پرەزيدەنت توقاەۆ ۇلتتىق قوعامدىق سەنىم كەڭەسىنىڭ مۇشەلەرىن قابىلدادى
پرەزيدەنت قاسىم-جومارت توقاەۆ ۇلتتىق قوعامدىق سەنىم كەڭەسىنىڭ مۇشەلەرىن قابىلدادى، دەپ حابارلايدى akorda.kz
«بايتاق بولاشاق» ەكولوگيالىق اليانسى» رقب پرەزيدەنتى ازاماتحان امىرتاەۆپەن كەزدەسۋ بارىسىندا ەلىمىزدەگى ەكولوگيالىق احۋال، حالىقتىڭ ەكولوگيالىق تۇسىنىگى مەن مادەنيەتىن ارتتىرۋ مۇمكىندىكتەرى سەكىلدى ماسەلەلەر تالقىلاندى. ا.امىرتاەۆ شاعىن جانە ورتا بيزنەستى قولداۋعا جانە ەكولوگيالىق جوبالاردى ىسكە اسىرۋ ءۇشىن شەتەل ينۆەستيتسياسىن تارتۋعا قاتىستى بىرقاتار ۇسىنىس ايتتى.
«قازاقستان بارىسى» دامۋ قورى قامقورشىلىق كەڭەسىنىڭ توراعاسى ارمان شوراەۆ پرەزيدەنتكە ىشكى جانە سىرتقى تۋريزم سالاسىنداعى كەيبىر قوردالانعان پروبلەمالاردى شەشۋ جولدارىن، قازاق كۇرەسىن حالىقارالىق ارەنادا ۇلتتىق برەند رەتىندە قالىپتاستىرۋ جايىنداعى كوزقاراسىن جەتكىزدى.
قوعام قايراتكەرى، ساياساتتانۋشى ايدوس سارىممەن كەزدەسۋدە قازاقستانداعى گۋمانيتارلىق عىلىمنىڭ دامۋ پەرسپەكتيۆالارى، ەلىمىزدىڭ قوعامدىق-ساياسي ومىرىنە ونىڭ اسەرى، «رۋحاني جاڭعىرۋ» باعدارلاماسىنىڭ جۇزەگە اسىرىلۋى مەن يدەولوگيالىق ساياساتى سياقتى ماسەلەلەر قوزعالدى.
قاسىم-جومارت توقاەۆ ۇلتتىق قوعامدىق سەنىم كەڭەسىنىڭ العاشقى وتىرىسىنان كەيىن كەڭەس مۇشەلەرى تاراپىنان ايتىلعان ۇسىنىستار پرەزيدەنت اكىمشىلىگى مەن ۇكىمەتتە وتكەن جيىنداردا تالقىلانىپ، پىسىقتاۋ جۇمىستارى جۇرگىزىلگەنىن اتاپ ءوتتى.
– ناقتى ناتيجەلەرگە قول جەتكىزدىك. جۋىق ارادا كەيبىر زاڭنامالارعا ەنگىزىلەتىن وزگەرىستەردى پىسىقتاۋ كەرەك. سودان كەيىن ۇلتتىق كەڭەستىڭ ەكىنشى وتىرىسى شاقىرىلادى، – دەپ قورىتىندىلادى پرەزيدەنت.
Abai.kz
