قازاق باس ساۋلەت-قۇرىلىس اكادەمياسىندا "ساۋلەت جانە قۇرىلىستىڭ وزەكتى ماسەلەلەرى-2019" اتتى حالىقارالىق عىلىمي-ادىستەمەلىك كونفەرەنتسيا ءوتتى. بۇل شارا قازاقستان ساۋلەتىنىڭ ساڭلاقتارى  تولەۋ باسەنوۆ پەن مالباعار مەڭدىقۇلوۆتىڭ  110 جىلدىق مەرەيتويىنا ارنالدى.

مالباعار مەڭدىقۇلوۆ - قازاق حالقىنان شىققان تۇڭعىش ارحيتەكتۋرا پروفەسسورى، قازاقستاننىڭ ەڭبەك سىڭىرگەن ساۋلەتشىسى، الماتى قالاسىنىڭ تۇڭعىش باس ارحيتەكتورى. ول 1909 جىلى ورىنبوردا دۇنيەگە كەلگەن. تاشكەنتتەگى ورتاازيالىق يندۋستريالدى ينستيتۋتتىڭ ارحيتەكتۋرا فاكۋلتەتىن ءبىتىرىپ، سوندا ەڭبەك جولىن باستاعان. 1941 جىلى تاشكەنت قالاسىنىڭ باس ارحيتەكتورى قىزمەتىن اتقارعان. ناۋاي داڭعىلى مەن تاشكەنت كانالىن سالۋعا اتسالىسقان. مالباعار مەڭدىقۇلوۆ - الماتى قالاسىنداعى «نەكە سارايى»، ج. جاباەۆتىڭ، م.اۋەزوۆتىڭ ەسكەرتكىشتەرى مەن تاعى باسقا عيماراتتاردىڭ اۆتورى. قازاق ارحيتەكتۋراسىن وركەندەتۋ، زەرتتەۋ سالاسىندا 70-تەن استام عىلىمي ەڭبەك، 4 مونوگرافيا، كازاك ارحيتەكتۋراسىنىڭ تاريحى» دەگەن ەكى تومدىق كىتاپ جازعان.

تولەۋ باسەنوۆ - تۇڭعىش قازاق ارحيتەكتورى، قازاقستاننىڭ ەڭبەك سىڭىرگەن قۇرىلىسشىسى. ول ەلىمىزدەگى قازىرگى ارحيتەكتۋرالىق مەكتەپتىڭ نەگىزىن قالاعان. وسى سالانىڭ وداعىن قۇرىپ، ماماندارىن دايىنداۋعا ۇلەس قوسقان عالىم-پەداگوگتاردىڭ ءبىرى. تولەۋ قۇلقامانۇلى 1909 جىلى اقتوبە وبلىسىنىڭ شالقار اۋدانىندا دۇنيەگە كەلگەن. سانكت-پەتەربور ازاماتتىق ينجەنەرلەر ينستيتۋتىن بىتىرگەن. 1933-37 جىلداردىڭ ارالىعىندا جامبىلدا، الماتىدا، قىرعىزستاندا قىزمەت ەتتى. 1937 - 41 جىلدارى الماتى قالاسىنىڭ باس ارحيتەكتورى، 1944 - 54 جىلدارى قازاق كسر مينيسترلەر كەڭەسى جانىنداعى ارحيتەكتۋرا باسقارماسىنىڭ باستىعى، 1958 - 76 جىلى قۇرىلىس ىستەرى جونىندەگى مەملەكەتتىك كوميتەت توراعاسىنىڭ ورىنباسارى قىزمەتتەرىن اتقاردى. ول الماتى قالاسىنىڭ باس جوسپارىن، الماتىداعى دوستىق داڭعىلىنىڭ باس جوباسىن، حالىقارالىق الماتى اۋەجايىنىڭ بىرىنشى كەشەنىن، قازاق وپەرا جانە بالەت تەاترىنىڭ ۇيىن، امانگەلدى ەسكەرتكىشىنىڭ ارحيتەكتۋرالىق جوسپارىن، تۇرعىن ۇيلەردى جوبالالاۋ جۇمىستارىن كاسىبي شەبەرلىكپەن ورىنداپ شىقتى. باسەنوۆ “قازاقستان ارحيتەكتۋراسىنداعى ورنەكتەر”، “ارحيتەكتۋرا جانە قالا قۇرىلىسى” ت.ب. ەڭبەكتەردىڭ اۆتورى.

قازاق باس ساۋلەت-قۇرىلىس اكادەمياسى ەلىمىزدەگى بازالىق جوعارعى وقۋ ورنى رەتىندە ساۋلەت مايتالماندارىنىڭ ەسىمىن ۇمىت قالدىرمايدى.  اكادەميادا مالباعار مەڭدىقۇلوۆ پەن تولەۋ باسەنوۆ اتىنداعى  ءدارىسحانالار مەن مەموريالدىق تاقتالار بار. حالىقارالىق كونفەرەنتسيادا ولاردىڭ ءومىرى مەن شىعارماشىلىعىنا، قازاقستان ارحيتەكتۋراسىنىڭ دامۋىنا قوسقان ۇلەستەرى جايلى باياندامالار وقىلدى.

Abai.kz