11 قاراشادا تاڭەرتەڭ نۇر-سۇلتان قالاسى اكىمدىگى كوپقاباتتى توعىز تۇرعىن ءۇي، پرەزيدەنت اكىمشىلىگى، پارلامەنت، ۇكىمەت جانە جوعارعى سوت عيماراتتارىنا ەلەكتر قۋاتى بەرىلگەنىن حابارلادى. "بايتەرەك" مونۋمەنتى، "يزۋمرۋدنىي كۆارتال" بيزنەس ورتالىعى، ۇلتتىق كىتاپحانا مەن ۇلتتىق ارحيۆ عيماراتتارىنا جارىق قوسۋ ءۇشىن جوندەۋ جۇمىستارى اتقارىلىپ جاتىر دەپ مالىمدەدى اكىمدىك وكىلدەرى.
جەكسەنبى كۇنى نۇر-سۇلتان تۇرعىندارى قالانىڭ سول جاعالاۋ بولىگىندە جارىق ءسونىپ، كەي كوشەدە باعدارشام ءوشىپ قالعانى تۋرالى شاعىم ايتقان. جەرگىلىكتى باسىلىمدار تۇنگى ساعات ەكىنىڭ شاماسىندا جەكەلەگەن اۋداندار عانا ەلەكتر جارىعىنان اجىراپ قالعانىن حابارلادى. جەكسەنبىنىڭ كەشىندە نۇر-سۇلتان اكىمى التاي كولگىنوۆ "سول جاعالاۋ" قوسالقى ستانتسياسىندا ەلەكتر جەلىسىن قالپىنا كەلتىرۋ جۇمىستارى جۇرگىزىلىپ جاتقانى جانە ء"ورت ءسوندىرۋ بريگادالارىنىڭ قاۋىپسىزدىگى ءۇشىن" تۇرعىن ءۇي كەشەندەرى مەن نىسانداردىڭ ءبىر بولىگى جارىقتان اجىراتىلاعانى تۋرالى الەۋمەتتىك جەلىدە حابارلادى.
دۇيسەنبى كۇنى تاڭەرتەڭ قازاقستان پرەزيدەنتىنىڭ ءباسپاسوز حاتشىسى بەرىك قۇرمانعالي Facebook الەۋمەتتىك جەلىسىندەگى پاراعىندا "استانانىڭ ەداۋىر بولىگىن جارىقسىز قالدىرعان اپاتقا بايلانىستى مەملەكەت باسشىسىنىڭ ۇكىمەتكە ارنايى كوميسسيا قۇرۋدى تاپسىرعانىن" حابارلادى. كوميسسياعا پرەمەر-ءمينيستردىڭ ورىنباسارى رومان سكليار جەتەكشىلىك ەتەدى.
"كوميسسيا مۇقيات زەرتتەۋ جۇرگىزىپ، كىنالىلەردى انىقتاپ، قاجەت بولعان جاعدايدا ءىستى قۇقىق قورعاۋ ورگاندارىنا وتكىزەدى. پرەزيدەنت ۇكىمەت پەن نۇر-سۇلتان قالاسىنىڭ اكىمدىگىنەن الداعى ۋاقىتتا مۇنداي جاعدايلارعا جول بەرمەۋ ءۇشىن شۇعىل شارالار قابىلداۋدى تالاپ ەتتى" دەپ جازدى قۇرمانعالي.
بۇعان دەيىن شىلدەنىڭ ورتاسىندا الماتى قالاسىنىڭ كوپتەگەن اۋدانى مەن الماتى وبلىسىنىڭ قالاعا ىرگەلەس اۋماعى ءبىرشاما ۋاقىت بويى جارىقسىز قالعان بولاتىن. قازاقستاننىڭ بۇرىنعى استاناسى ءارى ەڭ ءىرى قالاسىندا جارىقتىڭ ءوشۋى كولىك قوزعالىسىن قيىنداتىپ جىبەرگەن: كوشەدەگى باعدارشامدار ىستەمەي، مەترو بىرنەشە ساعاتقا توقتاعان. رەسمي دەرەكتەر بويىنشا، بۇعان جەرگىلىكتى جىلۋ ەلەكتر ورتالىعىنىڭ جەلىسىندەگى اقاۋ سەبەپ بولعان. تامىز ايىندا قالانى ەلەكترمەن قامتاماسىز ەتەتىن كومپانيا الماتىنىڭ ء"ىشىنارا" جارىقتان اجىراتىلاتىنى تۋرالى حابارلاعان. وعان جەلىنىڭ تۇتانۋى سەبەپ بولعان.
Abai.kz
