جۇما, 29 ناۋرىز 2024
قوعام 4299 0 پىكىر 13 ناۋرىز, 2017 ساعات 09:10

ايىپتالۋشىعا قارسى جابىرلەنۋشىنىڭ ايتارى جوق پا؟..

8-ناۋرىز كۇنى «Abai.kz» اقپاراتتىق پورتالىندا كاسىپكەر قوناي ماسيپحاننىڭ قر باس پروكۋرورى جاقىپ اسانوۆقا جازعان اشىق حاتى جاريالانعان بولاتىن. «اسانوۆقا اشىق حات. كىناسىز سوتتالىپ كەتەتىن بولدىم» اتتى كاسىپكەردىڭ جانايقايى 9-ناۋرىز كۇنى «Dalanews.kz» سايتىندا دا جارىق كوردى.

ناۋرىزدىڭ 10-ى كۇنى اتالعان ماسەلەگە قاتىستى الماتى وبلىسى، ىلە اۋداندىق سوتىندا قىلمىستىق-پروتسەسسۋالدىق ءىس قارالدى.

ءبىز سوت وتىرىسىنا قاتىسىپ، ەكى تاراپتىڭ دا ۋاجىنە قۇلاق تۇرمەك بولدىق. ماقسات -«Abai.kz» اقپاراتتىق پورتالى مەن «Dalanews.kz» سايتىندا جارىق كورگەن اشىق حات مازمۇنىمەن تانىسىپ شىققان سوڭ، جابىرلەنۋشى تاراپتىڭ پىكىرىن ءبىلۋ بولاتىن. سوت پروتسەسسىنە قاتىسۋىمىزعا پروكۋرور مىرزا مەن ايىپتالۋشى تاراپتىڭ قورعاۋشىلارى قارسى بولمادى.

الايدا جابىرلەنۋشى باقىتبەك تۇتۋباەۆ پەن ونىڭ قورعاۋشىلىرانىڭ ءوتىنىشى بويىنشا، سۋديا ءبىزدى سوت زالىنان شىعارىپ جىبەردى.

دەگەنمەن، ءبىز سوت پروتسەسسىنىڭ اياقتالۋىن كۇتىپ، سوت زالىنان شىعا بەرىستە جابىرلەنۋشى مەن ونىڭ قورعاۋشىلارىن سوزگە تارتتىق.

جابىرلەنۋشى باقىتبەك تۇتۋباەۆ بىزگە پىكىر بىلدىرۋدەن ءۇزىلدى-كەسىلدى باس تارتىپ، «بۇلار ءبارىبىر ءسوزىڭدى بۇرمالاپ جىبەرەدى» دەگەندى ايتتى. ال، جابىرلەنۋشىنىڭ قورعاۋشىسى (ادۆوكات) ءىلياس ەسىمدى ازامات بولسا، بىردەن: «سەندەردىڭ سايتتارىڭ مەن گازەتتەرىڭدى جاپتىرىپ تاستايمىز» دەپ، بىزگە وكەتەم سويلەي جونەلدى. سول ساتتە ءبىز ديكتوفوندى قوسىپ، ادۆوكات مىرزادان اتالعان ىسكە قاتىستى پىكىرىن سۇرادىق. اراداعى از-كەم ديالوگ بىلايشا ءوربىدى:

ادۆوكات: – ءسىز نەگە باس پروكۋروردىڭ بەينەسىن ونىڭ رۇقساتىنسىز قولداناسىز، ءوز سايتىڭىزعا؟ 145-گك وتكرويتە. زاكون وتكروي.

ءتىلشى: – ءسىز ادۆوكاتسىز عوي. الدىمەن اتى-ءجونىڭىزدى ايتىڭىزشى انىقتاپ؟..

ادۆوكات: – مەن نە ءۇشىن ايتۋىم كەرەك اتىمدى؟

ءتىلشى: – ءسىز ادۆوكات رەتىندە قارسىلىعىڭىزدى ايتتىڭىز عوي، الگى اشىق حاتقا قاتىستى.

