قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتىنىڭ تاپسىرماسىمەن ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى «زاڭ تەرمينولوگياسىن جەتىلدىرۋ ماسەلەلەرى» اتتى رەسپۋبليكالىق ادىستەمەلىك سەمينارىن وتكىزدى.

ادىستەمەلىك سەميناردىڭ وزەكتىلىگى زاڭنامالىق قۇجاتتاردىڭ قوعام سۇرانىسىنا سايكەس مەملەكەتتىك تىلدە ساۋاتتى جازىلۋى، زاڭ تەرميندەرىن جۇيەلەۋ، زاڭنامالىق قۇجاتتاردى قازاق ءتىلىنىڭ جازۋ نورمالارىنا سايكەس رەتكە كەلتىرۋ بويىنشا قوردالانعان پروبلەمالاردى تالقىلاۋعا نەگىزدەلگەن.

زاڭنامالىق قۇجاتتاردىڭ قوعام سۇرانىسىنا سايكەس مەملەكەتتىك تىلدە ساۋاتتى دايارلانۋ ماسەلەلەرىن تالقىلاپ، ونى شەشۋدىڭ جولدارىن بەرۋدى كوزدەيتىن ادىستەمەلىك سەميناردا زاڭناما ءتىلىنىڭ اۋدارما ءتىل دەڭگەيىنەن اسا الماۋ سەبەپتەرى مەن ودان شىعاتىن سالدار باسا كورسەتىلدى.

زاڭ نورمالارىن، قاعيدالارى مەن ەرەجەلەرىن ۇلتتىق ءتىلدىڭ اياسىندا قاراستىرۋ مۇمكىندىگى وقىلعان باياندامالار مەن سويلەنگەن سوزدەردىڭ باستى تاقىرىبىنا اينالدى. قازاقستان رەسپۋبليكاسى پارلامەنتى سەناتىنىڭ دەپۋتاتى نۇرتورە ءجۇسىپ، عالىم-تەرمينولوگ، پروفەسسور ش.قۇرمانبايۇلى،  باس پروكۋراتۋرانىڭ وتىنىشتەر جانە ءىس جۇرگىزۋ باسقارماسىنداعى باس پروكۋروردىڭ اعا كومەكشىسى – مەملەكەتتىك ءتىلدى دامىتۋ توبىنىڭ جەتەكشىسى ءۋالي ەرنۇر زاڭ سالالارىنداعى تەرميندەردى تولىقتىرۋ جانە ولاردى بىرىزدەندىرۋ ماسەلەلەرى بويىنشا قۇندى پىكىرلەرىن ورتاعا سالدى.

ءماجىلىس دەپۋتاتى ا.سماعۇلوۆ زاڭ جوبالارىنىڭ تەرمينولوگيالىق بىرىزدىلىگىن قامتاماسىز ەتۋ پروبلەمالارىنا قاتىستى ءوز ۇسىنىستارىن بىلدىرە كەلىپ، مەملەكەتتىك ورگاندار دايىنداعان حالىقارالىق شارتتىڭ، زاڭ جوباسىنىڭ مەملەكەتتىك تىلدە ساپالى دايىندالۋىن ولاردىڭ قىزمەت تيىمدىلىگىن باعالاۋ رەيتينگىنە نىسانالى ينديكاتور رەتىندە ەنگىزسە دۇرىس بولار ەدى دەگەن وي تاستادى.

قازاقستان رەسپۋبليكاسى پارلامەنتى ءماجىلىسى اپپاراتىنىڭ رەداكتسيالاۋ جانە اۋدارما ءبولىمىنىڭ مەڭگەرۋشىسى ءداۋىتالى وماشۇلى نورماتيۆتىك قۇقىقتىق اكتىلەر جوبالارىنىڭ ورىس تىلىندە ازىرلەنۋى، پارلامەنتكە كەلىپ تۇسكەنشە وسى جوبالاردىڭ ورىس تىلىندەگى ءماتىنى عانا پىسىقتالىپ، ال قازاق تىلىندەگى اۋدارما نۇسقاسىنىڭ نازاردان تىس قالۋى، جالپى العاندا ۇلتتىق زاڭناما ءتىلىنىڭ، ونىڭ تەرمينولوگياسىنىڭ ورىس تىلىندەگى نۇسقاعا بايلانىپ قالۋى ۇلتتىق زاڭنامانىڭ ءتىلى مەن تەرميندەرىندەگى بىرىزدىلىكتىڭ ساقتالماۋىنا سەبەپ بولىپ وتىرعانىن باسا كورسەتتى.

ءىس-شاراعا زاڭ سالاسىنىڭ جەتەكشى ماماندارى، قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق تەرمينولوگيا كوميسسياسىنىڭ مۇشەلەرى، قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانىنداعى تەرمينولوگيالىق جۇمىس توبىنىڭ مۇشەلەرى، مەملەكەتتىك ورگانداردىڭ قىزمەتكەرلەرى، ۇلتتىق كومپانيالار مەن باق وكىلدەرى قاتىستى.

ادىستەمەلىك سەميناردىڭ قورىتىندىسى بويىنشا مەملەكەتتىڭ ءتىل ساياساتىن ودان ءارى جەتىلدىرۋگە باعىتتالعان قارار قابىلداندى.

Abai.kz