ءمينيستردىڭ سوزىنشە، ءورتتىڭ شىعۋىنا بايلانىستى التى بولجام بار.

"قۇقىق قورعاۋ ورگاندارى تەرگەۋ جۇرگىزىپ جاتىر، بارلىق بولجامدار قاراستىرىلىپ جاتىر: ادام فاكتورى، ءورت قاۋىپسىزدىگى ەرەجەسىن بۇزۋ، سالاقتىق، تەحنيكالىق سەبەپتەر، مىسالى، ەلەكتر جەلىلەرىنىڭ تۇيىقتالۋى، حيميالىق رەاكتسيا بەرۋ. قاساقانا ورتەۋ مەن ديۆەرسيا سەكىلدى بولجامداردى دا قاراستىرىپ جاتىرمىز",- دەدى ەرمەكباەۆ.

ونىڭ ايتۋىنشا، اسكەريلەر ارىستا تاعى كەمىندە ءبىر اي جۇمىس ىستەيدى. كەيبىر قويمالاردىڭ بىقسىپ تۇتىندەتىپ جاتۋى دا ءورت سوندىرۋشىلەردىڭ جۇمىسىن قيىنداتىپ جاتىر.

ەلدىڭ وڭتۇستىگىندەگى ارىس قالاسىندا 24 ماۋسىمدا اسكەري قويما ورتەنىپ، ارتى ءىرى جارىلىسقا ۇلاسقان. رەسمي دەرەك بويىنشا، ونداعى وق-دارىلەردىڭ 70 پايىزدان استامى جارىلىپ كەتكەن.

وقيادان ءۇش ادام قازا تاپقان: ەكى اسكەري جانە ءبىر جەرگىلىكتى تۇرعىن. 400-دەن استام ادام مەديتسينالىق كومەككە جۇگىنگەن. ونداعان ادام اۋرۋحاناعا تۇسكەن.

ارىستاعى ۇيلەردىڭ 85 پايىزىنا زاقىم كەلگەن. بيلىكتىڭ ەسەبى بويىنشا قايتا قالپىنا كەلتىرۋ جۇمىستارىنا ونداعان ميلليارد تەڭگە قاجەت.

Abai.kz