بوليۆيا وپپوزيتسياسى پرەزيدەنت مورالەستى قاماۋعا وردەر بەرىلگەنىن حابارلادى
بوليۆيا پوليتسياسى پرەزيدەنت قىزمەتىنەن تۇسەتىنى جايلى حابارلاعان ەۆو مورالەسكە ىزدەۋ جاريالادى. بۇل اقپاراتتى بوليۆيا وپپوزيتسياسى جەتەكشىلەرىنىڭ ءبىرى لۋيس فەرناندو كاماچو تۆيتتەر الەۋمەتتىك جەلىسى ارقىلى تاراتتى.
ونىڭ جازۋىنشا، "پوليتسيا مەن اسكەر مورالەستى چاپار پروۆينتسياسىنان ىزدەپ جاتىر. پرەزيدەنتتىڭ بوليۆيا استاناسى لا-پاستان شىققان ۇشاعى قولعا تۇسكەن".
مورالەس ءوزىن قاماۋعا الۋ جايلى وردەردى زاڭسىز دەپ اتادى. "قىلمىسكەرلەر ۇيىمە شابۋىلدادى. توڭكەرىس زاڭ ۇستەمدىگىنە نۇقسان كەلتىردى", - دەيدى ول تۆيتتەر پاراقشاسىندا.
مەكسيكا سىرتقى ىستەر ءمينيسترى مارسەلو ەبرارد مەكسيكانىڭ مورالەسكە باسپانا بەرۋگە دايىندىعىن ءبىلدىردى.
بوليۆيا پرەزيدەنتى ەۆو مورالەس جاپپاي قارسىلىقتان كەيىن پرەزيدەنت سايلاۋىن قايتا وتكىزۋگە ۋادە بەرگەن جانە پرەزيدەنت قىزمەتىنەن تۇسەتىنىن جاريالاعان.
مورالەستەن كەيىن ۆيتسە-پرەزيدەنت الۆارو گارسيا-لينەر، بوليۆيا پارلامەنتى ەكى پالاتاسىنىڭ توراعالارى، بىرقاتار مينيسترلەر مەن ورىنباسارلارى جانە گۋبەرناتورلار ورنىنان كەتكەن. مۇنان وزگە پوليتسيا جوعارى سايلاۋ سوتىنىڭ (سايلاۋ كوميسسياسى) توراعاسى مەن ورىنباسارىن قاماۋعا العان. ولار "20 قازانداعى پرەزيدەنت سايلاۋىندا زاڭ بۇزۋعا قاتىستى" دەپ ايىپتالىپ وتىر.
وپپوزيتسيا قارسىلىعى سايلاۋ كوميسسياسى 20 قازانداعى پرەزيدەنت سايلاۋىنىڭ قورىتىندىسىن جاريالاعاننان كەيىن باستالعان. كوميسسيا مالىمەتىنشە، ءتورتىنشى رەت سايلاۋعا تۇسكەن پرەزيدەنت ەۆو مورالەس 47 پايىزدان استام داۋىس العان، ال ونىڭ باستى قارسىلاسى، بۇرىنعى جۋرناليست كارلوس مەساعا بەرىلگەن داۋىس 36 پايىزدان اسقان.
10 پايىز ايىرما مورالەستى ءبىرىنشى تۋردا جەڭىمپاز دەپ جاريالاۋعا مۇمكىندىك بەرەتىن ەدى. الايدا مەسا سايلاۋ ناتيجەلەرىن مويىندامادى. ول سايلاۋ زاڭىنىڭ جاپپاي بۇزىلعانىن العا تارتىپ، ەكىنشى تۋر وتكىزۋدى تالاپ ەتۋ ءۇشىن جاقتاستارىن كوشەگە شاقىردى. بوليۆيانىڭ بىرنەشە قالاسىندا پوليتسيامەن قاقتىعىس بولىپ، كەم دەگەندە ءۇش ادام قازا بولدى.
Abai.kz
