ەلباسىمىزدىڭ «بولاشاققا باعدار: رۋحاني جاڭعىرۋ» اتتى باعدارلاماسىن ورىنداۋ اياسىندا، سونداي-اق قازاقستان مەن مىسىر ەلدەرى اراسىنداعى مادەني قارىم-قاتىناستاردى دامىتۋ ماقساتىندا ساعادات نۇرماعامبەتوۆ اتىنداعى حالىقارالىق قوعامدىق قايىرىمدىلىق قورىنىڭ شاقىرتۋىمەن بەيبارىس سۇلتاننىڭ تىكەلەي ۇرپاعى ساميا بەيبارىس حانىم قازاقستاننىڭ باس قالاسى – استاناعا قوناققا كەلدى. كۇنى كەشە قازاقستان رەسپۋبليكاسىنىڭ ۇلتتىق مۋزەيىنە ارنايى باس سۇعىپ، حالىقارالىق كورمەلەردى تاماشالاپ، قازاق حالقىنا عانا ءتان كونە جادىگەرلەر جانە ەلىمىزدىڭ سالت-ءداستۇرىن ناسيحاتتايتىن ايرىقشا دۇنيەلەرمەن تانىستى. قوناقتار ءۇشىن حالىقارالىق «ساقتار التىنى» اتتى تۇپنۇسقا جادىگەرلەر كورمەسىنە ارنايى ەكسكۋرسيا ۇيىمداستىرىلدى.

س. بەيبارىس حانىمنىڭ جۇمىس جولى 1993 جىلى اراب مەملەكەتتەرى ليگاسىن ۇيىمداستىرۋدان باستالدى. 2013 جىلى LAS اقپاراتتىق سەكتورىنىڭ مەڭگەرۋشىسى بولىپ تاعايىندالدى. ول اراب مەملەكەتتەرىنىڭ ەۋروپامەن قارىم-قاتىناستارىن قاداعالايدى، سونداي-اق اراب-افريكا ىنتىماقتاستىعىن، اراب-قىتاي جانە اراب-امەريكا بايلانىستارىن ناسيحاتتاۋعا جاۋاپتى. سونىمەن قاتار، ساميا بەيبارىس حانىم «اراب ىستەرى جۋرنالى» بيزنەس-باسىلىمىنىڭ كەڭەسشىسى، كاير ۋنيۆەرسيتەتىنىڭ وقىتۋشىسى بولىپ قىزمەت اتقارادى.

بۇگىن، ياعني، 10 تامىز كۇنى قازاقستان رەسپۋبليكاسى ۇلتتىق مۋزەيىندە اراب مەملەكەتتەرى ليگاسى (LAS) «مادەنيەتارالىق ديالوگ» دەپارتامەنتىنىڭ باسشىسى ساميا بەيبارىس حانىمنىڭ قاتىسۋىمەن «مىسىردىڭ مادەنيەتى مەن تاريحىنداعى قىپشاقتار مەن ماملۇكتەر» اتتى دوڭگەلەك ۇستەل وتەدى. ءىس-شاراعا ۇلتتىق مۋزەيدىڭ عىلىمي قىزمەتكەرلەرى، س.ى. ىسقاقوۆ، ساعادات نۇرماعامبەتوۆ اتىنداعى حالىقارالىق قوعامدىق-قايىرىمدىلىق قورىنىڭ استانا قالاسى فيليالىنىڭ پرەزيدەنتى، كورنەكتى قوعام جانە مەملەكەت قايراتكەرلەرى، قازاقستان جانە مىسىر ەلدەرىنىڭ عالىمدارى، باق وكىلدەرى قاتىسادى.

 Abai.kz