الەۋمەتتىك جەلىدە قوس-قوستاپ بايگە تىگىپ، لوتورەيا ويناتقىشتار تەگى قاپتاپ كەتتى. اسىرەسە، ەسىم-سويى ەلگە تانىمال انشىلەر ءبىر-بىرىمەن جارىسقانداي بولىپ جاتىر. بايگەلەرى دە كوز اربايتىن، كوڭىل اۋلايتىنداي-اق. كولىك، ءۇي، قوماقتى قارجى...

"بەس-ون تەڭگەگە بيلەت الىپ، كولىك ۇتىپ ال" دەپ باستالادى، بارىندە. ءبىر ستسەناري. ءبىر تەكست. قۇددى ءبىر-ءبىرىنىڭ ءماتىنىن سۇراپ وقىپ جاتقانداي...

كوشەدەگى كولدەنەڭ كوكاتتىنىڭ ءبىرى ەمەس، ەسىمى ەلگە بەلگىلى ادامداردىڭ اۋزىنان ايتىلعان اقپارعا جۇرت سەنەدى. سەنگەن سوڭ، ساتىپ الادى. ءبىر-بىرلەپ ەمەس، قوس-قوستاپ الادى. الماسقا كانە، الگى ايدىك ءانشىنىڭ اڭگىمەسى سولاي ىستەۋگە - ماجبۇرلەيدى.

ال، انشىلەردىڭ مۇنداي ارەكەتىنە زاڭ نە دەيدى؟ ءبىز بۇل تۋرالى ساراپشىلاردىڭ پىكىرىن بىلگەن ەدىك. ءماجىلىس دەپۋتاتى بەرىك دۇيسەمبينوۆ قازىر وسى ماسەلە بويىنشا ارنايى كوميسسيا قۇرىلعانىن ايتادى.

الەۋمەتتىك جەلىدە ويناتىلىپ جاتقان لوتورەيالار - زاڭسىز!

بەرىك دۇيسەمبينوۆ، قر ءماجىلىس دەپۋتاتى:

- بىزدەن كوش ىلگەرى كەتىپ قالعان ەلدەر بار. ول ەلدەردە لوتورەيا بيزنەسى - ەكونوميكانىڭ ۇلكەن ءبىر سالاسى.

ول اشىق تۇردە ءوتۋى كەرەك. جانە ونىڭ وزىندىك ەرەجەسى بولادى. سوندىقتان بىزدە 2016 جىلى "لوتەرەيالار جانە لوتەرەيا قىزمەتى تۋرالى" زاڭ قابىلدانعان. ال، قازىر ءبىز سول زاڭعا وزگەرتۋلەر ەنگىزۋدى قاراستىرىپ جاتىرمىز. مەن سول كوميسسيانىڭ مۇشەسىمىن. ول زاڭ جوباسىنىڭ ىشىندە اكىمشىلىك جاۋاپكەرشىلىكپەن قاتار باسقا دا كورسەتكىشتەر بار.

جالپى، ءار ادام ءوزىنىڭ جولى بولاتىنىنان ۇمىتتەنەدى. سوندىقتان مۇنداي ۇتىستارعا قاتىسۋعا، لوتورەيا ويناۋعا ءار ادامنىڭ قۇقىعى بار. بىراق، ول ويىننىڭ اشىق، تازا، شارتتارىنىڭ تۇسىنىكتى بولۋى ءۇشىن ءبىر ورتاق ەرەجە بولۋ كەرەك.

ال، الەۋمەتتىك جەلىدە ويناتىلىپ جاتقان نارسەلەردى ەشكىم بىلمەيدى. ونى جەكە ادام ءوزى جاريالاپ، ويناتىپ جاتادى. بۇل - زاڭسىز دۇنيە. وسىنداي زاڭسىزدىققا توسقاۋىل قويۋ ءۇشىن دە وسى زاڭ جوباسى تالقىلانىپ جاتىر.
قازىر قازاقستاندا لوتورەيا ويىنىن ويناتۋعا مەملەكەتتىك رۇقساتى بار ء"ساتتى جۇلدىز" دەگەن وپەراتورلىق كومپانيا جۇمىس ىستەيدى. بىزدە بارلىق لوتورەيا ويىنى تەك سول كومپانيانىڭ ەرەجەسىمەن ءوتۋ كەرەك.

ال، قازىر زاڭسىز ويناتىلىپ جاتقان لوتورەيالارعا، بىزدە جاۋاپكەرشىلىك قاراستىرىلماعان. سوندىقتان، قازىر تالقىلانىپ جاتقان زاڭ جوباسىندا سول لوتورەيا ويناتۋدىڭ پرينتسيپتەرى، لوتورەيا ويىنىن زاڭسىز وتكىزگەنى ءۇشىن قانداي جاۋاپكەرشىلىك بار دەگەن ماسەلەلەر قاراستىرىلىپ جاتىر.

ازىرگە، بۇل زاڭ ناقتى بەكىتىلگەن جوق. بىراق، قازىر ايىپپۇل سالۋ دەگەن سياقتى ءتۇرلى ۇسىنىستار، دەپۋتاتتار ەنگىزگەن تۇزەتۋلەر بار.

