اسىرە تويشىلدىق جاقسى ەمەس. ماقتان ءۇشىن شاشىلۋ بەرىسى - وبال، ارىسى - داراقىلىق. كىم اسىپ تۇسەدى دەپ جارىسقا ءتۇسۋ ودان دا سوراقى ادەت. بۇدان تىيىلۋ كەرەك.

دەسەك تە تويعا، اسقا شۇيلىگە بەرۋگە بولمايدى. ول - قازاقتىڭ عاسىرلار بويى ساقتاپ كەلە جاتقان سالت- ءداستۇرى. توي اعايىندى جاقىنداتادى. جاڭا ۇيلەنگەن جاستار ەلدىڭ باتاسىن الىپ، ەل قاتارىنا قوسىلادى. ءبىر-ءبىرىن تانىمايتىن قۇداندالى ەكى جاق توي ۇستىندە ءبىر- بىرىنە سىي-سياپات جاساپ، كوڭىلدەرى جاراسادى. تويدى جاقسى جاساسا ول بالالارىنا، قۇدالارىنا، جينالعان ەلگە دەگەن قۇرمەت. توي جاساپ ەكى جاس الدىمەن اللانىڭ، اتا- انانىڭ، اعايىننىڭ الدىندا جاۋاپكەرشىلىك الادى. عاسىرلار بويى سولاي بولىپ كەلدى، بولا بەرەدى دە. قازاق - سونىسىمەن قازاق.

بۇعان دەيىن قازاقتىڭ سالتىمەن كىسىسى قايتىس بولعان ادامنىڭ قوناقاسى بەرۋى مەن جەتىسىن، قىرقىن، جىلىن وتكىزۋگە ءتيىسىپ ەدىك. ول دا قازاقتىڭ ءتول سالت - ءداستۇرى. قازاق قولى اشىق، قوناقجاي، نامىسشىل حالىق. جيعان تەرگەنىن ۇيلەنگەن بالاسىنا نەمەسە ولگەن اكە شەشەسىنە قيماي وتىراتىن ەل ۇلگى مە سوندا؟ الدە بۇل تارتىس ەشكىمگە ايتپاي قوسىلىپ الاتىن ازاماتتىق نەكە مەن ولىگىن ورتەي سالاتىن كريماتوريگە كوشۋگە باستاپ بارا ما؟ ونىڭ ار جاعىندا تەكسىزدىك تۇر...

توي جاساسا دا، ءولىم ءجىتىمىن اتقارىپ اس بەرسە دە ۇكىمەتتىڭ قالتاسىنا ءتۇسىپ جاتقان قازاق جوق. ءوز قالتاسىنان شىعارادى. نامىسى ءۇشىن. ول نامىس تا قازاقتىڭ سۇيەگىنە سىڭگەن ۇلتتىق نامىس. " توي قۇدايدىڭ قازىناسى" دەگەندە قازاقتىڭ قۇدايدىڭ بەرگەن بايلىعىن جاقسىلىعىنا جۇمسايتىن جومارت نيەتىن ايتادى. ەگەر جاقسىلاپ توي جاساماسا، ءولىمىن اتقارماسا سۇيەگىنە تاڭبا بولادى. سوندىقتان بىرەسە ءدىندى، بىرەسە الەۋمەتتىك - تۇرمىستىق احۋالدى بەتكە ۇستاپ، قازاقتىڭ عاسىرلار بويى كەلە جاتقان سالت- داستۇرىنە تيىسە بەرمەيىكشى. جۇلمالاي بەرسەك ءتۇبى قازاقتىعىمىزدان دىم دا قالماۋى مۇمكىن. ال ءوز سالتىنان ايىرىلعان حالىق ول - ۇلتتىق بەت بەينەسىن جوعالتقان حالىق. ول ءتۇبى ءتىلىن، ءدىنىن جوعالتىپ، كۇشتىگە ءسىڭىپ جوق بولادى.

ادىلبەك قابانىڭ facebook پاراقشاسىنان

Abai.kz