قورعانىس ءمينيسترى دانيال احمەتوۆتىڭ الدىڭعى كۇنى قىزمەتىنەن كەتۋى سول مەكەمەدە ىستەيتىن قاراپايىم قىزمەتكەرلەر ءۇشىن كۇتپەگەن وقيعا بولىپتى. سەبەبى كەشە ونىڭ سارىشاعان پوليگونىنا ءىسساپارى جوسپارلانعان. سول جەردە ول جۋرناليستەرگە قوعامدا كوپ داۋ تۋدىرعان وتاندىق قارۋ-جاراقتاردىڭ ءمان-جايىن ءتۇسىندىرۋى ءتيىس ەدى...

قورعانىس ءمينيسترى دانيال احمەتوۆتىڭ الدىڭعى كۇنى قىزمەتىنەن كەتۋى سول مەكەمەدە ىستەيتىن قاراپايىم قىزمەتكەرلەر ءۇشىن كۇتپەگەن وقيعا بولىپتى. سەبەبى كەشە ونىڭ سارىشاعان پوليگونىنا ءىسساپارى جوسپارلانعان. سول جەردە ول جۋرناليستەرگە قوعامدا كوپ داۋ تۋدىرعان وتاندىق قارۋ-جاراقتاردىڭ ءمان-جايىن ءتۇسىندىرۋى ءتيىس ەدى...

الايدا ونىڭ ورنىنا احمەتوۆتى قورعانىس ءمينيسترى قىزمەتىنەن بوساتۋ تۋرالى مەملەكەت باسشىسىنىڭ جارلىعى شىقتى. قورعانىس سالاسىنداعى العاشقى ازاماتتىق ءمينيستردىڭ وتستاۆكاسى اسكەري ساراپشىلاردىڭ تاڭدانىسىن تۋدىرماپتى. «بۇل ونىڭ مينيسترلىگىندەگى سوڭعى جانجالدارمەن بايلانىستى بولۋى مۇمكىن. ويتكەنى باسشىنىڭ ورىنباسارى قىزمەتىنەن كەتكەندە ونىڭ دا كوپ ۇزاماي ورنىن بوساتاتىندىعى انىق ەدى. ال ەكس-ءمينيستردىڭ كىنالى، كىنالى ەمەستىگىن تەرگەۋ ورىندارى عانا بىلەدى»، - دەدى بۇرىنعى قورعانىس ءمينيسترى، پارلامەنت دەپۋتاتى ءسات توقپاقباەۆ.
مەكەمەسىندە قانشا داۋ شىقسا دا، ەلىمىزدە ەشقانداي لاۋازىم يەسىنىڭ ءوز ەركىمەن قىزمەتىنەن كەتپەيتىندىگىن ايتادى زاپاستاعى وفيتسەرلەر وداعىنىڭ توراعاسى ايتقالي ەسەنقۇلوۆ. «بىلتىرعى جىلى سىبايلاسقان جەمقورلىق بويىنشا ايىپتالعان جاپون ءمينيسترى ءوز-وزىنە حاراكيري جاساعان. ال بىزدە ولاردىڭ «ۇستىنەن تۇيە وتسە دە، قىڭق ەتپەيدى»، - دەيدى گەنەرال. دەگەنمەن «حاراكيري» جاساپ، قارنىن جارماسا دا، كەڭىردەگىن ءتىلىپ، ءوز-وزىنە قول جۇمساۋ تالپىنىسى ءدال وسى مينيسترلىكتە ورىن العان. احمەتوۆتىڭ ورىنباسارلارىنىڭ ءبىرى قاجىمۇرات ماەرمانوۆقا ءساۋىر ايىندا سىبايلاس جەمقورلىق فاكتىسى بويىنشا ايىپ تاعىلعان. وسىدان كەيىن اباقتىعا تۇسكەن گەنەرال قاعاز قياتىن پىشاقپەن ءوزىن-ءوزى باۋىزداماق بولعان. كەيبىر دەرەكتەر بويىنشا، ەكس-ۆيتسە-مينيستر «نايزا»، «سەمسەر»، «ايبات» سياقتى جارامسىز ارتيللەريالىق جۇيەلەردىڭ جاسالۋى مەن شىعارىلۋى جونىندەگى كونكۋرستار مەن كەلىسىم-شارتتار ازىرلەۋدە زاڭ بۇزۋشىلىقتارعا بارعان. ال مەملەكەت قازىناسى 82 ملن دوللارعا زيان شەككەن.
- باسشىسى قانداي بولسا، باعىنىشتىلارى دا - سونداي. «بالىق باسىنان ءشىريدى». جوعارى تالاپ قويىلماسا، وسىنداي ولقىلىقتار شىعا بەرەدى، - دەيدى ەسەنقۇلوۆ. الدىمەن باعىنىشتىسى، ودان كەيىن باسشىسى جاۋاپقا تارتىلعان جايتتار قازاقستاندا بۇرىن دا كەزدەسكەن. مىسالى، ءبىرىنشى ورىنباسارىن «قۇرباندىققا» شالعان قورشاعان ورتانى قورعاۋ ءمينيسترى نۇرلان ىسقاقوۆ 4 ناۋرىزدا ءوزى قىزمەتتەن كەتسە، 30 ناۋرىزدا قاماۋعا الىنعان. دەگەنمەن قازاقستان تاريحىندا ايىپ تاعىلعان كۇننىڭ وزىندە شەتەل اسىپ، كوزدەن عايىپ بولاتىن شەنەۋنىكتەر دە كەزدەسكەن.