ارينە، قازىرگى الەۋمەتتىك جەلىنىڭ قوعامعا ىقپالى زور عوي. تانىمال ادامدار وزدەرىنىڭ تانىمالدىعىن پايدالانىپ، ۇتىستار وتكىزىپ جاتادى. بىراق، ولار ۇتىستىڭ اشىقتىعى، ادىلدىگى دەگەن نارسەگە جاۋاپ بەرە المايدى. سوندىقتان، ولارعا ورتاق ءبىر ەرەجە بولۋ كەرەك.

تاعى ءبىر ايتا كەتەرلىگى - لوتورەيا سالاسىندا ء"ساتتى جۇلدىز" دەپ ءبىر وپەراتوردى بەلگىلەدىك قوي. قازىر، ول وپەراتوردىڭ ىستەگەن جۇمىسى كوپ. مىسالى، ولار ءۇش مىڭ ادامدى ءۇش مىڭ جۇمىس ورنىمەن قامتاماسىز ەتىپ وتىر. بىراق، ءبىر ماسەلە - قازىر ول كومپانيا قازاقستاندا جالعىز بولماۋى كەرەك. ول مونوپوليا بولماۋ كەرەك. ول ءۇشىن - وسى سالاداعى ءارتۇرلى مەكەمەلەر، دامىعان ەلدەردىڭ ينۆەستورلارى نەمەسە ءبىزدىڭ ەلدىڭ ازاماتتارى، كاسىپكەرلەرى لوتورەيا نارىعىنا كىرەمىز دەسە، وعان دا جول اشىق بولۋ كەرەك. سوندىقتان ءبىز مونوپوليانى دا اۋىستىردىق.
سوندىقتان بۇل زاڭ لوتورەيا نارىعىنداعى شىنايى باسەكەنى دە قالىپتاستىرۋى كەرەك.

ال، جۋرناليست ارمان سقابىلۇلى، انشىلەردىڭ بۇل ارەكەتى - "اڭقاۋ ەلگە ارامزا مولدانىڭ كەرى" دەيدى.

ابايلاڭىز! "الاياق لوتورەيا"!

ارمان سقابىلۇلى، جۋرناليست:

- اشقۇرساق حالىقتى الداۋ وڭاي. ەلدىڭ تۇرمىس-تىرشىلىگى تومەندەگەن سايىن "اڭقاۋ ەلگە ارامزا مولدا" دا كوبەيە مە دەيمىن. قازىر الەۋمەتتىك جەلىدە "لوتورەيا ويناتۋ" دەگەن بالە قاتتى بەلەڭ الدى. "ون مىڭ تەڭگەگە بيلەت الساڭ اۆتوموبيل ۇتاسىڭ، ەكى بولمەلى پاتەردىڭ كىلتىن ۇستاتامىز" دەگەن جارنامادان كوز سۇرىنەدى. ەسپانوۆ دەگەن ءانشى ءتىپتى 20 كولىكتى ۇتىسقا قويىپتى.

جالپى قۇنى 61 ميلليون تەڭگە! بۇل نە دەگەن "باتپان قۇيرىق"! ءبىزدىڭ بىلۋىمىزشە قازاقستاندا لوتورەيا ويناتۋعا جالعىز عانا وپەراتور -كومپانيانىڭ قاقىسى بار. مەملەكەت سوعان عانا ليتسەنزيا، رۇقسات بەرگەن. قالعاندارىنىكى زاڭسىز. حالىقتى الداۋ. زاڭدى بەلدەن باسۋ. زاڭدى بۇزعاندار وندا نەگە جازالانبايدى؟ سالىق تولەمەي ميلليونداردى قالتاعا باسقاندارعا ءتيىستى ورگاندار نەگە كوز جۇمادى؟

بۇل ساۋالداردىڭ جاۋابىن بۇگىن پارلامەنتتەگى دەرەككوزدەن الدىق. الاياقتار، ابايلاڭىزدار! ەندى "لوتورەيا قىزمەتى تۋرالى زاڭعا" تولىقتىرۋلار ەنگىزىلگەن سوڭ "لوتورەيا-لوحوتروننان" پايدا تاپقىش ەسپانوۆ جانە سول سەكىلدىلەر مەملەكەتكە 200 ايلىق ەسەپتىك كورسەتكىش كولەمىندە (500 000 تەڭگە) ايىپپۇل تولەيدى. ۇتىسى تاركىلەنەدى. وعان كونبەي جۇرتتى الداۋدى جالعاستىرا بەرسە جازاسى ءتىپتى اۋىرلايدى. ال، اڭقاۋ حالقىما ايتارىم- الاياق-لوتورەيادان الىستاۋ جۇرەيىكشى! الدانىپ بولدىق قوي! ءبىزدى كىم الدامادى؟ ەندىگى قالعانى "ەسپانوۆتار" ەدى...

نۇربيكە بەكسۇلتانقىزى

Abai.kz