيتساريالىق ادۆوكاتى گرەگۋار مانجانىڭ ەلگە كىرۋىنە تىيىم سالعان. ول وسىعان دەيىن وزبەكستان تۇرمەلەرىندەگى جاعدايدى سىناعان.

گۇلنارا كاريموۆاعا 2015 جىلى شۆەتسيادا، شۆەيتساريادا جانە اقش-تا قىلمىستىق ىستەر قوزعالىپ، ول ميلليارد دوللارداي كولەڭكەلى قاراجاتتى زاڭداستىردى دەپ ايىپتالعان.

2017 جىلى اكەسى كوز جۇمعاننان كەيىن كاريموۆا وزبەكستاندا "سالىق تولەۋدەن قاشۋ", "اقشا ۇرلاۋ" جانە "وفشورلىق كومپانيالاردىڭ قۇجاتتارىن جويىپ جىبەرۋ" باپتارى بويىنشا 10 جىلعا باس بوستاندىعىنان ايىرىلعان.

Abai.kz

5 پىكىر