پروكۋراتۋراعا قايتارىلعان ءىس سوتقا قايتا تۇسكەن. ءىستى سۋديا قايرات قاسىموۆ قاراپ جاتىر. 31 قازاندا سوتتىڭ الدىن الا تىڭداۋى ءوتتى.

جابىرلەنۋشىلەر جانە مەملەكەتتىك ايىپتاۋشى قۋانىش جەكسەنباەۆ سوتتى تەزىرەك باستاۋىن ءوتىندى، ويتكەنى قىلمىس جاسالعان ۋاقىتتان بەرى ون اي وتكەن. ال سوتتالۋشىلاردىڭ ادۆوكاتتارى بولسا ءىستى پروكۋراتۋراعا قايتارۋدى سۇراپ وتىر. بۇل ىستە جەتى سوتتالۋشى بار.

ادۆوكاتتار "كىسى ءولتىرۋ" بابىن باسقا باپقا وزگەرتۋىن سۇرادى. قورعاۋشىلاردىڭ پىكىرىنشە، كۇدىكتىلەر قورىقشىنى ولتىرگىسى كەلمەگەن. بۇعان قوسا ادۆوكاتتار زاڭسىز اڭشىلىقتان كەلگەن شىعىن كولەمى تىم كوپ دەپ ەسەپتەيدى. سوتتالۋشىلاردىڭ ءبىرى بوكەن اۋلاۋعا شىقتىق دەسە، قالعاندارى قاسقىر اۋلاعانىن ايتقان.

سۋديا قايرات قاسىموۆ سوتتىڭ 15 قاراشادا باستالاتىنىن جاريالادى.

سوتتا بەلگىلى بولعانداي، ايىپتالۋشىلاردىڭ ءبىرى بۇرىن بىرنەشە جىل بويى پوليتسيادا جۇمىس ىستەگەن. سوتتالۋشىلاردىڭ بارلىعى - قىزىلوردا وبلىسىنىڭ تۇرعىندارى. ولاردىڭ بارلىعىنا زاڭسىز اڭشىلىقپەن اينالىستى دەگەن ايىپ تاعىلعان. 21 قاڭتاردان بەرى قاماۋدا وتىرعان ءۇش سوتتالۋشىعا ينسپەكتور ەرلان نۇرعاليەۆتى ءولتىردى، ونىڭ ارىپتەسى پەتر نيتسىكتى ولتىرۋگە تالپىندى دەگەن ايىپ تاعىلعان.

Abai.kz