استانادا قازاقستان حالقىنىڭ بىرلىگى كۇنى بيىل ەرەكشە سەرپىنمەن باستالدى. قالانىڭ ەڭ كورىكتى ورىندارىنىڭ ءبىرى ترياتلون پاركى اۋماعىنداعى جاڭارتىلعان جاعالاۋدا تاڭسارىدەن كىسى قاراسى قالىڭ. مۇندا اۋقىمدى سپورت فەستيۆالى ءوتىپ جاتىر.
بۇل شارانى استانا قالاسى اكىمدىگىنىڭ دەنە شىنىقتىرۋ جانە سپورت باسقارماسى مەن الماتى اۋدانى اكىمدىگى ۇيىمداستىرعان. ايتا كەتۋ كەرەك، فەستيۆال تەك مەرەكەلىك سيپاتتا عانا ەمەس. ول "تازا قازاقستان" ەكولوگيالىق اكتسياسى اياسىندا وتۋدە. ياعني سپورت پەن ەكولوگيا ۇندەسكەن ەرەكشە فورمات.

سۋرەت: استانا قالاسى سپورت باسقارماسىنان الىندى.

ەڭ باستىسى - بۇل فەستيۆال ءداستۇرلى تۇردە وتەتىن بۇقارالىق شارالاردىڭ ءبىرى. جىل سايىن بىرلىك كۇنى قارساڭىندا ۇيىمداستىرىلاتىن مۇنداي سپورتتىق كەزدەسۋلەر قالا تۇرعىندارىن ورتاق ماقساتقا بىرىكتىرىپ، قوعامداعى ىنتىماقتى نىعايتۋعا ىقپال ەتەدى.
تاڭسارىدەن باستالعان شارادا كىسى قاراسى قالىڭ. جۇزدەگەن ادام جينالعان. كاسىبي سپورتشىلار عانا ەمەس، سالاۋاتتى ءومىر سالتىن ۇستاناتىن قالا تۇرعىندارى دا بەلسەندى. قاتىسۋشىلار الدىن الا اكىمدىك سايتى ارقىلى تىركەلگەن. باستى تالاپ - نيەت پەن دايىندىق.
تاڭعى سامال، ەسىلدىڭ جاعاسىنداعى اسەم كورىنىس، مۋزىكا ىرعاعى - ءبارى ءبىر اتموسفەراعا بىرىكتىرگەندەي. جينالعان جۇرتتىڭ جۇزىنەن تولقۋ مەن قۋانىش قاتار بايقالادى. ويتكەنى بۇل جاي عانا جارىس ەمەس، بۇل - ورتاق قۇندىلىقتاردى دارىپتەيتىن الاڭ.

سۋرەت: استانا قالاسى سپورت باسقارماسىنان الىندى.

فەستيۆال اياسىندا جۇگىرۋ جارىستارى ۇيىمداستىرىلعان. ءار قاتىسۋشى ءوز مۇمكىندىگىن سىناپ كورۋگە كەلگەن. ءبىرى - جەكە رەكورد جاڭارتقىسى كەلەدى، ەندى ءبىرى - دەنساۋلىق ءۇشىن جۇگىرسە، تاعى ءبىرى دوستارىمەن بىرگە ۋاقىت وتكىزۋدى ماقسات ەتكەن.
ۇيىمداستىرۋشىلاردىڭ ايتۋىنشا، مۇنداي باستامالار - بۇقارالىق سپورتتى دامىتۋدىڭ ناقتى تەتىگى. "اسىرەسە، بىرلىك كۇنى سياقتى ماڭىزدى مەرەكەدە وتكىزىلەتىن اشىق فورماتتاعى شارالار ادامداردى جاقىنداستىرىپ، ورتاق قۇندىلىقتارعا جۇمىلدىرادى. بۇل تەك سپورت ەمەس، بۇل قوعامداعى بىرلىكتى نىعايتۋدىڭ ءتيىمدى جولى",- دەيدى ولار.
شىڭعىس، استانا قالاسىنىڭ تۇرعىنى:
"بۇل فەستيۆالدىڭ باستى ماقساتى بۇقارالىق سپورتتى دامىتۋ، قالا تۇرعىندارىن سالاۋاتتى ءومىر سالتىنا تارتۋ دەپ ويلايمىن. سونىمەن قاتار بۇگىنگى شارا ارقىلى ەكولوگيالىق مادەنيەتتى دە ناسيحاتتاپ وتىرمىز. مۇنداي ءداستۇرلى شارالار جىل سايىن حالىقتى بىرىكتىرىپ، قوعامداعى بىرلىكتى ارتتىرۋعا ۇلكەن ۇلەس قوسادى".

