ەلدىڭ ىشكى ىستەر مينيسترلىگى ء(ىىم) 11 قاراشادا يم توبىنىڭ مۇشەسى دەپ كۇدىككە ىلىنگەن اقش ازاماتىن دەپورتاتسيالاعانىن حابارلادى. مۇنان بولەك 14 قاراشادا گەرمانيانىڭ جەتى جانە فرانتسيانىڭ 11 ازاماتىن وتكەرىپ بەرەتىنى ايتىلعان. ازىرگە ەۋروپا ەلدەرى انكارانىڭ بۇل شەشىمىنە قانداي پىكىر بىلدىرگەنى بەلگىسىز.

تۇركيا پرەزيدەنتى رەجەپ تايىپ ەردوعان وسىعان دەيىن سيريانىڭ سولتۇستىگىندەگى كۇردتەرگە قارسى وپەراتسيا كەزىندە يم-گە مۇشە بولعان 300-دەي شەتەل ازاماتىنىڭ ۇستالعانىن حابارلاعان.

ودان بولەك تۇرىك تۇرمەلەرىندە باسقا ەلدەردە جيحادشى دەپ ايىپتالعان ءبىر مىڭنان استام ازامات وتىر.

ەردوعان ەۋروپا مەملەكەتتەرىن "يسلام مەملەكەتى" تەرروريستىك ۇيىمىنا قوسىلىپ كەتكەن ازاماتتاردىڭ تاعدىرىنا بەيجاي قاراپ وتىرعانىن ايتىپ، بىرنەشە رەت ايىپتاعان. اقش پرەزيدەنتى دونالد ترامپ تا ەۋروپا ەلدەرىن سيريا لاگەرلەرىندە وتىرعان ازاماتتارىن الىپ كەتۋگە شاقىرعان.

انكارانىڭ سيريا سولتۇستىگىندە كۇردتەرگە قارسى وپەراتسيا كەزىندە، لاگەرلەردە ۇستالعان جۇزدەگەن سودىردىڭ قاشىپ كەتكەنى بەلگىلى بولعان.

بريتانيا باستاعان بىرقاتار ەۋروپا مەملەكەتتەرى "يسلام مەملەكەتى" تەررورلىق توبىنا قوسىلىپ كەتكەن ادامداردى ازاماتتىقتان ايىرعان. سوندىقتان دەپورتاتسيالانعان ازاماتتاردى بىرقاتار ەۋروپا ەلدەرى قابىلداي ما، جوق پا، بەلگىسىز.

Abai.kz