ەكى جىل بۇرىن شارتتى جازامەن بوساتىلعان بەلسەندى پروباتسيا قىزمەتىنىڭ تىيىمىنا بايلانىستى الماتى قالاسى اۋماعىنان شىعا الماي وتىرعانىن حابارلادى. بەلسەندى بۇل ءسوزىن 1 قاراشادا كەشكە Facebook جەلىسىندە بولعان تىكەلەي ەفير كەزىندە ايتتى.
ول باستاماشىل توپپەن بىرگە 2-8 قاراشا كۇندەرى قازاقستاننىڭ باتىس ءوڭىرىن ارالاپ، جاقتاستارىمەن كەزدەسپەك بولعان. بىراق 1 قاراشادا قاراساي اۋداندىق پروباتسيا قىزمەتى "قاداعالاۋ شارالارى كۇشەيگەنىن ايتىپ، قالادان شىعۋعا تىيىم سالعان".
بەلسەندىنىڭ سوزىنشە، پارتيا قۇراتىنىن مالىمدەگەننەن كەيىن پروباتسيا قىزمەتى بۇرىنعىداي ايىنا ءبىر رەت ەمەس، بەس رەت كەلىپ، تىركەلۋدى مىندەتتەگەن. ول بۇل شەكتەۋلەردى قوعامدىق-ساياسي بەلسەندىلىگىمەن بايلانىستىرادى.
- وسى ۋاقىتقا دەيىن فيلم تۇسىرگەندە دە، ءوزىمنىڭ شارۋالارىم بويىنشا بارعان كەزدە دە ارىزىمدى جازىپ، تىركەلىپ، ەشقانداي پروبلەماسىز بارىپ-كەلىپ ءجۇردىم. ال قازىر جىبەرمەي وتىر، - دەدى جانبولات ماماي 1 قاراشادا ازاتتىققا.
ادۆوكات جانار بالعاباەۆانىڭ ايتۋىنشا، سوت جانبولات مامايدىڭ جۋرناليستىك قىزمەتپەن اينالىسۋىنا عانا تىيىم سالعان. ال قوعامدىق-ساياسي قىزمەتپەن اينالىسا الادى. ادۆوكاتتىڭ سوزىنە قاراعاندا زاڭ بويىنشا ەگەر ماماي باسقا قالاعا بارسا، الماتىداعى پروباتسيالىق باقىلاۋ قىزمەتىنە ەسكەرتىپ، باراتىن جەردەگى پروباتسيالىق باقىلاۋعا تىركەلۋى ءتيىس.
- ونىڭ قالادان شىعۋى پروبلەما بولماۋى كەرەك. پروباتسيا قىزمەتىنە ساپار جايلى ايتۋ - بۇل ەسكەرتۋ سيپاتىنداعى نارسە، - دەدى ادۆوكات.
ونىڭ ايتۋىنشا، پروباتسيا باقىلاۋىنداعى ادام "ەرەجە بۇزادى" دەگەن قاۋىپ تۋىنداسا، مەكەمەنىڭ تىركەلۋ پروتسەدۋراسىن جيىلەتۋگە قۇقىعى بار. ناقتى جاعدايدا "مامايدى بەس رەت تىركەتۋگە مىندەتتەۋ ونىڭ قوعامدىق-ساياسي قىزمەتىمەن بايلانىستى بولۋى مۇمكىن" دەپ توپشىلايدى.
بۇرىن تاۋەلسىز "تريبۋنا" گازەتىن باسقارعان جۋرناليست، قوعام بەلسەندىسى جانبولات ماماي "مۇحتار ءابليازوۆتان قارجى الدى" دەپ ايىپتالىپ، شارتتى جازامەن بوساتىلعان. سوت وعان ءۇش جىل جۋرناليستىك قىزمەتپەن اينالىسۋعا تىيىم سالعان. جانبولات ماماي وزىنە تاعىلعان ايىپتى مويىنداماعان.
Abai.kz