سۋرەت: استانا قالاسى سپورت باسقارماسىنان الىندى.

Screenshot

جارىس جولىندا ءار قادام - جەڭىسكە دەگەن ۇمتىلىس. كورەرمەندەر قولداۋ ءبىلدىرىپ، قاتىسۋشىلارعا ەرەكشە موتيۆاتسيا بەرۋدە. كەيبىرى وتباسىمەن كەلگەن. اتا-اناسى جۇگىرسە، بالالارى جانكۇيەر.

جانات، كوپبالالى اكە:
"مەن العاش رەت قاتىسىپ تۇرمىن. بۇگىن ءتورت بالام دا وسىندا ماعان جانكۇيەر. اتموسفەرا وتە كەرەمەت! كىسى وتە كوپ، ءبارى بەلسەندى. وسىنداي شارالار ادامداردى تەك سپورتقا ەمەس، ءبىر-بىرىنە جاقىنداتۋعا دا اسەر ەتەدى دەپ ويلايمىن".
فەستيۆال تەك سپورتپەن شەكتەلمەيدى. مۇندا ءتۇرلى بەلسەندى ايماقتار، فيتنەس جاتتىعۋلارى، كوڭىل كوتەرۋ باعدارلامالارى ۇيىمداستىرىلعان. سونىمەن قاتار اۋماقتى تازا ۇستاۋ، ەكولوگيانى ساقتاۋ بويىنشا دا ءتۇسىندىرۋ جۇمىستارى جۇرگىزىلۋدە.
ساراپشىلاردىڭ پىكىرىنشە، ءدال وسىنداي فورماتتاعى شارالار - قالاداعى بۇقارالىق سپورت مادەنيەتىن قالىپتاستىرىپ قانا قويماي، قوعامدىق بىرلىكتى نىعايتۋدىڭ ءتيىمدى جولى. بۇل - دەنى ساۋ ءارى ۇيىمشىل قوعام قالىپتاستىرۋعا باعىتتالعان كەشەندى قادام.
قازاقستان حالقىنىڭ بىرلىگى كۇنى - اتاۋى ايتىپ تۇرعانداي، بىرىگۋ مەرەكەسى. ال بۇگىنگى فەستيۆال سول بىرلىكتىڭ ناقتى كورىنىسىنە اينالدى. ءار قادام، ءار دەم، ءار قولداۋ - ءبارى ورتاق ماقساتقا باعىتتالعان.
استانا بۇگىن تەك مەرەكەنى اتاپ ءوتىپ جاتقان جوق. ول - بۇقارالىق سپورت پەن قوعامدىق بىرلىكتى قاتار دامىتۋدىڭ جارقىن ۇلگىسىن كورسەتىپ، جاڭا باعىتقا نىق قادام جاساپ وتىر.
بۇگىنگى سپورت فەستيۆالىنىڭ ەڭ ەرەكشە ساتتەرىنىڭ ءبىرى - مارافونعا گۋمانويد روبوتتىڭ دا قاتىسۋى بولدى. ول ادام قيمىلىن ءدال قايتالاپ، بەلگىلەنگەن قاشىقتىقتى ءجۇرىپ ءوتتى. بۇل كورىنىس كورەرمەندەر ءۇشىن تەحنولوگيا مەن سپورتتىڭ توعىسقان جاڭا قادامى رەتىندە ەستە قالدى.

Abai.kz