- الايدا مەنى تاڭعالدىرعانى - احمەتوۆتىڭ قىزمەتىنەن كەتۋى ەمەس، ورىنباسارى، جوعارى لاۋازىمدى قىزمەتكەرلەرى تۇتقىندالىپ جاتقان كەزدە ءلام-ميم دەپ اۋزىن اشپاۋى. ول ەڭ قۇرىعاندا نۇرلان ىسقاقوۆ سياقتى ءوز ەركىمەن وتستاۆكاعا كەتۋگە باتىلى بارمادى، - دەيدى ساياساتتانۋشى ايدوس سارىم. ايتا كەتۋ كەرەك، «ايقىن» گازەتىنىڭ قورعانىس مينيسترىنە بىلتىر 18 قىركۇيەكتە جولداعان ساۋالدارى سان مارتە جاڭارتىلىپ، قايتا جولدانىپ وتىرعانىمەن، سول كۇيى جاۋاپسىز قالعان. ونىڭ ىشىندە قورعانىس مينيسترلىگىندەگى سىبايلاسقان جەمقورلىققا قاتىستى ساۋالدار دا نازارعا ىلىنگەن جوق.

- مەملەكەت باسشىسى قورعانىس ءمينيسترىن ورنىنان الۋ ارقىلى وسى ماڭىزدى مەكەمەنى ساۋىقتىرعىسى، باسقا شەنەۋنىكتەردى دە جاۋاپكەرشىلىككە شاقىرعىسى كەلدى، - دەيدى ەسەنقۇلوۆ. «احمەتوۆ قاراماعىنداعىلار اراسىنداعى جەمقورلىقتى اۋىزدىقتاي المادى. قايتا كەرىسىنشە، اسكەريلەردىڭ بىلىق-شىلىعى، بيۋدجەتتىك قاراجاتتى تالان-تاراجعا سالۋى ارتىپ كەتكەنگە ۇقسايدى، - دەيدى سارىم. سوندىقتان ول احمەتوۆتى جۇمىستان كەتىرۋدى «وتە ورىندى، قيسىندى كادرلىق شەشىم» دەپ باعالايدى. - ونىڭ ورنىنا مۇحتار التىنباەۆ، الىبەك قاسىموۆ سىندى ارى بار گەنەرالدار كەلسە دۇرىس بولار ەدى، - دەيدى ساراپشى.

قازاقستان پرەزيدەنتى 2007 جىلى قاڭتار ايىندا دانيال احمەتوۆتى قىزمەتكە تاعايىنداعان كەزدە ونىڭ رەسپۋبليكاداعى العاشقى ازاماتتىق قورعانىس ءمينيسترى ەكەندىگىنە ايرىقشا نازار اۋدارعان. «اسكەريلەر اسكەر جۇمىسىمەن، ال قورعانىس كەشەنىندەگى ساياسات پەن ونى باسقارۋ ىسىمەن ازاماتتىق تۇلعالار اينالىسۋى ءتيىس. بۇل - الەمدىك ءۇردىس» دەگەن بولاتىن پرەزيدەنت. ول دانيال احمەتوۆتىڭ الدىنا سانى كوپ ەمەس، بىراق ساپالى، ءموبيلدى، جاقسى جابدىقتالعان اسكەرى بار قازاقستاننىڭ پارمەندى اسكەري كەشەنىن جاساقتاۋ مىندەتىن قويعان. ال احمەتوۆ ءوز كەزەگىندە قازاقستاننىڭ قورعانىس سالاسىن بارىنشا باسەكەگە قابىلەتتى ەتىپ، الەمدىك دەڭگەيگە كوتەرۋگە ۋادە ەتكەن ەدى.

«ايقىن» گازەتى، 19.06.2009