***

تاڭعا جۋىق تاس جولدان
اۋانى قاقىراتا،
ماشينالار زۋلاپ وتەدى.
مەن مۇردەلەردىڭ اراسىندا،
شىم-شىرىق ءتۇس كورەمىن.
ادامزاتتىڭ ارىستان جۇرەكتى ۇرپاقتارى،
تاسقا اينالىپ،
دالادان قالاعا كوشكەن.
مەلشيگەن سورلى تاس،
ءوز ءزاۋزاتىنىڭ ەسىنەن، ەرلىگىمەن قوسا
الدەقاشان كوتەرىلگەن.
مۇردەلەرمەن بىرگە ءومىر سۇرەمىن،
ولار تىرىلۋگە تالپىنادى،
اۋانى قارماعان جانارلارىندا،
ءۇمىت، نالا، وتكەننىڭ قايعىسى بار.
كىتاپتاردىڭ كوبىسى اناسىنان ءولى تۋعان،
سوندىقتان ولار جاننىڭ سەزىمىن كەشنەگەن.
ال تىرىلەرى شە،
ولار دا بۇگىن ءبارىبىر،
ءتىلىن تىستەپ ارحيۆكە اينالعان.
كىتاپتار ءولدى...
قۇدايدان ءالى حابار جوق!
مۇمكىن، ول دا...

ىزدەر جانە مەن

قاي مەزگىل ەكەنى ەسىمدە جوق،
ءوڭ مەن ءتۇستىڭ اراسىندا،
ءىلبىپ كەلەمىن.
ارتىمدا قالعان ىزدەرىم،
ورىندارىنان كوتەرىلىپ،
قايدا بارا جاتىرسىڭ？-دەپ داۋىستايدى
مەنىڭ ولارعا بۇرىلۋعا،
دارمەنىم جەتپەيدى.
بارىنشا جىلدامداپ،
ولار جەتىپ الاتىنداي،
قاشىپ كەلەمىن،
ىزدەر وكشەلەپ قۋادى.
ەسكىلى-جاڭالى ىزدەر،
مەن سەندەردى جەتەلەپ كەلەمىن.
ال مەنى كىم ەرتىپ بارادى،
ول ماعان جۇمباق.
ءسات سايىن ارتىمداعى ىزدەرىم،
قايدا باراسىڭ？-دەپ ۇزدىگەدى.
بىلمەيمىن،
مۇمكىن، اداسىپ بارامىن.

كوكتەم بۇرلەگەندە

كوكتەمدە الما اعاشتار بۇرشىك اتقاندا،
جۇرەگىمدە قايعى بۇرلەپ گۇل اشادى.
بىلتىردان قالعان جارالى جاپىراقتار،
ءومىر مەن ءولىمنىڭ،
اراسىنداعى بەيباقتار.
جاس وركەندەر الاقان جايعاندا،
جادىمدا ەلەسى عانا قالعان،
ەسكى ءبىر ساعىنىش باس كوتەرەدى.
اۋەدە اسەم شەڭبەر سىزىپ ۇشقان.
قۇستاردىڭ اۋەنى،
جانىمدى ەلىتەدى،
ولار ەركىندىك پەرىشتەلەرى
كوگىلدىر اۋامەن،
كوك اسپاندى اڭسايدى.
ال مەنىڭ تاناۋىما وق-ءدارىنىڭ ءيىسى كەلىپ،
اياداي اۋلادا تىنىسىم تارىلادى.
كەڭىستىكتە قارقىلداعان قارعالار
قاناتتارىنان اجال سۋسىلى ەسىپ،
كەۋدەمە قوناقتاۋعا ۇمتىلادى.
... كوكتەم بۇرلەگەندە

شەڭبەر

ءبىز كونسەنترلى شەڭبەرلەرمىز،
سەن مەنىڭ ىشىمدە جاتاسىڭ.
مەن سەنىڭ سىرتىڭدامىن.
ال سەن بولساڭ،
بۇعان مويىنداعىڭ كەلمەيدى.
مەن سىرتىڭدامىن دەيسىڭ.
وندا مەن دە ىشتە قالۋدى مويىندامايمىن.
سەنتردى اۋىستىرساڭ عانا سىرتقا شىعاسىڭ،
الايدا ول تىم مۇشكىل حال.
ارينە، ەكەمىز دە
الەمنىڭ قاپ-قاراڭعى قۇرساعىنىڭ ىشىندەمىز.
سىرقا شىعۋ ءۇشىن،
سەنتردەن اۋىتقۋىمىز كەرەك.
تەك سوندا عانا عالامنىڭ سىرتىندا،
ءبىزدى بوستاندىق قارسى الادى.

جولدار

اسپاندا دا جولدار بار،
جەردەگى جولداردان الاسا.
كوكتەي وتكەندە قۇس جولىن،
جۇلدىزدار تابانىمنىڭ استىندا
جايراپ جاتادى.
بەينە جالعان مارجان-مونشاقتار سياقتى.
ولار ەندى جىمىڭداپ الداي المايدى،
سەبەبى قازىر زەڭگىردە ەمەس،
ۇيشىكتىڭ ىشىندە جىلتىلدايدى.
توبەمدە تەك بوس كەڭىستىك،
تومەندە ءيىر-قيىر
قارا ايداھارداي ىسقىرعان جولداردان
ۇرەيىم ۇشادى.
ادامزات بالاسى باسپاعان،
شەكسىز كەڭىستىكتە تەربەلىپ تۇرعان،
عايىپتاعى سول جولدار،
تىرشىلىكتى قايدا جەتەلەپ بارادى.

تۇردىحان ايدارحانۇلى

Abai.kz