ادۆوكات: – قانداي حات؟ قاشان؟..

ءتىلشى: – -«Abai.kz» پەن «Dalanews.kz» سايتتارىندا جاريالانعان حات.

ادۆوكات: – قاشان پرەتەنزيا قويدىم؟

ءتىلشى: – ءسىز قارسى تاراپ وكىلى رەتىندە قوناي ماسيپحاننىڭ اشىق حاتىنا قارسى نە ايتاسىز؟ سونى بىلگىمىز كەلەدى.

ادۆوكات: – وي، قويشى، باۋىرىم...

ادۆوكاتپەن ارامىزداعى ساراڭ سۇحباتتىڭ سىقپىتى وسى بولدى. وكىنىشتى. شاماسى، ول جانە ونىڭ قورعاۋىنداعى تۇلعا «Abai.kz» پەن «Dalanews.kz» سايتتارىن ايىپتالۋشى قوناي ماسيپحاننىڭ ىقپالىنداعى، سونىڭ ءسوزىن سويلەپ، سويىلىن سوعاتىن ءباسپاسوز دەپ ويلاپ جۇرسە كەرەك. ەگەر جابىرلەنۋشى تۇتۋباەۆ تاراپى ولاي ويلاسا، قاتەلەسەدى. ويتكەنى ءبىز قونايدىڭ قولشوقپارى ەمەسىپز. قالا بەردى، باق تۋرالى زاڭ تالابى بويىنشا ەكىنشى جاقتىڭ دا ۋاجىنە قۇلاق اسىپ، ءسوزىن جاريا ەتۋىمىز كەرەك. وسى ماقساتتا اتالعان ىسكە بايلانىستى سۋبەكتيۆتى كوزقاراس قالىپتاسپاۋى ءۇشىن، جابىرلەنۋشى باقىتبەك تۇتۋباەۆ پەن ونىڭ ادۆوكاتىنان پىكىر الۋعا قانشا تىرىسقانىمىزبەن، ونىمىزدان تۇك ونبەدى. كەرىسىنشە، وزىمىزگە قارسى نەگىزسىز ايىپ تاعىلىپ، قوقان-لوققى جاسالدى («سەندەردىڭ سايتتارىڭ مەن گازەتتەرىڭدى جاپتىرىپ تاستايمىز». ادۆوكاتتىڭ بۇل ايقايىن سوت زالىندا وتىرعان ءتورت ادام ەستىدى). الايدا ءبىز ولاردىڭ (ب.تۇتۋباەۆ پەن ونىڭ قورعاۋشىلارىنىڭ) الگىندەي ءسوزىن قاجىعاندىقتان بولار دەپ ويلادىق. ايتسە دە  كوڭىلىمىزدە: ايىپتالۋشىنىڭ اشىق حاتىنا بايلانىستى جابىرلەنۋشىنىڭ دە ءۋاجى، قارسى ارگۋمەنتى، جاۋابى بولۋى كەرەك قوي، نەگە سونىسىن ايتىپ، ءوز اياعىمەن سوت وتىرىسىنا بارىپ تۇرعان جۋرناليستەردىڭ قىزمەتىن پايدالانبادى دەگەن سۇراق قالدى.

كەلەسى سوت وتىرىسى 15-ناۋرىزعا بەكىتىلدى. الداعى ۋاقىتتا باقىتبەك تۇتۋباەۆ پەن ونىڭ قورعاۋشىلارى ءوز پىكىرلەرىن ايتۋعا نيەت تانىتسا، باق تۋرالى زاڭ اياسىندا جاريالاۋعا دايىن ەكەنىمىزدى ەسكەرتەمىز.

توقتارالى تاڭجارىق، «قالا مەن دالا» گازەتىنىڭ باس رەداكتورى

نۇرگەلدى ابدىعانيۇلى، «Abai.kz» اقپاراتتىق پورتالىنىڭ كونتەنت-رەداكتورى


0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2260
عيبىرات

قايسار رۋحتى عازيز جان

مۇحتار قۇل-مۇحاممەد 3541