جۇما, 23 اقپان 2018
346 2 پىكىر 13 اقپان, 2018 ساعات 09:32

باق: رەسەي سارىشاعاندا زىمىراننان قورعانىس جۇيەسىن سىنادى

رەسەي اسكەريلەرى قاراعاندى وبلىسىنىڭ سارىشاعان پوليگونىندا زىمىراننان قورعانىس جۇيەسىن كەزەكتى رەت سىناپ، زىمىران ۇشىردى دەپ حابارلادى رەسەي قورعانىس مينيسترلىگىنە قاراستى «كراسنايا زۆەزدا» باسىلىمى. سىناق زىمىراننان قورعانىس جۇيەcىن مودەرنيزاتسيالاۋ باعدارلاماسى اياسىندا جاسالدى.

رەسەي اۋە-عارىشتىق كۇشتەرى اۋە شابۋىلىنان جانە زىمىران شابۋىلىنان قورعانىس قۇرىلىمى قولباسشىسىنىڭ ورىنباسارى اندرەي پريحودكو سىناقتان سوڭ «جاڭارتىلعان زىمىراننان قورعانىس جۇيەسى تاپسىرمانى ءساتتى ورىنداپ، شارتتى نىسانانى اسقان دالدىكپەن اتىپ تۇسىرگەنىن» ايتتى.

زىمىراننان قورعانىس جۇيەسىنىڭ سىناقتان قاشان وتكىزىلگەنى جانە باسقا دا ەگجەي-تەگجەيلى اقپارات بەرىلمەدى، بىراق جاڭارتىلعان زىمىراننان قورعانىس جۇيەسىنىڭ تاكتيكالىق جانە تەحنيكالىق مۇمكىندىكتەرى «قولدانىستاعى قارۋدان الدەقايدا اسىپ تۇسەتىنى» ايتىلادى. باسىلىم سارىشاعاندا سىنالعان زىمىراننان قورعانىس جۇيەسى ماسكەۋ تۇبىندەگى سوفرينو پوليگونىندا ورنالاستىرۋ جوسپارلانىپ وتىرعانىن جازدى.

Abai.kz

2 پىكىر